UPWC နှင့် NCCT တို့ ဆက်လက် တွေ့ဆုံ ဆွေးနွေးရန် အလား အလာကောင်းဟုဆို

 












တပြည်လုံး အပစ်အခတ် ရပ်စဲရေး အတွက် ဆွေးနွေး ပွဲများ ပြန်စဖို့ MPC တာဝန် ရှိသူ များမှ NCCT အဖွဲ့အား ထိုင်းနိုင်ငံ၌ လာရောက် ညှိနှိုင်း ဆွေးနွေး နေစဉ်

သတင်း - ရွှေဟင်္သာ သတင်းဌာန

အပစ်အခတ် ရပ်စဲရေး ဆိုင်ရာ ကိစ္စရပ် များနှင့် ပက်သက်၍ ပြည်ထောင်စု ငြိမ်းချမ်းရေး ဖေါ်ဆောင်ရေး လုပ်ငန်း ကော်မီတီ (UPWC) နှင့် တစ်နိုင်ငံလုံး အပစ်အခတ် ရပ်စဲရေး ဆိုင်ရာ ညှိနှိုင်း ဆောင်ရွက်ရေး အဖွဲ့ NCCT တို့ ပြန်လည် ဆွေးနွေး နိုင်ရန် အတွက် မြန်မာ့ ငြိမ်းချမ်းရေး စင်တာ MPC တာဝန် ရှိသူ များနှင့် NCCT အဖွဲ့ခေါင်းဆောင် တို့ ဒီဇင်ဘာလ ၂ရက်နေ့က တွေ့ဆုံ မှုတွင် အပြုသဘော ဆောင်ပြီး အလားအလာ ကောင်းသည်ဟု NCCTမှ  ဗိုလ်မှူးကြီး ခွန်ဥက္ကာက ရွှေဟင်္သာ သတင်း ဌာနအား ပြောကြား ခဲ့သည်။
“ဆွေးနွေးချက် တွေက အပြုသဘော ဆောင်တယ် အလားအလာ ကောင်းတယ်။ နီးစပ်မှု ရှိတယ်လို့ ပြောနိုင် ပါတယ်။ ကျွန်တော် တို့က တွေ့ဆုံ ဆွေးနွေးရေး ဆိုင်ရာ အချက် (၅) ချက်ကို တင်ပြ ခဲ့တယ်။ MPC ဘက်က UPWC ကိုယ်စားကို ဖိတ်တာ ကတော့ ဒီလ (၁၇) ရက်နေ့ ရန်ကုန် အရောက် (၁၈) နဲ့ (၁၉) ရက်မှာ တွေ့ ဆုံ ဆွေးနွေး နိုင်ဖို့ ကိစ္စ အတွက်ပေါ့” ဟု ဗိုလ်မှူးကြီး ခွန်ဥက္ကာက ဒီဇင်ဘာလ (၃) ရက်နေ့တွင် ရွှေဟင်္သာ သတင်းဌာနသို့း ပြောသည်။

သို့သော်လည်း ထို MPC ကိုယ်စားလှယ် များ၏ တင်ပြ ချက်အား NCCT အဖွဲ့ ဘက်မှ အခြား လိုအပ်ချက်များ ရှိနေ သောကြောင့် တွေ့ဆုံမည့် နေ့ရက် အတိအကျ မသတ်မှတ် နိုင်သေးဟု ဗိုလ်မှူးကြီး ခွန်ဥက္ကာက ဆက်ပြောသည်။
အကြို ညှိနှိုင်းပွဲတွင် UPWC နှင့် NCCT တို့အကြား နှစ်ဖက် ဆက်လက် တွေ့ဆုံ ဆွေးနွေးရန် အချက်အား NCCT ဘက်မှ မူအရ သဘောတူ ကြောင်းနှင့် တွေ့ဆုံ NCCT ဘက်မှ တင်ပြ ထားသည့် ဆွေးနွေးရေး ဆိုင်ရာ အချက် (၅) ချက်ကို UPWC ထံ တင်ပြ သွားမည်ဟု မြန်မာ့ ငြိမ်းချမ်းရေး စင်တာမှ အကြီးတန်း အရာရှိ ဦးလှမောင်ရွှေ ကလည်း ရွှေဟင်္သာ သတင်း ဌာနသို့ ဒီဇင်ဘာလ ၂ရက်နေ့က ပြောသည်။
“ဆွေးနွေးပွဲတွေ ဆက်လက် ဆောင်ရွက်ဖို့ ပေါ့လေ၊ ကျွန်တော်တို့ တချို့တော့ ပြင်ဆင် ညှိနှိုင်း ထားတဲ့ ကိစ္စရပ် တချို့ကို ကျွန်တော်တို့ ပြောဆို ပြီးတော့ ပေးလိုက် တာလည်း ရှိပါတယ်။ အဲဒီ အပေါ်မှာ NCCT အနေနဲ့ ကတော့ မူအားဖြင့် ဆွေးနွေးပွဲ ပြန်လုပ်ဖို့ သဘော တူပါတယ်။ သူတို့ ဘက်က သိချင်တဲ့ အချက် (၅) ချက်ကို မေးထားတဲ့ အပေါ် ၀န်ကြီး ဦးအောင်မင်းကို ပြန်တင် ပြမယ်။ ဆွေးနွေးပွဲ ဆက်လက် ဖြစ်ပေါ်ဖို့ ကတော့ တော်တော်လေး အလားအလာ ကောင်းပါတယ်” ဟု ဦးလှမောင်ရွှေက ပြောသည်။
မြန်မာ အစိုးရ စစ်တပ်နှင့် တိုင်းရင်းသား လက်နက်ကိုင် တပ်ဖွဲ့ များအကြား ဖြစ်ပွား နေသည့် စစ်ရေး ပဋိပက္ခများ ချုပ်ငြိမ်းရန်အတွက် တစ်နိုင်ငံလုံး အပစ်အခတ် ရပ်စဲရေး စာချုပ် ချုပ်ဆို နိုင်ရန် အတွက် ပြီးခဲ့သည့် စက်တင်ဘာ လတွင် ပြည်ထောင်စု ငြိမ်းချမ်းရေး ဖေါ်ဆောင်ရေး လုပ်ငန်း ကော်မီတီနှင့် တစ်နိုင်ငံလုံး အပစ် အခတ် ရပ်စဲရေး ညှိနှိုင်း ဆောင်ရွက်ရေး အဖွဲ့ (NCCT) တို့ အကြား တွေ့ဆုံ ဆွေးနွေး ခဲ့ကြ ရာ၌ တွင် တပ်ပိုင်း ဆိုင်ရာ ကိစ္စရပ် များနှင့် ပက်သက်၍ တိကျသော အဖြေ မရ ခဲ့သည့် နောက်ပိုင်း၌ တွေ့ဆုံပွဲများ တစ်လခန့် ရပ်တန့် နေခဲ့သည်။
အထူးသဖြင့် ဖက်ဒရယ် ပြည်ထောင်စု တပ်မတော် ဖွဲ့စည်းရေး အပိုင်းတွင် တပ်မတော် ကာကွယ်ရေး ဦးစီးချုပ်နှင့် အမြင် ကွဲလွှဲမှု ရှိနေ ခဲ့သည်။
ဖက်ဒရယ် ပြည်ထောင်စု တပ်မတော် ဖွဲ့စည်းရေး ဆိုင်ရာ ကိစ္စရပ်နှင့် ပက်သက်၍ NCCT နှင် အစိုးရ တို့အကြား ဆွေးနွေးရန် သဘော တူညီချက် ရှိနေသော်လည်း လက်ရှိ အနေအထား အရ ဖွဲ့စည်းရန် စောလွန်း သေးသည်ဟု မြန်မာ့ ငြိမ်းချမ်းရေး စင်တာမှ အကြီးတန်း အကြံပေး အရာရှိ ဦးလှမောင်ရွှေ ကလည်း ဆိုသည်။
“ဖက်ဒရယ်ကို အခြေခံတဲ့ ပြည်ထောင်စု စနစ်ကို သွားမယ် ဆိုတာ ကျွန်တော်တို့ သဘောတူ ထားပြီး ဖြစ်ပါတယ်။ ပြည်ထောင်စု တပ်မတော် ကိစ္စကို သဘောတူ ထားပြီး ဖြစ်တဲ့ အတွက် အဲဒီ အချိန်မှာ ဆွေးနွေး နိုင်ဖို့ ပါဘဲ။ အခု လောလောဆယ် ဖက်ဒရယ် ပြည်ထောင်စု တပ်မတော် ထူထောင်ဖို့ ကြိုးပမ်း တာဟာ အဆင့်ကျော် နေတဲ့ သဘောမျိုး လို့လဲ ယူဆပါတယ်” ဦးလှ မောင်ရွှေက ရွှေဟင်္သာ သတင်းဌာနအား ဒီဇင်ဘာလ (၂) ရက်နေ့၌ ပြောကြား ခဲ့သည်။ဟု သူကပြောသည်။
တပ်မတော် ကာကွယ်ရေး ဦးစီးချုပ် ဗိုလ်ချုပ် မှူးကြီး မင်အောင်လှိုင် အနေနှင့် ဖက်ဒရယ် တပ်မတော် ဖွဲ့စည်းရေးကို လုံးဝလက် မခံ နိုင်ကြောင်း နိုဝင်ဘာ လကုန် ပိုင်း၌ ကရင်အမျိုးသား အစည်းအရုံး (KNU) ဥက္ကဌ မူတူးဆေးဖိုး တို့အဖွဲ့နှင့် တွေ့ဆုံ ဆွေးနွေး စဉ်တွင် ပြောဆို ခဲ့သည်။
ပြည်ထောင်စု ငြိမ်းချမ်းရေး ဖေါ်ဆောင်ရေး လုပ်ငန်း ကော်မီတီ (UPWC) နှင့် တပြည်လုံး အပစ်အခတ် ရပ်စဲရေး ဆိုင်ရာ ညှိနှိုင်း ဆောင်ရွက်ရေး အဖွဲ့ NCCT တို့ အကြား နှစ်ဖက် တွေ့ဆုံ ဆွေးနွေးမှု ပြုလုပ် နေ သည့် ကြားမှလည်း ကချင် ပြည်နယ်နှင့် ရှမ်းပြည်နယ် မြောက်ပိုင်း တို့တွင် မြန်မာ့ တပ်မတော်နှင့် တိုင်းရင်းသား လက်နက်ကိုင် အဖွဲ့ တို့အကြား တိုက်ပွဲများ ဆက်လက် ဖြစ်ပွါး နေဆဲ အခြေအနေ၌ ရှိနေသည်။

FUA ပထမအကြိမ် စစ်ဦးစီး အဖွဲ့ အစည်းအဝေးမှ စစ်ဒေသ နှစ်ခု ဖွဲ့စည်း

 
















သတင်း - ရွှေဟင်္သာ သတင်းဌာန

ဖက်ဒရယ် တပ်မတော် (FUA) အဖွဲ့၏ လွတ်မြောက် နယ်မြေ တစ်နေရာ၌ နှစ်ရက်တာ ကျင်းပ ခဲ့သည့် ပထမ အကြိမ် စစ်ဦးစီး အဖွဲ့ အစည်းအဝေး အတွင်း၌ စစ်ဒေသ နှစ်ခု ဖွဲ့စည်း ခဲ့ကြောင်း အစည်အဝေး တက်ရောက် ခဲ့သည့် အမည်မဖော် လိုသူ စစ်ဖက် အရာရှိ တစ်ဦးက ရွှေဟင်္သာ သတင်းဌာနသို့ နိုဝင်ဘာလ ၃ ရက်နေ့က ပြောသည်။
“မြောက်ပိုင်း စစ်ဒေသကိုတော့ ဗိုလ်ချုပ် ဂမ်ရှောင်က ဦးဆောင်ပြီး မြောက်ပိုင်း တိုင်းရင်းသား လက်နက်ကိုင် အဖွဲ့တွေကို တာဝန်ယူ သွားမယ်၊ တောင်ပိုင်း စစ်ဒေသ ကိုတော့ ဗိုလ်မှူးချုပ် ဘောကျော်ဟဲက တာဝန်ယူ သွားမယ်၊ စစ်ဦးစီးချုပ် ကိုတော့ ကျနော်တို့ မရွေးနိုင်သေးလို့ ဗိုလ်ချုပ် ဘီတူးကိုပဲ ယာယီ ဦးစီးချုပ် အဖြစ် ဆက်ခန့်ထား ခဲ့တယ်” ဟု အဆိုပါ စစ်ဘက် အရာရှိမှ ရွှေဟင်္သာ သတင်းဌာနအား ပြောကြား ခဲ့သည်။

