TSEP KAWP SHANGLAWT AI DE

Tsaw ra ai Wunpawng Myusha ni e, dai ni an-hte mungdan kata hta mung maden Myen asuya ni htim gasat ai a majaw Wunpawnh Myusha ni tsimyam jam jau hkrum sha nga ra ga ai re. Wunpawng Myusha ni hpe ahkaw ahkang nkam jaw dip lu, dip sha gamyet da mayu, a myu shamat kau ya na hpe myit let byin wa ai mang hkang re.

Anhte myu sha ni Myen mung maden ni hte shaning (60) ning jan rau nga lai wa ai gaw hpa akyu n-nga ga ai, yawng mayawng hta hkrat sum na lam de sha yawng nga ai hpe mi chyaw mu nga ga ai re

Wunpawng Myusha ni ra ladawn nga ai myit mada lam hpe hkan shatup ya na gaw Wunpawng Myusha yawng madi shadaw da ai KIO asuya hta lit nan nga ga ai. Anhte Wunpawng Myusha ni ra ladawn nga ai myit mada lam gaw mung maden Myen asuya hte matut naw pawng nga na, ga shadawn Federal hku lu nga pra na ram hpe sha myit mada nga ai nrai ga ai. Tsep kawp shang lawt lu ai Wunpawng Mungdan gaw de lu na hpe she myu sha ni yawng a kraw salum kata na nan myit mada nga ai re. Dai hpe Wunpawng Myusha yawng madi shadaw kam hpa nga ai Wunpawng Mungdan Shanglawt Asuya KIO kawn chyeju hte a-hkyak la sawn shalawm dum ya marit. (KIO kawn mungdan shara shagu na Wunpawng Myusha marai hkum shagu hpe (1) Federal lu na ra ai i?, (2) tsep kawp shanglawt lu na hpe ra ai i? san htai galaw yu yang, yawng gaw (2) hpe sha htai na mara ai.)

Myen mung maden asuya wa kaja nan Wunpawng Myusha ni a n-tsa myit kaja nan san seng ai rai yang, ya na zawn mang hkang galu nga na nrai, jahkring hkring mahtai npru hkraw ai Myen hte jahkrup jahta ai lamang ni mung nga na nre hpe ma kaji bawnu hte pa chye sawn nga ai. KIO hte Myen jahkrup dat ai hpang hta galoi mung Myen mung maden asuya gaw shi a hpyen n gun laba hpe sha ajat nga ai re. Dai hpe yu yang Myen wa gaw aten garawt nna shi jin sai ngu shadu ai hte n-gun kaba hte htim gasat let Myu shamyit kau na ngu ai mahkyen sha re lam dan dawng nga ai.

KIO hku na gaw galoi mung Myen mung maden asuya wa lu jaw na nre ai Federal hpe hpyi nga na ten nre sai. Wunpawng Mungdan (KACHINLAND) ngu mungkan hta ndau dat nna Myen mung maden asuya hpe, nga ai n-gun hte Padang dip hkra htim kasat ra saga ai. KIO hpe Wunpawng Myusha yawng madi shadaw nga ai gaw n-gun kaba nan rai sai. Hpa majaw nga yang ya ten hta maigan mungdan ni mung Myen mung a dinghku mang hkang re ngu sha mu ai majaw tang du ai daram yu mada ai lam n-nga ai re. Dai majaw maigan mungdan ni a man hta dinghku mang hkang madang sha nre sai, myu sha mang hkang, mung maden Myen asuya hte Wunpawng Mungdan asuya byin nga ai majan gaw, mungdan langai hte langai byin ai majan re ngu ai lachyum de dan dawng wa hkra galaw ra sai.

Dai hku nre ai sha Myen mung maden asuya hte Federal hpyi, htim gasat majan ladat nlang shi ai sha ning hkap majan ladat sha naw lang nga yang gaw, Myen Salang Kaba langai mi tsun ai ga hpa "Jinghpaw hte Myen langai hpang langai Mali hka kaw gumhtawn bang yang hpang jahtum gaw Myen sha ngam ai " ngu ai hpan lachyum mung byin wa chye ai. Annau ni grai hpang hkrat mat wa chye nga ai. (Laiza grup yin kaw gasat ai hte sha Wunpawng Mungdan lu wa na nrai, Myen wa mung si htum mat na nrai nga ai. Myen wa gaw shi kade ma si sum ai rai tim Jinghpaw Mung kaang hkup gaw shi hpyen ngun hpe aloi sha jat lu shamu shamawt taw lu nga ai re. Dai majaw htim gasat majan ladat hpe lang nhtawm Wunpawng a shara ni ngai hpang ngai htawt zing mat wa let Jinghpaw Mung hte (Myen mung, Sagain jarik kaw she ninghkap majan ladat hpe lu lang hkra shakut ra sai.)

Htim gasat na daram n-gun n-nga shi ai ngu na mung nlu tsun ai, hpa majaw nga yang dai ram ram law ai Myen mung maden hpyen ni hpe dai ni du hkra Laiza de n-shang wa lu hkra makawp maga lu ai ngu gaw Karai Kasang jaw ya ai mauhpa atsam marai nan lu nga sai majaw re. Dai majaw Laiza a shara kaw Jinghpaw Mung ting nan rai ra saga ai law. (Myen wa gaw KIO a n-gun hpe yat yat sha shama ya taw ai re ngu hpe mung dum ga.)

Daini daina kawn an hte Wunpawng Myusha yawng hkra mung, maigan mungdan ni a man e, magan myusha ni a man e, shiga ni, laika ngau hta ka ai hkan e, yawng mayawng hta e Wunpawng Wunpawng Mungdan hpe KACHIN STATE ngu nlang sai sha KACHINLAND ngu na she lang hpang wa saga, Myen hpyen wa hpe mung, Mung maden Myen hpyen ni (နယ္ခ်ဲ ႔ဗမာ) ngu nna ka jai lang hpang wa ga ngu saw lajin mayu n ngai law.

Wunpawng Mungdan Shanglawt lu na hpe tsep kawp kam ai.
JINGHPAW ZAU

(JP kasa)