FUA မြောက်ပိုင်း စစ်ဒေသ တာဝန်ခံ ဗိုလ်ချုပ် ဂမ်ရှောင်

ထိုအစည်းအဝေး အတွင်း UNFC မှ ကနဦး ချမှတ် ထားသည့် မူအတိုင်း တစ်နိုင်ငံလုံး အပစ်အခတ် ရပ်စဲရေး ညှိနှိုင်း ဆွေးနွေး ပွဲကို ကြားနိုင်ငံ တစ်ခု၌ ကျင်းပရေး၊ ညှိနှိုင်း ဆွေးနွေး ပွဲတွင် နိုင်ငံ တကာ အသိသက်သေ ထားရှိရေး စသည့် အချက် များအား တနိုင် ငံလုံး အပစ်အခတ် ရပ်စဲရေး ညှိနှိုင်းရေး အဖွဲ့ (NCCT) မှ အားနည်း ချက်များ ရှိခဲ့သည့် အပေါ် ဝေဖန် ဆွေးနွေး ခဲ့ကြောင်းလည်း FUA အကြံပေး အရာရှိ ဗိုလ်မှူးကြီး ခွန်ဥက္ကာက ရွှေဟင်္သာ သတင်းဌာနအား ဒီဇင်ဘာလ ၃ ရက်နေ့တွင် ပြောကြား ခဲ့သည်။
ညီညွှတ်သော တိုင်ရင်းသား လူမျိုးများ ဖက်ဒရယ် ကောင်စီ (UNFC) အဖွဲ့ဝင် တိုင်းရင်းသား လက်နက်ကိုင် တပ်များ ပါဝင် ဖွဲ့စည်း ထားသည့် ဖက်ဒရယ် တပ်မတော် (FUA) ၏ ပထမ အကြိမ် စစ်ဦးစီး အဖွဲ့ အစည်း အဝေးအား နိုဝင်ဘာလ (၂၈) နှင့် (၂၉) ရက်နေ့တို့တွင် နှစ်ရက်တာ လွတ်မြောက် နယ်မြေ တစ်နေရာ၌ ကျင်းပခဲ့ခြင်းဖြစ်သည်။
ထိုအစည်း အဝေးအား တိုင်းရင်းသား လက်နက်ကိုင် အဖွဲ့ (၈) ဖွဲ့မှ ကိုယ်စားလှယ် (၁၁) ဦး အကြံပေး တစ်ဦးနှင့် လေ့လာသူ (၃) ဦး စုစုပေါင်း (၁၅) ဦး တက်ရောက် ခဲ့သည်။
ထို စစ်ဦးစီးများ အဖွဲ့၏ ပထမ အကြိမ် အစည်း အဝေးအား FUA အဖွဲ့ဝင် တိုင်းရင်းသား လက်နက်ကိုင် အဖွဲ့ (၈) ဖွဲ့ဖြစ်သည့် ကချင်ပြည် လွတ်လပ်ရေး အဖွဲ့ ၊ ကရင်နီ အမျိုးသား တိုးတက်ရေး ပါတီ၊ ပလောင်ပြည် လွတ်မြောက်ရေး တပ်ဦး၊ ကရင် အမျိုးသား အစည်းအရုံး လက်အောက်ခံ ကရင်အမျိုးသား လွတ်မြောက်ရေး တပ်မတော်၊ မွန်ပြည်သစ် ပါတီ၊ ရခိုင်ပြည် တပ်မတော် (AA)၊ လားဟူ ဒီမိုကရက်တစ် သမဂ္ဂ၊ ချင်းအမျိုးသား တပ်ဦး အဖွဲ့ (၈) ဖွဲ့ တို့မှ စစ်ဦးစီး အဖွဲ့ဝင်များ တက်ရောက် ခဲ့ကြသည်။
သို့သော်လည်း “ဝ” အမျိုးသား အဖွဲ့ချုပ်၊ ပအိုဝ့် အမျိုးသား အဖွဲ့ချုပ်၊ ကိုးကန့်နှင့် ရှမ်းပြည် မြောက်ပိုင်း တပ်မတော် တို့မှ စစ်ဦးစီး အဖွဲ့ဝင်များ တက်ရောက် ခဲ့ကြခြင်း မရှိခဲ့ပေ။
၂၀၁၁ ဖေဖော်ဝါရီ၌ ဖွဲ့စည်းခဲ့ပြီး FUA ၏ ပထမ ဦးဆုံး စစ်ဦးစီးချုပ် အဖြစ် ဗိုလ်ချုပ်ကြီး မူတူး ဆေးဖိုး က စတင် တာဝန်ယူ ခဲ့သည်။ ထို့နောက်တွင် ဗိုလ်ချုပ် ဘီတူးမှ စစ်ဦးစီးချုပ် အဖြစ် ဆက်လက် တာဝန်ယူ ခဲ့ပြီး လက်ရှိ FUA စစ်ဦးစီး ချုပ်လည်း ဖြစ်သည်။
FUA တွင် စစ်ဒေသ (၂) ခု ထားရှိပြီး မြောက်ပိုင်း စစ်ဒေသ၌ ကချင်၊ ပလောင် ၊ ရှမ်းမြောက်၊ ဝ နှင့် မိုင်းလား၊ ကိုးကန့် လက်နက်ကိုင် အဖွဲ့များ ပါဝင် ပါသည်။ တောင်ပိုင်း စစ်ဒေသ၌ ကရင် အမျိုးသား အစည်းအရုံး၊ ကရင်နီ အမျိုးသား တိုးတက်ရေး ပါတီ၊ မွန်ပြည်သစ် ပါတီတို့ ပါဝင်သည်။
၂၀၁၁ ဖေဖော်ဝါရီလ ကတည်း ကပင် ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) နှင့် တစ်ချိန်တည်း အပြိုင် ဖွဲ့စည်း ထားခဲ့သည့် ဖက်ဒရယ် တပ်မတော် FUA အနေဖြင့် ပုံမှန် အစည်းအဝေး (၃) ကြိမ်နှင့် အလွတ် သဘော အစည်းအဝေး (၂) ကြိမ် ကျင်းပ ခဲ့ပြီး ဖြစ်သည်။
သို့သော်လည်း သီးခြား သတင်း ထုတ်ပြန် ခဲ့ခြင်း မရှိ ခဲ့ပေ။ ယခု သတင်းထုတ်ပြန် ခြင်းသည်လည်း FUA အနေဖြင့် တရားဝင် ပထမဆုံး အကြိမ် သတင်း ထုတ်ပြန် ခြင်းလည်း ဖြစ်သည်။
အစည်း အဝေး အပြီး သတင်း ထုတ်ပြန် ချက်သည် တစ်နိုင်ငံလုံး အပစ်အခတ် ရပ်စဲရေး အတွက် ညှိနှိုင်းနေသည့် တိုင်းရင်းသား လက်နက်ကိုင် အဖွဲ့ များနှင့် အစိုးတို့၏ ညှိနှိုင်း မှုအား အဟန့် အတား ဖြစ်စေ နိုင်မည် မဟုတ်ကြောင်း FUA အကြံပေးအရာရှိ ဗိုလ်မှူးကြီး ခွန်ဥက္ကာက ဒီဇင်ဘာလ (၃) ရက်နေ့က ရွှေဟင်္သာ သတင်းဌာနသို့ ပြောကြား ခဲ့သည်။
“ဒီဖက်ဒရယ် တပ်ဖွဲ့ဟာ စုပေါင်း ပြီးတော့ အလုပ်လုပ် ကြတာပါ၊ နိုင်ငံရေး ဦးတည် ချက်ကို ရအောင် လုပ်ဖို့ သဘော ရှိတယ်၊ အခု သွားနေတဲ့ UNFC က ချထားတဲ့ တစ်နိုင်ငံလုံး အပစ်အခတ် ရပ်စဲရေး လမ်းစဉ် ၊ တစ်နိုင်ငံ ငြိမ်းချမ်းရေး ရဖို့ လမ်းစဉ် ဒီလမ်းစဉ် တွေမှာ အဓိက အောင်မြင်အောင် ဝိုင်းဝန်း လုပ်ဆောင် ဖို့ပါ” ဟု ဗိုလ်မှူးကြီး ခွန်ဥက္ကာက ပြောသည်။
ယခု သတင်း ထုတ်ပြန်မှုသည် နှစ်ဖက် စက်တင်ဘာလ ဆွေးနွေး ညှိနှိုင်းမှု မပြေလည်သည့် အခြေအနေနှင့် အစိုးရ၏ တိုင်းရင်းသား ဒေသ အပေါ် ထိုးစစ် ၊ နယ်မြေ စိုးမိုးရေး စစ်ဆင်မှု များအား တိုင်းရင်းသား လက်နက်ကိုင် များဘက်မှ စစ်ရေး အရ တုံ့ပြန်မည့် အလားအလာ ဖြစ်ကြောင်း သုံးသပ် ချက်များ ရှိနေ ခဲ့သည်။
ထို့ပြင် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်မှ ဖက်ဒရယ် တပ်မတော်အား လက်မခံ နိုင်ကြောင်း မီဒီယာများအား အတိအလင်း ထုတ်ဖော် ပြောကြား ထားချက်များ ရှိ၍ ယခု FUA ၏ သတင်း ထုတ်ပြန် မှုသည် ဆွေးနွေး ပွဲအား အဟန့်အတန်း ဖြစ်စေ နိုင်သည်ဟု သုံးသပ် ချက်များ ကျယ်ကျယ် ပြန့်ပြန့် ရှိလာခဲ့သည်။
ဦးညို အုန်းမြင့် ကလည်း “ဒီ FUA ကြေငြာချက်ကို ကျွန်တော် ဖတ်ကြည့်တော့ ၊ အထွေထွေကို ထောက်ပြ ထားတယ်၊ ဘာမှ စစ်ရေး ပြင်ဆင်မှုနဲ့ လုပ်မယ် ဆိုတဲ့ စိန်ခေါ် လာတဲ့ အနေအထား မရှိဘူး၊ ကန့်ကွက်တယ် ဆိုတာက သူတို့ ဘက်က တာဝန်အရ ကန့်ကွက် ရတာ ဆိုတာပဲ ရှိတယ်၊ ငြိမ်းချမ်းရေး လုပ်ငန်းစဉ်ကို သက်ရောက်မှု မရှိနိုင်ဘူးလို့ ထင်ပါတယ်” ဟု ဦးညိုအုန်းမြင့်က ဒီဇင်ဘာလ (၃) ရက်နေ့တွင် ရွှေဟင်္သာ သတင်း ဌာနအား ပြောသည်။
အစည်းအဝေး တွင်း၌ အစိုးရ၏ တိုင်းရင်းသား ဒေသ များအပေါ် စစ်ဆင် နေမှုများ၊ ငြိမ်းချမ်းရေး လုပ်ငန်းစဉ် များအား သုံးသပ် ခဲ့ကြောင်း ဗိုလ်မှူးကြီး ခွန်ဥက္ကာက ဆိုသည်။
၎င်း FUA ပထမ အကြိမ် စစ်ဦးစီး အဖွဲ့ အစည်း အဝေး အပြီး၌ နိုဝင်ဘာလ (၃၀) ရက်နေ့၌ FUA မှ ကြေငြာချက် တစ်စောင် ထုတ်ပြန် ခဲ့ပြီး မြန်မာ့ တပ်မတော် အနေနှင့် စစ်မှန်သော ငြိမ်းချမ်းရေးကို စတင် ဖော်ဆောင် နိုင်ရန် အခြေခံ ဖြစ်သော တစ်နိုင်ငံလုံး အပစ်အခတ် ရပ်စဲရေး စာချုပ် ချုပ်ဆို နိုင်ရေး ကြိုးပမ်း နေသည့် ကာလတွင် အနှောက်အယှက် အဟန့်အတား ဖြစ်စေသော စစ်ဆင်မှုများ အားလုံးကို ချွှင်းချက်မရှိ ရပ်ဆိုင်း ပေးရန်လည်း တောင်းဆို ထုတ်ပြန် ထားသည်။

ထိုင်းနိုင်ငံတွင် ကချင် မနောပွဲတော် ကျင်းပ

ထိုင်းနိုင်ငံမြောက်ပိုင်း ချင်းရိုင်းခရိုင် ချင်းသောင်းမြို့နယ် ဘန်းမိုင် ဆာမခီကျေးရွာရှိ ကချင်တိုင်းရင်းသားများ၏ ၆ ကြိမ်မြောက် Wunli Hkridip ကချင်မနောပွဲကို ဒီဇင်ဘာလ ၄ ရက်တွင် စတင်ကျင်းပနေပြီ ဖြစ်သည်။

ဒီဇင်ဘာလ ၄ ရက် နံနက် ၉ နာရီတွင် ထိုင်းဘုရင် ဘူမိဘော အဒူယာဒက်၏ ၈၇ နှစ်ပြည့် ဂုဏ်ပြုသော အခမ်းအနားကို ထိုင်းအစိုးရ အရာရှိတစ်ဦးက ဦးဆောင်၍ ပြုလုပ်ခဲ့ပြီးကချင်အမျိုးသားအစည်းအရုံး KNO ဥက္ကဌ ဒူဝါ ဘောမ်ဝမ်လရော်က မနောပွဲ ဖွင့်လှစ်လိုက်ခြင်း ဖြစ်သည်။

“ဒီမနက် ၉ နာရီကနေ ထိုင်းစစ်တပ်က အရာရှိတဦး ဦးဆောင်ပြီး ထိုင်းဘုရင်မွေးနေ့ကို ဂုဏ်ပြုအခမ်းအနားလုပ်တယ်။ မနောပွဲကိုတော့ ဆွတ်ဒူဘောမ်ဝမ်လရော်ကနေ ဖွင့်လှစ်ပြီး မနော ကကြပါတယ်၊ ၁၂ နာရီကျော်မှာ ပြီးပါတယ်" ဟု မနောပွဲ ဖြစ်မြောက်ရေးကော်မတီမှ ဥက္ကဌ ဦးခေါင်ဟောင်း က ပြောသည်။

မနောပွဲအခမ်းအနားသို့ ကချင်လွတ်မြောက်ရေးအဖွဲ့ (KIO) ဒုဥက္ကဌ ဗိုလ်ချုပ်ကြီး အင်ဘန်လ၊ ကချင် အမျိုးသားအစည်းအရုံး KNO ဥက္ကဌ ဒူဝါ ဘောမ်ဝမ် လရော်နှင့် ဒုဥက္ကဌ ဦးအင်ဆန်တူးအောင် တို့လည်း တက်ရောက်ခဲ့သည်။

ထို့ပြင် ထိုင်းအစိုးရ အထူးစစ်တပ်ဖွဲ့မှ ဖျော်ဖြေရေးအဖွဲ့များ၊ တရုတ်နိုင်ငံ ယူနန်ပြည်နယ် ရွှေလီ၊ ရင်ကျန်း၊ မန်ရှီ၊ အိန္ဒိယနိုင်ငံ၊ ဂျပန်၊ စင်္ကပူ၊ ထိုင်းနိုင်ငံ ဘန်ကောက်၊ ချင်းမိုင်တို့မှ ကချင်တိုင်းရင်းသား စုစုပေါင်း ၁၀၀၀ ကျော် တက်ရောက်ခဲ့သည်ဟု သိရသည်။

၂၀၀၂ ခုနှစ်မှစတင်၍ ထိုင်းဘုရင် ဘူမိဘော၏ မွေးနေ့အားဂုဏ်ပြုသောအားဖြင့် ကချင်တိုင်းရင်းသားများက ၂ နှစ်လျှင်တစ်ကြိမ် ကချင်မနောပွဲကို ကျင်းပခဲ့ရာ ယခုနှစ်တွင် ၆ ကြိမ်မြောက် မနောပွဲ ကျင်းပခြင်း ဖြစ်သည်။

အဓိကအားဖြင့် ထိုင်းဘုရင် ဘူမိဘောအသက်ရှည် ကျန်းမာစေရန်၊ ထိုင်းနိုင်ငံရေး တည်ငြိမ်အေးချမ်းစေရန်၊ ရပ်ဝေးမြေ ရောက်ရှိနေသော ကချင်တိုင်းရင်းသားများဆုံဆည်းခြင်း၊ ကချင်ရိုးရာ ယဉ်ကျေးမှုကို တခြားနိုင်ငံတကာက သိရှိနားလည်စေရန် ရည်ရွယ်၍ ကျင်းပခြင်းဖြစ်သည်ဟု ဦးခေါင်ဟောင်း က ပြောသည်။

ယနေ့တွင် Wunli Hkridip မနောပွဲသို့ လူပေါင်း ၁၀၀၀ ကျော် တက်ရောက်လာပြီး လူပေါင်း ၇၀၀ ခန့်သည် နှစ်နာရီကျော်ကြာ ကချင်မနောပွဲ ကပြခဲ့ကြသည်ဟု သူက ဆိုသည်။

လာမည့် ဒီဇင်ဘာလ ၇ ရက်တွင်မူ မနောပွဲတက်ရောက်လာသူများက မိမိတို့ တိုင်းပြည် ငြိမ်းချမ်းလာစေရန်၊ ကျဆုံးသွားသော ကချင်လွတ်မြောက်ရေးအဖွဲ့ (KIO) ရဲဘော်များ၊ ရှေ့တန်းတွင် ရောက်နေသည့် ရဲဘော်များအတွက် ဆုတောင်းပွဲလည်း ကျင်းပမည် ဖြစ်ကြောင်း သိရသည်။ ထိုင်းနိုင်ငံတွင် ကချင်မနောပွဲကို ကျင်းပနေသော်လည်း မြန်မာပြည်တွင်းရှိ စစ်ပြေးဒုက္ခသည်များအတွက် ထပ်တူခံစားရသည်ဟု သူက ပြောသည်။

ကချင်ပြည်နယ် မြစ်ကြီးနားမြို့တွင် ပြည်နယ်အစိုးရက ၆၇ ကြိမ်မြောက် ကချင်မနောပွဲ ကျင်းပရန် စီစဉ်နေမှုကိုလည်းပြည်တွင်း အခြေအနေတည်ငြိမ်ခြင်း မရှိသေးသဖြင့် မနောပွဲ ကျင်းပခြင်းကို ကချင်လူထုက ကန့်ကွက်ခဲ့မှုကိုလည်း ထိုင်းနိုင်ငံရောက် ကချင်လူထုကလည်း ကန့်ကွက်ကြောင်း ဦးခေါင်ဟောင်းက ပြောသည်။

“ကျနော်တို့ ကချင်တွေ ကိုယ်တိုင် ဦးဆောင်ပြီးလုပ်မယ်ဆိုရင်တော့ လုပ်ဖို့ အားပေးတယ်။ နိုင်ငံတကာမှာ ရောက်နေတဲ့ ကျနော်တို့လည်း သွားတက်မယ်။ ဒါပေမဲ့ သူများတွေ ပိုက်ဆံပေးပြီး လုပ်ခိုင်းမယ်ဆိုရင်တော့ တန်ဖိုးကြီးတဲ့ ကျနော်တို့ ရိုးရာကို ငွေနဲ့ ဝယ်မရဘူး။ ဒီလို ပိုက်ဆံပေးပြီး လုပ်မယ်ဆိုရင်တော့ အားမပေးဘူး” ဟု သူက ပြောသည်။

မနက်ဖြန် ဒီဇင်ဘာလ ၅ ရက်တွင် ထိုင်းဘုရင်၏ ၈၇ နှစ်ပြည့် မွေးနေ့ ဂုဏ်ပြုသော အခမ်းအနား ကျင်းပ၍ ကချင်ထောင်ကာ အက ပြိုင်ပွဲများ ကျင်းပခြင်း၊ ညပိုင်းတွင် ထိုင်းအစိုးရ စစ်တပ်မှဖျော်ဖြေရေးအဖွဲ့မှ ကပြ ဖျော်ဖြေခြင်း၊ လူမျိုးစုအလိုက် မိမိတို့ရိုးရာယဉ်ကျေးမှု အကများဖြင့် တင်ဆက် ကပြခြင်း၊ဖြစ်ကြောင်း သိရသည်။

ဒီဇင်ဘာလ ၆ ရက်တွင် နိုင်ငံတကာမှ ရောက်ရှိလာသောကချင်ရိုးရာယဉ်ကျေးမှု ကိုယ်စားလှယ်များ၏ အစည်းအဝေး ပြုလုပ်ပြီး ညပိုင်းတွင် မြန်မာနိုင်ငံမှ ရောက်ရှိလာသော Yak Tim Pyaw Tim Rau (RAU) အဖွဲ့များ၊ ကချင်ရိုးရာအကအဖွဲ့များ၏ ကပြဖျော်ဖြေမည့် အစီအစဉ်များ ပြုလုပ်မည်ဖြစ်သည်။

ပြီးခဲ့သည့် ၂၀၀၂ ခုနှစ်မှ စတင်ကျင်းပသော ကချင်မနောပွဲသည် ၆ ကြိမ်မြောက် ကျင်းပခြင်း ဖြစ်သည်။ 

ထိုင်းဘုရင်ကသည် မိမိနိုင်ငံသား မဟုတ်သော်လည်း ကချင်တိုင်းရင်းသားများကို နေထိုင်ခွင့်ပြုရုံသာမက ထိုင်းဘုရင်၏ စီမံကိန်းအရ ကောက်ပဲသီးနှံစိုက်ပျိုးရန်မျိုးစေ့များ ဖြန့်ဝေပေးကာ ထွက်လာသည့် သီးနှံများကိုလည်း ဈေးနှုန်းကောင်းကောင်းပေး၍ ၀ယ်ပေးသည်ဟု ဦးခေါင်ဟောင်း က ပြောသည်။

ယခင်နှစ်များထက် ထူးခြားမှုမှာ မနောပွဲတွင် မြန်မာနိုင်ငံ၊ တရုတ်၊ အန္ဒိယနိုင်ငံ၊ ဂျပန်နှင့် ထိုင်းနိုင်ငံရောက် ကချင်တိုင်းရင်းသားများနှင့် အခြား တိုင်းရင်းသားများ အပါအဝင်စုစုပေါင်း ၂၀၀၀ ခန့် တက်ရောက်မည်ဟု ခန့်မှန်းထားသည်ဟုသိရသည်။

ထိုင်းဘုရင်က ဘန်းမိုင် ဆာမခီကျေးရွာတွင် ကချင်တိုင်းရင်းသားများကို နေထိုင်ခွင့်ပြုခဲ့သည်မှာ နှစ်ပေါင်း ၃၂ နှစ်ရှိခဲ့ပြီ ဖြစ်ပြီး လက်ရှိ အိမ်ခြေပေါင်း ၁၂၀ ကျော်ရှိကာ ဂျိန်းဖော၊ လီဆူ၊ လောင်ဝေါ်၊ ရဝမ်၊ လချိတ်၊ အဇီး(ဇိုင်ဝါး)စသည့် ကချင်မျိုးနွယ်စုများ နေထိုင်နေခြင်း ဖြစ်သည်။
KNG

Palaung state liberatoin front မှ ၀မ်းနည်းကြေကွဲခြင်း သ၀ဏ်လွှာ

ကချင်စာပေ နှင့် ယဉ်ကျေးမှု ကော်မတီ ( တက္ကသိုလ်များ ) ၏ သဘောထား ထုတ်ပြန်ကြေညာချက်

KIA ဗိုလ်သင်တန်းကျောင်းသို့ ပစ်ခတ်တိုက်ခိုက်မှုအပေါ် မကဒတ (ကျောင်းသားတပ်မတော်) ၏ ထုတ်ပြန်ကြေညာချက်

လက်နက်ကြီး ပစ်ခတ်ခံရမှု နှင့် ပါတ်သက်ပြီး KIO ၏ ထုတ်ပြန်ချက်

UNFC ၏ သဘောထား ထုတ်ပြန်ချက်

KIA ဌာနချုပ် အနီးမှ အစိုးရ တပ်စခန်းများ ဖယ်ရှားပေးရန် တောင်းဆို

အစိုးရ စစ်တပ်၏ ပစ်ခတ်မှုကြောင့် ကချင်လွတ်လပ်ရေး တပ်မတော် (KIA) ဗိုလ်သင်တန်းကျောင်းမှ သင်တန်းသား ၂၃ ဦး သေဆုံး မှုနှင့်ပတ်သက်၍ KIA ဌာနချုပ်အနီးမှ အစိုးရစစ်တပ်၏ စခန်းများ၊ လက်နက်ကြီးများအား ဖယ်ရှားပေးရန် တောင်းဆို လိုက်ကြောင်း သိရသည်။
အစိုးရ ငြိမ်းချမ်းရေးအဖွဲ့နှင့် တိုင်းရင်းသား လက်နက်ကိုင်အဖွဲ့များ ဆွေးနွေးနေသည့် ပြည်တွင်းငြိမ်းချမ်းရေး လုပ်ငန်းစဉ်များ အောင်မြင်နိုင်ရေး အတွက် ကချင်လွတ်လပ်ရေး တပ်မတော် (KIA) ဌာနချုပ် တည်ရှိရာ လိုင်ဇာ အနီးတ၀ိုက်၌ ဖြန့်ကျက်ချထားသော အစိုး ရ တပ်မတော်၏ စစ်စခန်းများ၊ လက်နက်ကြီးများအား ရုပ်သိမ်းပေးရန် ယနေ့ ရက်စွဲဖြင့် ကချင် လွတ်လပ်ရေး အဖွဲ့(KIO) ဗဟို အလုပ်အမှုဆောင် အဖွဲ့ က ကြေညာချက် ထုတ် တောင်းဆိုလိုက်ခြင်း ဖြစ်သည်။
KIA စစ်ဌာနချုပ် ရှိရာ လိုင်ဇာမြို့ အနီးသို့ လက်နက်ကြီးဖြင့် နိုဝင်ဘာလ ၁၉ ရက်နေ့က ပစ်ခတ်မှုကြောင့် KIA မှ စစ်ဗိုလ်လောင်း သင်တန်းသား ၂၃ ဦး သေဆုံးပြီး သင်တန်းသားနှင့်နည်းပြ စုစုပေါင်း ၂၀ ခန့် ဒဏ်ရာရရှိခဲ့ကြောင်း၊ ၎င်းတို့၏ ဗိုလ်လောင်း သင်တန်း ကျောင်းသို့ မြန်မာ့ တပ်မတော်မှ ရည်ရွယ်ချက်ရှိရှိဖြင့် ပစ်ခတ်မှုကို KIO ဗဟို ကော်မတီက ပြင်းပြင်းထန်ထန် ကန့်ကွက်ကြောင်း လည်း ကြေညာချက်၌ ဖော်ပြထားသည်။
အစိုးရ တပ်မတော်၏ လက်ရှိ လုပ်ရပ်ကြောင့် အစိုးရ ငြိမ်းချမ်းရေး အဖွဲ့နှင့်တိုင်းရင်းသား လက်နက်ကိုင် အဖွဲ့များ ဆွေးနွေးနေသည့် ပြည်တွင်းငြိမ်းချမ်းရေး လုပ်ငန်းများအပေါ် နှောင့်နှေးကြန့်ကြာမှုများ ဖြစ်ပေါ်လာနိုင်ကြောင်းလည်း တိုင်းရင်းသား ခေါင်းဆောင်များ က ပြောသည်။
တနိုင်ငံလုံး အပစ်အခတ်ရပ်စဲရေး ဆိုင်ရာ ညှိနှိုင်းရေး အဖွဲ့ (NCCT) ခေါင်းဆောင် နိုင်ဟံသာ က အစိုးရနှင့် KIA တို့အကြား တိုက် ခိုက်မှုများ လျော့ကျရေး ဆွေးနွေး ဆောင်ရွက်နေချိန်တွင် တိုက်ပွဲများ ဆက်လက် ဖြစ်ပွားနေခြင်းသည် ကောင်းမွန်မှု မဟုတ်ကြောင်း၊ ပစ်ခတ် သေကြေမှုများကြောင့် စိတ်အနှောင့်အယှက် ဖြစ်ရကြောင်း၊ ထိုဖြစ်ရပ်ကြောင့် ငြိမ်းချမ်းရေး လုပ်ငန်းစဉ်များ အပေါ်လည်း မထိခိုက်စေလိုကြောင်း ဧရာဝတီ ကို ပြောသည်။
၎င်းက“ဒီဖြစ်ရပ်ကြောင့် ငြိမ်းချမ်းရေးကိုတော့ အထိုက်အလျောက် ထိခိုက်နိုင်တယ်၊ ယုံကြည်မှုကိုလည်း အများကြီးထိခိုက်စေ တယ်၊ တနိုင်ငံလုံး အပစ်အခတ်ရပ်စဲရေးကိုတော့ အနည်းအကျဉ်း ထိခိုက်စေတယ်၊ ဒါပေမယ့် အပစ်အခတ်ရပ်စဲရေးကိုတော့ မပျက် စေချင်ဘူး”ဟုလည်း ပြောဆိုသည်။
ကချင် ငြိမ်းချမ်းရေး ဖော်ဆောင်ရေး ကော်မတီမှ အရာရှိ ဦးလမိုင်ဂွန်ဂျာကလည်း ကချင် ခေါင်းဆောင်များနှင့် အစိုးရတို့ အကြား အပြန် အလှန် ယုံကြည်မှုရရှိရေးအတွက် အချိန်ပေး၍ အားထုတ် ကြိုးပမ်းထားရကြောင်း၊ ထိုယုံ ကြည်မှုအား ဆက်လက် အားကောင်း စေရန် လုပ်ဆောင်ရမည့်အစား ယခုကဲ့သို့ ပစ်ခတ်မှုများကြောင့် ခိုင်မာသည့် ယုံကြည်မှုရရှိရန် ခက်ခဲသွားမည်ဖြစ်ကြောင်း ဧရာဝတီ ကို ပြောသည်။
ဦးလမိုင်ဂွန်ဂျာ က“မနေ့က တရက်တည်းမှာတင် ၃ နေရာလောက် ပစ်ခတ်တယ်၊ လက်နက်ကြီးနဲ့ ပစ်တာပါ”ဟု ဆိုသည်။
KIA သင်တန်းသား ဗိုလ်လောင်းများ စစ်ရေးပြနေသည့် အချိန်တွင် လက်နက်ကြီး ၂ လုံးဖြင့် ပစ်ခတ်ခြင်း ဖြစ်ကြောင်း၊ ထိုပစ်ခတ်မှု နှင့် ပတ်သက်၍ တပ်မတော်၏ အကြီးအကဲများနှင့် အစိုးရ ငြိမ်းချမ်းရေး ဖော်ဆောင်ရေး အဖွဲ့ ခေါင်းဆောင် သမ္မတရုံး ၀န်ကြီး ဦးအောင်မင်း တို့ထံ စာပို့ မေးမြန်းထားကြောင်း သိရသည်။
မြန်မာနိုင်ငံ ငြိမ်းချမ်းရေး ပြန်လည်ထူထောင်ရေး ဗဟိုဌာန(MPC)မှ အစိုးရ၏ ငြိမ်းချမ်းရေးအကျိုးဆောင် ဦးလှမောင်ရွှေက စစ်ပွဲများ၊ ပဋိပက္ခ ဖြစ်စဉ်များ၌ မြန်မာ့ တပ်မတော်မှ ဖြစ်စေ၊ KIA က ဖြစ်စေ သေကြေကြခြင်း အပေါ် စိတ်မကောင်းကြောင်း၊ စစ်ပွဲများ၊ ပဋိပက္ခ ဖြစ်စဉ်များ၌ မတော်တဆ သေဆုံးမှုများ ရှိတတ်ကြောင်း၊ ထိုသို့ ဖြစ်ရပ်များအပေါ် စိတ်ရှည် သည်းခံကြရန် လိုအပ်ကြောင်း ပြောသည်။
ဦးလှမောင်ရွှေ က“လူအစုလိုက် သေကြတာ အခုမှ မဟုတ်ပါဘူး၊ အရင်ကလည်း ဖားကန့်မှာ KIA အဖွဲ့က ယမ်းဖောက်ခွဲလို့ လူ အစု လိုက် အများကြီးသေခဲ့တဲ့ ဟာတွေ ရှိခဲ့ပါတယ်၊ ဆိုလိုတာက စစ်ပွဲတွေ၊ ပဋိပက္ခတွေမှာ မတော်တဆမှုတွေ ရှိတတ်တယ် ဆိုတဲ့ သဘောပါ”ဟု ပြောဆိုသည်။
ထို့အတူ နှစ်ဦးနှစ်ဘက် ဆွေးနွေးပွဲများ၌ အကောင်းဆုံး ဖြစ်ရန် ဆောင်ရွက်သွားမည် ဖြစ်ကြောင်း၊ MPC ကိုလည်း ဖုန်းဆက် အကြောင်း ကြားထားကြကြောင်း၊ လက်ရှိ ဖြစ်စဉ်ကြောင့် ငြိမ်းချမ်းရေး ဆွေးနွေးများကို ထိခိုက်စေနိုင်သည်ဟု အတိအကျ မပြောလိုကြောင်း၊ အကောင်းဆုံး ဖြစ်ရန် ဆောင်ရွက်သွားမည် ဖြစ်ကြောင်းလည်း ဦးလှမောင်ရွှေ က ပြောသည်။
ပြည်တွင်း ငြိမ်းချမ်းရေး ရရှိရန် ယုံကြည်မှု တည်ဆောက်နေသည့် ကာလ၌ အစိုးရတပ်မတော် အနေဖြင့် စစ်ရေးအရ အလစ် အငိုက် ဖိအားပေး တိုက်ခိုက်နေမှုများသည် ငြိမ်းချမ်းရေးကို အမှန်တကယ် လိုချင်သည့် စိတ်ရင်းစေတနာ ရှိမရှိဆိုသည်ကို မေးခွန်း ထုတ်စရာ ဖြစ်နေကြောင်းနှင့်ယုံကြည်မှု တည်ဆောက်ရာတွင် အဟန့်အတား ကြီးမားစွာ ဖြစ်စေသည်ကို သတိပြုစေလိုကြောင်း  ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ(UNFC) ကလည်း ယနေ့ရက်စွဲဖြင့် ကြေညာချက် ထုတ်ပြန်၍ သတိ ပေး ထားသည်။
အစိုးရ တပ်မတော်၏ သူရဲဘောကြောင်သည့် လုပ်ရပ်အား ပြင်းပြင်းထန်ထန် ရှုတ်ချကြောင်းလည်း UNFC ၏ ကြေညာချက်၌ ဖော်ပြ ထားပြီး ၂၀၁၅ ရွေးကောက်ပွဲအလွန်မှသာ ဖွဲ့စည်းပုံ ပြင်မည်ဟု ဦးရွှေမန်း၏ ပြောဆိုမှုနှင့်လက်ရှိ တိုက်ခိုက်မှုတို့ တိုက်ဆိုင်နေခြင်း ကြောင့် စစ်ရေးနှင့်နိုင်ငံရေး ပူးပေါင်း ကြံစည်မှု တရပ်ဟုလည်း ယူဆနိုင်ကြောင်း ကြေညာချက် က ဆိုသည်။
ထို့အတူ တနိုင်ငံလုံး အပစ်အခတ်ရပ်စဲရေးနှင့်ပြည်သူ တရပ်လုံး လိုလားတောင့်တနေသော ပြည်တွင်း ငြိမ်းချမ်းရေး ဖြစ်စဉ်များ အတိမ်းအစောင်း၊ နှောင့်နှေး ကြန့်ကြာစေသော၊ လမ်းလွဲစေသော လုပ်ရပ်မှန်သမျှအား ပြတ်ပြတ်သားသား ဆန့်ကျင် သွားမည်ဟု လည်း UNFC က ဆိုထားသည်။
ထိုသို့ အစိုးရ စစ်တပ်နှင့် လက်နက်ကိုင်အဖွဲ့ တို့အကြား နှစ်ဦး နှစ်ဘက် တင်းမားနေသည့်အတွက် ဆက်လက် လုပ်ဆောင်မည့် ငြိမ်းချမ်းရေး လုပ်ငန်းစဉ်များနှင့် တနိုင်ငံလုံး အပစ်အခတ် ရပ်စဲရေး လက်မှတ်ရေးထိုးပွဲ ဖြစ်လာနိုင်ခြေ ရှိမရှိ ဆိုသည်ကိုလည်း စောင့်ကြည့်ရမည် ဖြစ်သည်ဟု ဆိုသည်။
ပြည်တွင်း တိုက်ပွဲများ ပြေလည်ရန် KIO ဗဟိုကော်မတီနှင့် အစိုးရ ပြည်ထောင်စု ငြိမ်းချမ်းရေး ဖော်ဆောင် ရေး လုပ်ငန်းကော်မတီ တို့ အကြိမ်ကြိမ်တွေ့ဆုံခဲ့ပြီး ၂၀၁၄ ခုနှစ် မေလ ၁၃ ရက်တွင် စစ်ရှိန် လျှော့ချ၍ ယုံကြည်မှု အပြန်အလှန်တည်ဆောက်ရန်လည်း သဘောတူညီထားပြီး နှစ်ဘက် ကိုယ်စားလှယ်များ ပါဝင် သည့် ပဋိပက္ခညှိနှိုင်းဖြေရှင်းရေးအဖွဲ့တဖွဲ့ကိုလည်း ဖွဲ့စည်းခဲ့သည်။
ထိုအဖွဲ့က တွေ့ဆုံမှုများ လစဉ်ပြုလုပ်ခဲ့ပြီး ၆ ကြိမ်မြောက် တွေ့ဆုံခဲ့သည့် စက်တင်ဘာလ ၅ ရက်တွင် တပ်မတော်နှင့် KIA အကြား တိုက်ပွဲများ ၉၀ ရာခိုင်နှုန်းခန့် လျော့ကျသွားပြီဖြစ်ကြောင်း ကြေညာခဲ့သည်။
ထို့နောက် ရှမ်းပြည်နယ်မြောက်ပိုင်း၊ ကချင်ပြည်နယ် နယ်စပ်၊ နှင့် ဗန်းမော်ခရိုင် အတွင်းရှိ KIA တပ်များနှင့် တပ်မတော်အကြား တိုက်ပွဲများ ပြန်လည်ဖြစ်ပွားခဲ့သည်။
ခင်ဦးသာ နှင့် နန်းလွင်နှင်းပွင့် ပူးပေါင်း ရေးသားသည်။
by- irrawaddy

အစိုးရတပ်လက်နက်ကြီးကြောင့် သေဆုံးသည့် ဗိုလ်လောင်းများထဲတွင် ချင်းတပ်မတော်မှ ဗိုလ်လောင်း နှစ်ဦး ပါဝင်

 

 

 

 

 

 

 

 

 

 

 

 

 

 

 

 

 

သတင်း - ခိုနူမ်းထုန် သတင်းဌာန

အစိုးရတပ်မတော်မှ ပစ်ခတ်လိုက်သော လက်နက်ကြီးကြောင့် သေဆုံးခဲ့ကြသည့် KIO စစ်သင်တန်းကျောင်းမှ ဗိုလ်လောင်း ၂၃ ဦးထဲတွင် ချင်းအမျိူးသားတပ်မတော် CNA မှ ဗိုလ်လောင်း ၂ ဦးလည်းပါဝင်သည်ဟုသိရ သည်။
ကချင်လွတ်လပ်ရေး တပ်မတော်(KIA) ဌာနချုပ်၌ ဗိုလ်လောင်းသင်တန်းတက်ရောက် နေသော သင်တန်းသားများသည် နိုဝင်ဘာလ ၁၉ ရက်နေ့က စစ်ရေးပြ လေ့ကျင့်နေချိန်တွင် ကေအိုင်အိုဗဟိုဌာနချုပ် တည်ရှိ ရာ လိုင်ဇာ မြို့အနီး ခရာတောင် ကုန်း၌ တပ်စွဲထားသော အစိုးရ တပ်က လက်နက်ကြီးဖြင့် ပစ် ခတ်ခဲ့မှုကြောင့် ဗိုလ်လောင်း ၂၃ဦး သေဆုံးကာ သင်တန်း နည်းပြအပါအ၀င် သင်တန်းသား ၂၀ ဦး ဒဏ်ရာရရှိခဲ့ကြသည်။

ယင်းသေဆုံးသည့် ဗိုလ်လောင်း ၂၃ ဦးထဲတွင် ချင်းအမျိူးသားတပ်မတော်မှ စေလွှတ်ထားသော တပ်ကြပ် Biak Tin Lian နှင့် တပ်ကြပ် Ram nghak တို့ နှစ်ဦး ပါဝင်သည်ဟု ချင်းအမျိူးသားတပ်မတော်အရာ ရှိတစ်ဦးကပြောသည်။
အစိုးရတပ်မတော်မှ ပစ်ခတ်လိုက်သော လက်နက်ကြီးကြောင့် ဗိုလ်လောင်းသင်တန်းသား စုစုပေါင်း ၄၀ ကျော်အနက် ၂၀ ဦးမှာ ပွဲချင်းပြီးသေဆုံးကာ ဒဏ်ရာရသူ များထဲမှ ၃ ဦး ထပ်မံသေဆုံးခဲ့၍ စုစုပေါင်း ၂၃ ဦး သေဆုံးသွားခြင်း ဖြစ်သည်။
အဆိုပါကိစ္စကို ပြင်းပြင်းထန်ထန် ကန့်ကွက်ကြောင်း ယနေ့ နိုဝင်ဘာလ ၂၀ တွင် ကေအိုင်အိုက ကြေညာ ချက်တရပ် ထုတ်ပြန်လိုက်ပြီး ကေအိုင်အို ဌာနချူပ် အနီးပတ်ဝန်းကျင်တွင် မြန်မာ့တပ်မတော် တပ်စခန်းများ အလွန်နီးကပ်စွာ တပ်စွဲထားကာ မိမိတို့ တပ်စခန်းဘက်သို့ ရန်လိုသည့်သဘောဖြင့် ပစ်ခတ်ခြင်းဖြစ်သည်ဟု ယူဆရကြောင်း KIO ၏ ကြေညာချက်တွင်ဖော်ပြထားသည်။
ထို့ကြောင့် မြန်မာ့တပ်မတော်အနေဖြင့် ကေအိုင်အို ဌာနချူပ် နှင့် နီးကပ်စွာဖြန့်ကြက်ထားသော ခရာဘွမ်တောင်ကြော တလျောက်မှ ၎င်းတို့၏ လက်နက်ကြီးများ ဖယ်ရှားပေးရန် နှင့် တပ်စခန်းများကို ရုပ်သိမ်းပေးရန် KIO က တောင်းဆိုထားသည်။

ဦးအောင်သောင်း၏ ပြည်နယ် အမည် ပြောင်းခြင်း အဆို စိတ်ဝမ်းကွဲမှု ပိုများနိုင်ဟု သျှမ်း အမတ်ပြော

 သတင်း - သျှမ်းသံတော်ဆင့်သတင်း

ပြည်နယ်များ အမည်ကို မြို့များ အမည်ဖြင့် ပြောင်းလဲရန် လွှတ်တော်အတွင်း ဦးအောင်သောင်း၏ အကြံပြု ချက်သည် တိုင်းရင်းသား အကြား အမြင် မတူ စေမှုများပြား လာနိုင်စေပြီး စိတ်ဝမ်းကွဲမှုလည်း ပိုမိုဖြစ်စေ နိုင်ကြောင်း သျှမ်းပါတီ များက ပြောသည်။
ပြည်နယ် ရ ခု၏အမည်ကို လက်ရှိလူမျိုးစုနာမည်အစား မြို့တော်များ၏ အမည်အဖြင့် ပြောင်းလဲရန် နိုဝင်ဘာ ၁၇ ရက် ပြည်ထောင်စုလွှတ်တော်၌ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ပြည်သူ့ လွှတ်တော်ကိုယ်စားလှယ် ဦးအောင်သောင်းက အကြံပြုချက်တင်သွင်းလိုက်ခြင်းဖြစ်သည်။

“တိုင်းရင်းသားတွေကြားထဲမှာပိုပြီးသွေးဝမ်းကွဲတာဖြစ်မယ်။ အမြင်မတူတာတွေဖြစ်လာမယ်။ စိတ် ဝမ်းကွဲမှုတွေ ပိုမိုကြီးထွားလာစေတဲ့ အတွက်ကြောင့် တိုင်းရင်းသားစည်းလုံးညီမှုကို ထိခိုက်စေ နိုင်တဲ့ အတွက် မတင်သင့်ဘူးလို့ ကျနော့်အနေနဲ့ ယူဆတယ်” ဟု  သျှမ်းတိုင်းရင်းသားများ ဒီမိုကရက်တစ် ပါတီ (SNDP) ပြည်သူ့လွှတ်တော်ကိုယ်စားလှယ် စိုင်းသီဟကျော်က ပြောသည်။
လက်ရှိဖြစ်ပေါ်နေသော နိုင်ငံရေးပြဿနာသည် တိုင်းရင်းသားလူမျိုးနာမည်တွေကြောင့် ဖြစ်သည့် ပြဿနာမဟုတ် သည့်အတွက် လတ်တလောအခြေအနေမှာ နာမည်ပြဿနာထက် ပြည်နယ်နှင့်တိုင်း ခွဲခြားထားသည့် ကိစ္စကို ပြောသင့်ကြောင်း ဦးအောင်သောင်း၏ အကြံပြုချက်ကို လွှတ်တော်တွင် ကန့်ကွက်ထားသည့် စိုင်းသီဟကျော်ကဆိုသည်။
သျှမ်းတိုင်းရင်းသားများဒီမိုကရေစီအဖွဲ့ချုပ် (SNLD) အထွေထွေအတွင်းရေးမှုးဦးစိုင်းညွန့်လွင်က “ သူ့ သမိုင်းနဲ့သူလာတယ်။ ဒေသတွေကသျှမ်းဆိုလည်းသျှမ်း ၊ကချင်ဆိုလည်းကချင်ပေါ့။   ပြည်ထောင်စု ပေါင်း တုန်းကလဲ သျှမ်းပြည်နယ်ပေါင်းခဲ့တာပဲ။ အခုကျမှ ဒါတွေကိုဖျောက်ဖျက်ပစ်လို့မရဘူးလေ ပြဿနာတွေ အများကြီးဖြစ်ကုန်မှာပေါ့ ” ဟု ပြောသည်။
ဖွဲ့စည်းပုံအခြေခံဥပဒေအခန်း(၂) နိုင်ငံတော်ဖွဲ့စည်းတည်ဆောက်ပုံ၊ ပုဒ်မ ၄၉ တွင်ပါရှိသော ပြည် နယ် ရ ခု ၊တိုင်း ရ ခုနှင့်ပြည်ထောင်စုနယ်မြေများကို ပိုင်ခြားသတ်မှတ်ခြင်း တွင်  ဦးအောင်သောင်း က ပြည်နယ်ခုနစ်ကို လူမျိုးစုအမည်အစားမြို့တော်အမည်များဖြင့်ပြောင်းလဲရန် အကြံပြုထားကြောင်း အောက်တိုဘာ ၂၂ ရက် ပြည်ထောင်စုလွှတ်တော်သို့ တင်ပြသည့် ဖွဲ့စည်းပုံအခြေခံဥပဒေ ပြင်ဆင်ရေး အကောင်အထည်ဖော်မှု ကော်မတီ၏ အစီရင်ခံစာပါရှိသည်ဟု 7 day နေ့စဉ် သတင်းစာတွင် ဖော်ပြထား သည်။
“ဖွဲ့စည်းပုံကိုပြင်ပြီးမှ ဖြစ်မှာပါ ဖွဲ့စည်းပုံမပြင်ဘဲနဲ့ ဒီကိစ္စကိုလုပ်လို့မရပါဘူး။ ဖွဲ့စည်းပုံထဲမှာလဲ ပါပြီး သား။ ဒေသတွေရဲ့ နာမည်ပြောင်းမယ်ဆိုရင် ပြည်သူတွေရဲ့ ဆန္ဒကိုရယူမှသာ ပြင်ရမယ်ဆိုတဲ့ အချက်ပါပြီး သား။ ဒါပြင်နိုင်တယ် မပြင်နိုင်ဘူးဆိုတာ ပြည်သူတွေရဲ့ သဘောကိုယူသင့်တယ်” စိုင်းသီဟကျော်က ဆိုသည်။
၂၀၀၈ အခြေခံဥပဒေ၊ အခန်း ၁ ပုဒ်မ ၉ (ဂ) တွင် တိုင်းဒေသကြီးတစ်ခုခု၏အမည်ကိုဖြစ်စေ၊ ပြည်နယ်တစ် ခုခု၏အမည်ကိုဖြစ်စေပြောင်းလဲသတ်မှတ်လိုလျှင် သက်ဆိုင်ရာတိုင်းဒေသကြီး သို့မဟုတ် ပြည်နယ်အတွင်းနေ ထိုင်ကြသော နိုင်ငံသားများ၏ ဆန္ဒရယူပြီးဥပဒေပြဌာန်းခြင်းဖြင့် ပြောင်းလဲသတ်မှတ်ရမည်ဟုဖော်ပြထားသည်။

အစိုးရတပ်ပစ်ခတ်မှုကြောင့် ဗိုလ်လောင်း ၂၃ ဦးသေ ၂၀ ဦးဒဏ်ရာရရှိမှုအပေါ် KIA ရှုတ်ချ

အစိုးရ စစ်တပ်၏လက်နက်ကြီး ပစ်ခတ်မှုကြောင့် ကချင်လွတ်မြောက်ရေးတပ်ဖွဲ့ (KIA) ဗိုလ်လောင်း သင်တန်းသား ၂၃ ဦး ထိခိုက်သေဆုံးမှု ရှိနေပြီး သင်တန်းနည်းပြ အရာရှိများနှင့်သင်တန်းသားများ စုစုပေါင်း ၂၀ ဦး ဒဏ်ရာရရှိသည့် အစိုးရစစ်တပ်၏ လုပ်ရပ်အပေါ် ပြင်းပြင်းထန်ထန်ကန့်ကွက်ကြောင်း နိုဝင်ဘာလ ၂၀ ရက်တွင် KIO က ပြောဆိုလိုက်သည်။

“ဒီလိုဖြစ်စဉ်ဟာ တဖက်မှာ ငြိမ်းချမ်းရေး လမ်းကြောင်းကို သွားနေပေမဲ့ စစ်ရှိန်ကို လျှော့ချနိုင်ဖို့ ကြိုးပမ်းနေပေမဲ့ ဒီလိုမျိုး ပစ်ခတ်မှုဟာ ကေအိုင်အို ဗိုလ်သင်တန်းကြောင်းကိုရည်ရွယ်ချက်ရှိရှိတဲ့ ပစ်ခတ်တိုက်ခိုက်မှု ဖြစ်ပေါ်လာမှု အပေါ်မှာ ကျနော်တို့ ကေအိုင်အို ဗဟိုကနေ ပြင်းပြင်းထန်ထန် ရှုတ်ချတယ်” ဟု ဦးလာနန် က ပြောသည်။

နိုဝင်ဘာလ ၁၉ ရက်က ခရာဘွမ်တောင် (Hka Ya Bum) ရှိ အစိုးရ၏ ခမရ တပ်ရင်း ၃၈၉ မှ ပစ်ခတ်လိုက်သော လက်နက်ကြီး ပစ်ခတ်မှုကြောင့် သေဆုံးသွားသူ သင်တန်းသား ၂၃ ဦး ရုပ်အလောင်းကိုယနေ့ နံနက် ၈ နာရီတွင် စစ်ရေးအခမ်းအနားဖြင့် သဂြိုလ်လိုက်ပြီ ဖြစ်ကြောင်း ဦးလာနန် က ပြောသည်။

ယနေ့ နိုဝင်ဘာလ ၂၀ ရက်တွင် KIO က ပုံမှန်လုပ်ငန်းများကို ရပ်ဆိုင်းထားခြင်း၊ အမျိုးသားအလံကို ထက်ဝက် လွင့်ထူထားခြင်း၊ ဘာသာရေးပေါင်းစုံကလည်း ဆုတောင်းဝတ်ပြုခြင်းအခမ်းအနားများ ပြုလုပ်ခြင်းဖြင့် ကျဆုံးသွားသော ရဲဘော်များအတွက် ဝမ်းနည်းခြင်း အထိန်းအမှတ် ပြုလုပ်ခဲ့ကြသည်ဟု သူက ဆိုသည်။

စစ်ရှိန်လျော့ချနိုင်ရန် ကြိုးပမ်းနေချိန်တွင် မြန်မာတပ်မတော်မှ လက်နက်ကြီးဖြင့် KIA ၏ ဗိုလ်သင်တန်းကျောင်းအား ရည်ရွယ်ချက်ရှိရှိဖြင့် ပစ်ခတ်တိုက်ခိုက်မှုကို KIO ဗဟိုကော်မတီမှပြင်းပြင်းထန်ထန်ကန့်ကွက်ကြောင်း ထုတ်ပြန်ချက်က ဆိုသည်။

KIO က နိုဝင်ဘာလ ၂၀ ရက် ရက်စွဲဖြင့် ပြည်ထောင်စု ငြိမ်းချမ်းရေး လုပ်ငန်းဖော်ဆောင်ရေးကော်မတီ (UPWC) ဒုဥက္ကဌ ဦးအောင်မင်း ထံ စာတစောင် ပေးပို့လိုက်ပြီးဖြစ်ကြောင်းလည်း ပြောသည်။

KIO ၏ ငြိမ်းချမ်းအဖွဲ့ခေါင်းဆောင် ဦးဆွမ်းလွတ်ဂမ် လက်မှတ်ဖြင့် ပေးပို့သော စာကို ဦးအောင်မင်းထံ လက်ခံရရှိသည်ဟု သိရှိရသော်လည်း စာပါ အသေးစိတ်ကို မသိရသေးကြောင်း၊ ငြိမ်းချမ်းရေးတွေ့ဆုံဆွေးနွေးမှု ဆက်လက် လုပ်ဆောင်သွားမည် ဖြစ်ကြောင်း ငြိမ်းချမ်းရေးစင်တာ MPC မှ ဦးလှမောင်ရွှေ က ပြောသည်။

“ကျနော်တို့ ပဋိပက္ခတွေ ဖြေရှင်းတဲ့နေရာမှာတော့ ခုနလို စိတ်မကောင်းစရာ အဖြစ်အပျက်တွေ ကြုံနိုင်ပါတယ်။ ဒါပေမဲ့ ဒါတွေကို လျှော့ချပြီးတော့ တွေ့ဆုံဆွေးနွေးရေး စကားဝိုင်းမှာအဖြေရှာပြီးတော့ ရတဲ့အဖြေကို ပူးပေါင်း အကောင် အထည်ဖော်နိုင်ဖို့ အရေးကြီးတယ် ထင်ပါတယ်။ ဆွေးနွေးပွဲ ပျက်သွားလိမ့်မယ်လို့ မထင်မိပါဘူး” ဟု သူက ပြောသည်။

KIO အပါအဝင် တိုင်းရင်းသား လက်နက်ကိုင် အဖွဲ့အစည်းသည် တွေ့ဆုံဆွေးနွေး အဖြေရှာရေး လမ်းစဉ်အတိုင်း ဆက်လက် လုပ်ဆောင်မည် ဖြစ်ပြီး ငြိမ်းချမ်းရေး တွေ့ဆုံဆွေးနွေးမှုပယ်ဖျက်ရန် ဆန္ဒမရှိကြောင်း ဦးလာနန် က ပြောသည်။

“ကေအိုင်အိုရယ်၊ တိုင်းရင်းသားလက်နက်ကိုင်အဖွဲ့အစည်းအားလုံးရဲ့ သဘောထားကတော့ တွေ့ဆုံဆွေးနွေး အဖြေရှာရေး လမ်းစဉ်ပါ။ ဒီလမ်းစဉ်ကို ကျနော်တို့ သွားချင်ပါတယ်။ ဒီလိုသွားချင်တဲ့ဆန္ဒရှိပေမဲ့ မြန်မာအစိုးရစစ်တပ် အင်အား အလုံးအရင်းနဲ့ တက်လာဆဲပါ။ မနေ့က အဲဒီဖြစ်စဉ် တခုထဲနဲ့တော့ ဒီတွေ့ဆုံဆွေးနွေးရေးလမ်းကြောင်းကို ပယ်ဖျက်ဖို့သဘောဆန္ဒတော့ မရှိပါဘူး” ဟု သူက ပြောသည်။

UPWC နှင့် NCCT တို့ တစ်နိုင်ငံလုံး အပစ်အခတ် ရပ်စဲရေး ယခုလကုန်ပိုင်း သို့မဟုတ် ဒီဇင်ဘာလဆန်းပိုင်းတွင် တွေ့ဆုံဆွေးနွေးရန် အစီအစဉ်ရှိသော်လည်း ယခုကဲ့သို့ KIA အပေါ်ပစ်ခတ်မှုများ ရှိလာသဖြင့် ဆွေးနွေးမှု ရွှေ့ဆိုင်းသွားနိုင်မည်ဟု NCCT ခေါင်းဆောင် နိုင်ဟံသာ က ပြောသည်။

“ပစ်ခတ်တိုက်ခိုက်ဖို့ အနေအထားကို လျှော့ချဖို့ ကော်မတီတွေ ဖွဲ့ပြီးတော့ လုပ်ဆောင်နေတယ်။ ကျနော်တို့လည်း NCCT အနေနဲ့ ဆွေးနွေးနေတဲ့ ကာလမှာ အခုလို စစ်ရေးဘက်ကတိုးချဲ့တယ်ဆိုတော့ ဒါက တပြည်လုံး အပစ်အခတ် ရပ်စဲရေးနဲ့ ငြိမ်းချမ်းရေးကို မလိုလားတဲ့သဘောလား။ ဖျက်ဆီးတဲ့ သဘောတက်ရောက်နေတယ်လို့ ခန့်မှန်းလို့ ရနိုင်တယ်။ ဒါက လူထုအနေနဲ့ စဉ်းစားဖို့ လိုနေတယ်” ဟု သူက ပြောသည်။

ယခုဖြစ်စဉ်သည် KIO ဗဟိုဌာနချုပ်အနီး မြန်မာ့တပ်မတော် တပ်စခန်းများ နီးကပ်စွာတပ်စွဲထားကာ လက်နက်ကြီးများ ဖြန့်ကြက် ချထားပြီး မိမိတို့ တပ်စခန်းဘက်သို့ ရန်လိုသောသဘောဖြင့် ပစ်ခတ်ခြင်းဖြစ်သည်ဟု ယူဆကြာင်း၊ တစ်နိုင်ငံလုံး အပစ်အခတ် ရပ်စဲရေးညှိနှိုင်းရေးအဖွဲ့ (NCCT) နှင့် UPWC တို့ ငြိမ်းချမ်းရေးလုပ်ငန်းစဉ်များ အောင်မြင် နိုင်ရေးအတွက် KIO ဗဟိုဌာနချုပ်အနီးရှိ ခရာဘွမ် (Hka Ya Bum) တောင်ကြောတလျှောက်မှ လက်နက်ကြီးများ ဖယ်ရှားပေးရန်နှင့် ယင်းစစ်စခန်းများကိုလည်း ရုပ်သိမ်းပေးရန် တောင်းဆိုထားသည်။

ယနေ့ တိုက်ပွဲ ထပ်မံ ဖြစ်ပွားမှု ရှိမရှိ သတင်းမရရှိသေးသော်လည်း အစိုးရ စစ်တပ်က လိုင်ဇာဗဟိုဌာနချုပ်အနီးလက်နက်ကြီးများနှင့်အတူ စစ်အင်အားအလုံးအရင်း တိုးမြင့်ထားဆဲဖြစ်သည်ဟု သူက ဆိုသည်။
By; KNG

တိုင်းရင်းသား ခေါင်းဆောင်များ ဆွေးနွေးပွဲ ထိုင်းစစ်တပ် ခွင့်ပြုချက် ရရန်လိုလာ

၂၀၁၃ ခုနှစ် ချင်းမိုင်မြို့မှာ ပြုလုပ်တဲ့ အပစ်အခတ် ရပ်စဲရေး ဆွေးနွေးပွဲတခု မြင်ကွင်း (ဓာတ်ပုံ – ကျော်ခ / ဧရာဝတီ)

ထိုင်းနိုင်ငံအတွင်း တိုင်းရင်းသား လက်နက်ကိုင် အဖွဲ့တွေရဲ့ အစည်းအဝေးတွေ ပြုလုပ်မယ် ဆိုပါက ထိုင်းစစ်တပ်ကို အကြောင်းကြား ခွင့်ပြုချက် ရယူရမယ်ဆိုပြီး အကြောင်းကြားလာတယ်လို့ တိုင်းရင်းသား လက်နက်ကိုင် ခေါင်းဆောင်တွေက ပြောပါတယ်။
“အစည်းအဝေးလုပ်မယ် ဆိုရင် နေရာ၊ ပါဝင်မယ့် ပုဂ္ဂိုလ်၊ ဆွေးနွေးမယ့် ခေါင်းစဉ် စတာတွေကို စာနဲ့ရေးပြီး တင်၊ ခွင့်ပြုချက်ရမှ လုပ်ပါဆိုတဲ့ အကြောင်းကို ထိုင်းထောက်လှမ်းရေး အဖွဲ့တွေက တဆင့် အကြောင်းကြား လာပါတယ်” လို့ ညီညွှတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) ရဲ့ အထွေထွေ အတွင်းရေးမှူး (၁) ဗိုလ်မှူးကြီး ခွန်ဥက္ကာက ဧရာဝတီကို ပြောပါတယ်။
အရင်က ထိုင်းနိုင်ငံအတွင်း တိုင်းရင်းသား လက်နက်ကိုင် တော်လှန်ရေး ခေါင်းဆောင်တွေ အနေနဲ့ အစည်းအဝေးတွေ ကျင်းပပြုလုပ်ရာမှာ သက်ဆိုင်ရာမြို့နယ် အာဏာပိုင်တွေနဲ့ ထိုင်းထောက်လှမ်းရေး အဖွဲ့တွေကို အသိပေး အကြောင်းကြားပြီး ပြုလုပ်ခဲ့ရတာ ဖြစ်ပေမယ့် အခုအချိန်မှာတော့ ထိုင်းစစ်တပ်ကို အကြောင်းကြားပြီး ခွင့်ပြုချက်ကျလာမှ လုပ်ရတော့မှာ ဖြစ်တယ်လို့ ၎င်းက ဆိုပါတယ်။
အစည်းအဝေး မပြုလုပ်ခင် တိုင်းရင်းသား တော်လှန်ရေး အဖွဲ့တွေ အနေနဲ့ အစည်းအဝေး ပြုလုပ်ရမယ့် အကြောင်းအရင်း၊ ပြုလုပ်မယ့် နေရာနဲ့ တက်ရောက်မယ့် သူတွေကို ထိုင်းနိုင်ငံ မြောက်ပိုင်း တပ်မ ၃ စစ်ဒေသကို ကြိုတင် တင်ပြရမှာဖြစ်ပြီး ခွင့်ပြုချက် ကျလာမှသာ လုပ်ကိုင်ခွင့်ရတော့မှာ ဖြစ်တယ်လို့ ဗိုလ်မှူးကြီး ခွန်ဥက္ကာက ဆက်ပြောပါတယ်။
ခွင့်ပြုချက် ရပြီးလို့ အစည်းအဝေး လုပ်ချိန်မှာ တိုင်းရင်းသား အဖွဲ့အစည်းတွေရဲ့ ဆွေးနွေးပွဲတွေထဲကို ထိုင်းစစ်တပ်က စေလွှတ်တဲ့ ကိုယ်စားလှယ် နှစ်ဦးကို ဝင်ရောက် နားထောင် မှတ်တမ်းယူခိုင်းမှာ ဖြစ်ပြီး ရရှိတဲ့ အချက်အလက်တွေကို မြန်မာ အစိုးရဘက်ကို ပြန်တင်ပို့ကြမယ်ဆိုတဲ့ အကြောင်းကို တိုင်းရင်းသား ခေါင်းဆောင် အချိူ့ဆီက ကြားသိရပေမယ့် NCCT နဲ့ UNFC ခေါင်းဆောင်တွေက ဒီကိစ္စအပေါ် အတည်ပြု ပြောဆိုတာမျိုး မရှိသေးပါဘူး။
ဒီဆုံးဖြတ်ချက်ကို နိုဝင်ဘာလ ၁၃ ရက်က ထိုင်းနိုင်ငံ မြောက်ပိုင်း ဖိစပ်နုလို့မြို့မှာ ပြုလုပ်တဲ့ ထိုင်း တပ်မ ၃ စစ်ဒေသရဲ့ တပ်မှူးများ အစည်းအဝေးကနေ ဆုံးဖြတ်ချက် ချလိုက်တာ ဖြစ်တယ်လို့ လာရောက် အကြောင်းကြားတဲ့ ထိုင်းထောက်လှမ်းရေး အဖွဲ့က ပြောဆိုသွားတယ်လို့ သိရပါတယ်။
ထိုင်းစစ်တပ်ရဲ့ အခုလို လုပ်ဆောင်မှုဟာ စည်းမျဉ်းစည်းကမ်း တခုအရ လုပ်တာလို့ ယူဆရပြီး တိုင်းရင်းသား လက်နက်ကိုင် ခေါင်းဆောင်တွေရဲ့ ထိုင်းနိုင်ငံအတွင်း ပြုလုပ်မယ့် အစည်းအဝေးတွေအပေါ် ထိခိုက်မှု ကြီးကြီးမားမား ရှိလိမ့်မယ်လို့ မယူဆကြောင်း ဗိုလ်မှူးကြီး ခွန်ဥက္ကာက ပြောပါတယ်။
တနိုင်ငံလုံး အပစ်အခတ် ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) ဟာ မြန်မာအစိုးရနဲ့ တနိုင်ငံလုံးဆိုင်ရာ အပစ်အခတ် ရပ်စဲရေး ဆွေးနွေးဖို့အတွက် လာမယ့် နိုဝင်ဘာလ ၂၆ ရက်မှာ ထိုင်းနိုင်ငံမြောက်ပိုင်း ချင်းမိုင်မြို့၌ ပြုလုပ်ဖို့ စီစဉ်ထားပြီး အဆိုပါ အစည်းအဝေး ကျင်းပဖို့ အတွက်လည်း ထိုင်းတပ်မ ၃ စစ်ဒေသကို အကြောင်းကြားထားပြီး ဖြစ်တယ်လို့ သိရပါတယ်။
အခုလို တင်းကြပ်မှုတွေ ရှိလာတာဟာ တိုင်းရင်းသား လက်နက်ကိုင် တော်လှန်ရေး အဖွဲ့အစည်းတွေအပေါ် ဖိအားပေးသလို ဖြစ်စေပြီး ငြိမ်းချမ်းရေး လုပ်ငန်းစဉ်တွေ အတွက် ကြိုတင်ပြင်ဆင်မှုတွေ ပြုလုပ်ရာမှာ နှောင့်နှေး ကြန့်ကြာမှုတွေ ရှိလာနိုင်တယ်လို့ UNFC ဒုဥက္ကဋ္ဌ နိုင်ဟံသာက ပြောပါတယ်။
“ ဒါက တနည်းအားဖြင့်တော့ ဖိအားပေးတဲ့ သဘောလည်း ဖြစ်တယ်။ နောက် အန်ကယ်တို့ အချင်းချင်း တွေ့ဆုံညှိနှိုင်းဖို့ မလွတ်လပ်တော့ နှေးကွေးတာပေါ့” လို့ နိုင်ဟံသာက ဧရာဝတီကို ပြောပါတယ်။
ထိုင်းနိုင်ငံ ဝန်ကြီးချုပ်၊ ဒုဝန်ကြီးချုပ်နဲ့ ထိပ်ပိုင်း ခေါင်းဆောင်အချို့ဟာ အောက်တိုဘာ ဒုတိယ အပတ်မှာ မြန်မာနိုင်ငံကို သွားရောက်ခဲ့ပြီး နေပြည်တော်မှာ သမ္မတ ဦးသိန်းစိန်၊ ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့နဲ့ တွေ့ဆုံခဲ့ကြပါတယ်။
အခုနှစ် ဇူလိုင်လပိုင်းကလည်း ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ ထိုင်းနိုင်ငံကို လာရောက်ခဲ့ပြီး လက်ရှိဝန်ကြီးချုပ် ပရာရွတ်ချန်အိုချာနဲ့ တွေ့ဆုံခဲ့ပြီး နှစ်နိုင်ငံ စစ်တပ်အကြား ပူးပေါင်း လုပ်ဆောင်ရမယ့် အရေးတွေ ဆွေးနွေးခဲ့ကြတယ်လို့ ထိုင်းသတင်းတွေမှာ ဖော်ပြခဲ့ပါတယ်။
NCCT နဲ့ UPWC တို့ တနိုင်ငံလုံးဆိုင်ရာ အပစ်အခတ် ရပ်စဲရေး ဆွေးနွေးမှုတွေကို ပြီးခဲ့တဲ့ စက်တင်ဘာလက ရန်ကုန်မြို့မှာ ပြုလုပ်ခဲ့ကြပြီး ထူးခြားတဲ့ ရလာဒ်တွေ ထွက်ပေါ်မလာတာကြောင့် အခုလို တင်းကြပ်မှုတွေ ဖြစ်လာတာလို့ တိုင်းရင်းသား လက်နက်ကိုင် လက်နက်ကိုင် တော်လှန်ရေး ခေါင်းဆောင် အချို့က သုံးသပ် ပြောဆိုနေကြပါတယ်။
ထိုင်းစစ်တပ် အနေနဲ့ အခုလို လုပ်ဆောင်လာတာဟာ ထိုင်းနိုင်ငံ ထိပ်ပိုင်း ခေါင်းဆောင်တွေနဲ့ မြန်မာ ခေါင်းဆောင်တွေ အကြား တွေ့ဆုံမှုတွေ ရှိလာပြီးနောက်ပိုင်း ဖြစ်ပေါ်လာတာကြောင့် မြန်မာခေါင်းဆောင်တွေရဲ့ ဖိအားပေးမှုတွေကြောင့် အခုလို တင်းကျပ်မှုလုပ်လာတာ ဖြစ်နိုင်တယ်လို့ တိုင်းရင်းသား ခေါင်းဆောင်တွေက ယူဆနေပါတယ်။

အစိုးရတပ်ပစ်ခတ်သော လက်နက် ကြီးကြောင့် KIO ဗိုလ်လောင်း ၂၀ ပွဲချင်းပြီးသေ အများအပြား ဒဏ်ရာရ

 

သတင်း - KNG

ကချင်လွတ်မြေက်ရေးအဖွဲ့ KIO ဗဟိုဌာနချုပ် လိုင်ဇာသို့ ခရာတောင် (Hka Ya Bum) အခြေစိုက် အစိုးရ၏ ခမရ တပ်ရင်း ၃၈၉ တပ်မှ ပစ်ခတ်လိုက်သော ၁၀၅ မမ လက်နက်ကြီး ဗိုလ်လောင်းကျောင်းအတွင်း ကျရောက်ပေါက်ကွဲခဲ့သဖြင့် ဗိုလ်လောင်း ၂၀ ဦး ပွဲချင်းပြီး သေဆုံးခဲ့ကာ ၁၆ ဦး ဒဏ်ရာ ပြင်းပြင်းထန်ထန် ရရှိခဲ့သည်ဟု KIO ၏ ပြောရေးဆိုခွင့်ရှိသူ ဦးလာနန် က ပြောသည်။

နိုဝင်ဘာလ ၁၉ ရက် မွန်းလွဲ ၁၂ နာရီ ၃၆ မိနစ်တွင် လက်နက်ကြီးသည် အခြေခံ စစ်ရေးပြ လေ့ကျင့်နေချိန်တွင် ကျရောက်ခဲ့သဖြင့် အထိအခိုက် များပြားခဲ့ခြင်း ဖြစ်သည်။

“အစိုးရ ခမရ ၃၈၉ ကနေ ကျနော်တို့ရဲ့ ဗိုလ်လောင်းသင်တန်းရှိရာကို သေချာချိန်ပြီးတော့ ၁၀၅ မမနဲ့ ပစ်ခတ် လိုက်တယ်။ အဲဒီအချိန်မှာ အစုတစည်းဖြစ်နေတာကလည်း နေ့လည်ပိုင်းမှာ ဗိုလ်လောင်းတွေက အခြေခံ စစ်ရေးပြ လေ့ကျင့်နေတဲ့ အချိန်မှာ စစ်ရေးပြကွင်းမှာ လာထိမှန်တဲ့အတွက်ကြောင့် အထိအခိုက်များသွားတယ် လို့ ပြောလို့ ရတယ်” ဟု ဦးလာနန် က ပြောသည်။

ယနေ့ သေဆုံးသွားသော ဗိုလ်လောင်းများသည် အသက် ၁၈ နှစ်မှ ၂၁ နှစ် ပတ်ဝန်းကျင်ရှိ လူငယ်များဖြစ်ပြီး မနက်ဖြန်တွင် KIO တပ်မဟာအားလုံးတွင် ဝမ်းနည်းခြင်းအထိန်းအမှတ်နေ့အဖြစ် သတ်မှတ်၍ ဝမ်းနည်းခြင်း ၀တ်ပြုခြင်းပြုလုပ်သွားရန် ညွန်ကြားထားပြီး ဖြစ်ကြောင်း သူကပြောသည်။

နံနက် ၉ နာရီဝန်းကျင်က KIO ဗဟိုဌာနချုပ်မှ ၆ မိုင်အကွာအဝေးရှိ KIA တပ်ရင်း ၂၅၃ တပ်ဖွဲ့နှင့် အစိုးရ၏ ခမရ ၃၈၄တို့ နာရီဝက်ခန့်ကြာ တိုက်ပွဲ ဖြစ်ပွားခဲ့ပြီးနောက် ၁၂ နာရီ ၁၅ မိနစ်တွင် ဗန်းမော်မြို့နယ် ဂန်ဒေါင်ယန် (Gang Dau Yang) အခြေစိုက် အစိုးရ၏ ခမရ တပ်ရင်း ၃၉၀ မှ တိုက်ပွဲဖြစ်ပွားခဲ့သော နေရာသို့ ၁၀၅ မမ လက်နက်ကြီးဖြင့် ပစ်ခတ်ခဲ့သည်ဟု ဆိုသည်။

ထို့ပြင် ယနေ့ နံနက် ၄ နာရီဝန်းကျင်တွင် ကချင်ပြည်နယ် ဟိုပင်မြို့နယ် မိုင်းနောင်ဒေသ KIA ၏ တပ်မဟာ ၂ လက်အောက်ခံ တပ်ရင်း ၂၆ ၏ ရှေ့တန်းစခန်းကို အစိုးရ၏ ခလရ  တပ်ရင်း ၆ မှ ဝင်ရောက် တိုက်ခိုက်ခဲ့ သဖြင့် KIA ရဲဘော် တစ်ဦး ကျဆုံးခဲ့သလို၊ နံနက် ၇ နာရီ ပတ်ဝန်းကျင်တွင် နမ္မတီးဒေသရှိ KIA တပ်မဟာ ၂ လက်အောက်ခံ တပ်ရင်း ၁၁ ရဲဘော် နှစ်ဦးကိုအစိုးရ စစ်တပ်က ခြုံခိုတိုက်ခိုက်ခဲ့သဖြင့် KIA ရဲဘော် တစ်ဦး ကျဆုံးခဲ့ရာ စုစုပေါင်း KIA တပ်သား နှစ်ဦး ကျဆုံးခဲ့သည်ဟု ဦးလာနန်က ပြောသည်။

မြန်မာအစိုးရက ငြိမ်းချမ်းရေး လုပ်ဆောင်နေသည်ဟု ပြောဆိုနေသော်လည်း လက်တွေ့တွင် စစ်ရေးအရ ဖြေရှင်းနေသဖြင့် လက်ရှိ အစိုးရ အပေါ် အယုံအကြည် ရှိ၊ မရှိအဖြေထွက်လာလိမ့်မည်ဟု ဦးလာနန်က သုံးသပ်လိုက်သည်။

“အရင်ကတည်းက ရှိပြီးသား ရည်မှန်းချက်ကို အကောင်အထည်ဖော်တာပါ၊ အစိုးရက ငြိမ်းချမ်းရေးသွားနေပေမဲ့ လက်တွေ့မှာ ညှိနှိုင်း ဖြေရှင်းရေးကို အဓိကမထားဘဲ။ အမြစ်ပြတ်ချေမှုန်းရေးကို သွားနေပါတယ် ဆိုတာကို မီးမောင်းထိုး ပြတာပါ။ ကျန်တဲ့ တိုင်းရင်းသားအဖွဲ့ကိုလည်း ဒီပုံစံဘဲ သွားမှာပါ” ဟု သူက ပြောသည်။

မွန်းလွဲပိုင်းတွင်လည်း လဂျားယန် (Laja Yang) ၏တောင်ဘက် ဖုန်းပင်ဘွမ်ဘက်မှ အစိုးရ စစ်တပ်ဖွဲ့များ KIA ရှေ့တန်းစခန်းရှိရာ လိုင်ဇာဘက်သို့ ထိုးစစ်ဆင်လာသည်ဟု သတင်းရရှိကြောင်း သူကဆိုသည်။

ယနေ့ ပစ်ခတ်မှုနှင့် ပတ်သက်၍ ပြည်ထောင်စု ငြိမ်းချမ်းရေးလုပ်ငန်း ဖော်ဆောင်ရေးကော်မတီ ဒုဥက္ကဌ ဦးအောင်မင်း၊ ကချင်ပြည်နယ် အစိုးရအဖွဲ့၊ ပဋိပက္ခ ညှိနှိုင်းရေးအဖွဲ့နှင့်ငြိမ်းချမ်းရေးဆွေးနွေးမှုတွင် ပါဝင်ခဲ့သော ကုလသမဂ္ဂ အထူးကိုယ်စားလှယ် မစ္စတာ နမ်ဘီယာ၊ မစ္စ မာရီယန်၊  တရုတ်နိုင်ငံ သံသမန်ထံသို့ အကြောင်းကြားထားပြီး ဖြစ်ကြောင်း သူကပြောသည်။

ထိုပစ်ခတ်မှုနှင့် ပတ်သက်၍ ကချင်ပြည်နယ် အစိုးရရုံးသို့ မေးမြန်းခဲ့ရာ ပစ်ခတ်မှုနှင့် ပတ်သက်၍ သိရသော်လည်း အသေးစိတ် မသိသေးကြောင်း တာဝန်ရှိသူ တစ်ဦးက ပြောသည်။

ယခုကဲ့သို့ အစိုးရဘက်မှ ပစ်ခတ်လာသဖြင့် ငြိမ်းချမ်းရေး ဆွေးနွေးမှုများ ဖြစ်လာနိုင်မည် မဟုတ်ကြောင်း ကချင်ငြိမ်းချမ်းရေးအကျိုးဆောင်အဖွဲ့မှ ဦးလမိုင်ဂွမ်ဂျာ က KNG ကချင်သတင်းဌာန ကိုပြောသည်။

“လက်နက်ကြီး ၁၀၅ မမနဲ့ ပစ်တယ်။ မှန်ပြောင်းနဲ့ ကြည့်ပြီး ပစ်တယ်။ ခရာတောင်ကနေအားလုံး မြင်ရတော့ လူစုနေတဲ့နေရာမှာ တမင်ကို ချိန်ပြီး ပစ်လိုက်တာ” ဟု သူက ပြောသည်။ လက်ရှိ ခရာတောင်တွင် အစိုးရ၏ စစ်အင်အား ၄၀၀ ကျော်ရှိနေသည်ဟု KIA ၏ ရှေ့တန်းစခန်းမှ သတင်းရရှိသည်။

လက်ရှိ ဒဏ်ရာရသူ ၁၆ ယောက်ကို လိုင်ဇာဆေးရုံတွင် ဆေးကုသမှုခံယူနေပြီး ထိုအထဲမှ တစ်ဦးမှာ ဆေးရုံသို့ ပို့နေချိန် ထပ်မံ သေဆုံးခဲ့သဖြင့် စုစုပေါင်း ၂၁ ဦးသေဆုံးသွားပြီဖြစ်ကြောင်း သူက ပြောသည်။

နိုဝင်ဘာလ ၁၆ နှင့် ၁၇ ရက်များတွင်လည်း ဗန်းမော်ခရိုင် မန်စီမြို့နယ်အတွင်း KIA ၏ တပ်မဟာ ၃ လက်အောက်ခံ တပ်ရင်း ၁၂ နှင့် ၂၇ တို့နှင့် အစိုးရ စစ်တပ်တို့ တိုက်ပွဲ ဖြစ်ပွားခဲ့ပြီး KIA ဘက်မှ တစ်ဦး ကျဆုံးခဲ့သည်။

KAF ဖွဲ့စည်းခြင်းအပေါ် KNU နှင့် DKBA ကြေညာချက်များထုတ်ပြန်

 

 

 

 

 

 

 

 

 

 

 

 

 

 

သတင်း - မဇ္ဈိမသတင်းဌာန

ကရင်အမျိုးသားလက်နက်ကိုင် တော်လှန်ရေးတပ်ဖွဲ့ ၄ဖွဲ့က ကော်သူးလေတပ်မတော်(KAF)အဖြစ် အောက်တိုဘာလ ၁၃ရက် နေ့က ပြန်လည်ပေါင်းစည်းလိုက်သည့်အပေါ် ကရင်အမျိုးသားအစည်းအရုံး(KNU)နှင့် ဒီမိုကရေစီအကျိုးပြု ကရင့်တပ်မတော် (DKBA) တို့က ကြေညာချက်အသီးသီး ထုတ်ပြန်လိုက်သည်။
အောက်တိုဘာ ၁၄ရက်စွဲပါ ကေအဲန်ယူ၊ ကာကွယ်ရေးဌာန၏ ထုတ်ပြန်ကြေညာချက်တွင် KNLA နှင့် KNDO သည် ကေအဲန်ယူ ၏ နိုင်ငံရေးဦးဆောင်မှုအောက်တွင် တည်ရှိပြီး နိုင်ငံရေးပြဿာနာများကို နိုင်ငံရေးနည်းဖြင့် ဆက်လက်ဆွေးနွေး အဖြေရှာသွား မည်ဖြစ်သလို ၁၅ကြိမ်မြောက် ကွန်ဂရက်က ချမှတ်ထားသည့် ကရင်လက်နက်ကိုင်တပ်ဖွဲ့များ စည်းလုံးညီညွတ်ရေးကော်မတီ (Unity Committee for Karen Armed Groups) အနေဖြင့် အကောင်အထည်ဖော်သွားမည်ဖြစ်ကြောင်း ဖော်ပြထားသည်။

အဆိုပါကြေညာချက်နှင့် ပတ်သက်၍ KNLA စစ်ဦးစီးချုပ် ဗိုလ်ချုပ်ကြီးစောဂျော်နီက “ဒီလိုဖြစ်တဲ့အပေါ်မှာ KNU တစ်ခုလုံးကို ထိခိုက်သွားစရာအကြောင်းမရှိပါဘူး။ ဒီပြဿနာတွေက အသေးအမွှားလေးတွေပါ။ အချင်းချင်းတွေပဲ အမြင်မတူတာကို ပြန် လည်ညှိနှိုင်းသွားရမှာသာဖြစ်ပါတယ်”ဟု ကေအိုင်စီသို့ ပြောသည်။
အလားတူ DKBA က ကော်သူးလေတပ်မတော်(KAF) ဖွဲ့စည်းခြင်းကို အကြွင်းမဲ့ လက်ခံသော်လည်းထုတ်ပြန် ချက်ပါ စာသား နှင့် သဘောထားများအပေါ် အားလုံး သဘောတူမှုမရှိသော်လည်း ကရင်လက်နက် ကိုင်တပ်ဖွဲ့များ ငြိမ်းချမ်းစွာ ပြန်လည်ပေါင်း စည်းရေးအတွက် အောက်တိုဘာလ ၂၉ရက်နေ့တွင် စုကလိမြို့နယ်ခွဲရှိ၊ ဆုံဆည်းမြိုင်ရွာ(ကော့သူးမွဲခီး)၌ ကရင်လက်နက်ကိုင် တပ်ဖွဲ့များမှ တာဝန်ရှိသူများအား ဖိတ်ခေါ်ကာ ဆက်ဆွေးနွေးသွားရန်ရှိကြောင်း ရှင်းလင်းထုတ်ပြန်ထားသည်။
“ပြည်သူတွေ လိုလားချက်ကြောင့် အားလုံးသဘောတူ လက်မှတ်ထိုးထားတာပါ။ သဘောမတူတာတော့ မဟုတ်ပါဘူး။ ဆိုလို တာက အသေးစိတ် ညှိနှိုင်းဆွေးနွေးမှုတွေ မရှိသေးတဲ့အတွက်ကြောင့် ထုတ်ပြန်ချက် ထုတ်လိုက်တဲ့အပေါ်မှာ စာအရေးအသား အားနည်းချက်တွေ ရှိတဲ့သဘောကို ဆိုလိုခြင်းသာဖြစ်ပါတယ်”ဟု DKBA ဗျူဟာမှူး ဗိုလ်မှူးကြီးစောဆန်းအောင်က ပြောသည်။
ယခုလို ကရင်လက်နက်ကိုင်အဖွဲ့များ စုစည်းကာ KAF ဖွဲ့စည်းလိုက်ခြင်းအပေါ် ထောက်ခံကြောင်း၊ ကာကွယ်ရန်အတွက်သာ ဖြစ်ပြီး ကျူးကျော်ရန်မဟုတ်ကြောင်း၊ အဖွဲ့အား ပိုမိုကျစ်လစ်စေချင်ပြီး စစ်ရေးပူးတွဲ လေ့ကျင့်မှုများကို လုပ်စေချင်ကြောင်း ဖားအံမြို့နေ ၈၈ အရေးတော်ပုံကျောင်းသားဟောင်း ကရင်ပြည်သူတစ်ဦးက ၎င်း၏အမြင်ကို ပြောသည်။
ကော်သူးလေတပ်မတော် (Kawthoolei Armed Forces -KAF) ဖွဲ့စည်းအပြီး ထုတ်ပြန်သည့် သဘောတူညီ ချက်တွင် အမျိုး သားတန်းတူရေး၊ ကိုယ်ပိုင်ပြဌာန်းခွင့်နှင့် စစ်မှန်သော ဖက်ဒရယ်ပြည်ထောင်စုစနစ်ပေါ်ပေါက် ရေးအတွက် တိုင်းရင်းသားတပ် ပေါင်းစုများ၊ ပြည်သူများ၊ ပြည်တွင်းပြည်ပ ဒီမိုကရေစီအင် အားစုများဖြင့် လက်တွဲသွားမည်ဖြစ်ကြောင်း ဖော်ပြထားသည်။
၁၉၄၉ခုနှစ်အတွင်း ကရင်အမျိုးသားကာကွယ်ရေးတပ်(KNDO)သည် အင်းစိန်တိုက်ပွဲမှ ပြန်ဆုတ်ခွာသည့်အချိန် ကရင်လက် နက်ကိုင်တပ်များ ပြန်လည်စုစည်းပြီး Karen Armed Forces – KAF အဖြစ် ၁၉၄၉ခုနှစ် နှစ်ကုန်ပိုင်းတွင် တောင်ငူ၌ စတင်ဖွဲ့ စည်းပြီး ထိုစဉ်က စနစ်တကျ မဖွဲ့စည်းနိုင်ခဲ့ပေ။

အစိုးရ စစ်တပ်နှင့် KIA တပ်ရင်း ၆ တို့ အကြား အငြင်းပွား နယ်မြေမှ ရွာသားများအား တခြားသို့ တိမ်းရှောင် ခွင့်မပြု

 သတင်း - သျှမ်းသံတော်ဆင့်သတင်း

အစိုးရ စစ်တပ်နှင့် KIA တပ်ရင်း ၆ တို့ အကြား နယ်မြေ အငြင်းပွားရာ ဒေသဖြစ်သည့် ဖားကန့်မြို့နယ် ကင်ဆီဆိုင်း ရာဒေသ  အောင်ဘာလီ ကျေးရွာ ဒေသရှိ ဒေသခံ များအား အစိုးရ စစ်တပ်မှ တခြား ဒေသသို့ ထွက်ပြေးခွင့် မပြုကြောင်း  ကချင် ငြိမ်းချမ်းရေး ကွန်ယက် ဒေါ်ခေါန်ဂျာက ပြောသည်။
“ရွာထဲကိုအကုန်ပြန်ဝင်ခိုင်းတယ်”ဟု ၎င်းက ဆိုသည်။ အောက်တိုဘာ ၁၅ ရက် မနက် ၁၀ နာရီခန့်က အစိုးရစစ်တပ်နှင့်ဖားကန့်ဒေသခံ ဘာသာရေးဆရာများ နှင့်တွေ့ဆုံပြီး ရွာသားများရွှေ့ပြောင်းရေးကိစ္စနှင့် ပတ်သက်၍ ညှိနှိုင်းခဲ့ကြောင်း အောင်ဘာလီ ကျေးရွာဥက္ကဋ္ဌ  ဦးအားချူ ကပြောသည်။
ရွာသားများ ထွက်မပြေးရန်နှင့် ကျေးရွာကို ပြန်လည်ထိန်းသိမ်းရန် နှစ်ဖက်ညှိနှိုင်း ခဲ့ခြင်းဖြစ်ကြောင်း ဦးအာချူက ဆိုသည်။
တဖက်တွင်လည်း ရွာတွင်းသို့ အစိုးရစစ်တပ်ဝင်ရောက်အခြေချနေထိုင်မည်ကို  စိုးရိမ်လျက်ရှိကြောင်း ဒေသ ခံအချို့ က ဆိုသည်။
“အခုအခြေနေက ဗမာစစ်ကြောင်းက ဝင်ကိုဝင်မယ်လို့ပြောတယ်။ အောင်ဘာလီကို ဝင်လို့ရတယ် ပြန် ထွက်လို့မရတော့ဘူး။လမ်းတွေလည်းအားလုံး ပိတ်ထားတယ်”  ဟုအမည်မဖော်လိုသူ တစ်ဦး ကပြောသည်။
 ဥရုမြစ်အရှေ့ဘက်ခြမ်းရှိ အောင်ဘာလီကျေးရွာအနီးတဝိုက် တပ်စွဲထားသော KIA တပ်များ  ဖယ်ရှားရန် အစိုးရစစ်တပ် တပ်မ ၆၆ လက်အောက်ခံတပ်ရင်းတစ်ခုက အောက်တိုဘာလ ၁၄ ရက် တွင်နှုတ်ဖြင့် အကြောင်းကြားခဲ့ရာမှ ဒေသခံများ စိုးရိမ်မှုဖြစ်လာရခြင်းဖြစ်သည်။
ပြဿနာတစ်စုံတစ်ရာဖြစ်ပွားပါက ဒေသခံများတိမ်းရှောင်နိုင်ရန် ကျေးရွာအကျိုးပြုအဖွဲ့တစ်ခုဖြစ်သည့် ဖားကန့် အကျိုးဆောင်အဖွဲ့နှင့် ဘာသာရေးဆရာများက ကားများစီစဉ်ပေးမည်ဖြစ်ကြောင်း ဦးအာချူး ကဆိုသည်။
အောင်ဘာလီကျေးရွာတွင်အခြေချနေထိုင်သူ ၆၀၀ ၀န်းကျင်ခန့် ရှိသည်။

ရှမ်းတောင်ပိုင်းတွင် တိုက်ပွဲများကြောင့် ဒုက္ခသည်များကူညီရေး အခက်ကြုံ

ဝမ့်ဝပ် ဘုန်းကြီးကျောင်းရှိ ဒုက္ခသည်များကို ဇူလိုင်လ အတွင်းက တွေ့ရစဉ် ( ဓာတ်ပုံ – Hsen Pai Media / Facebook)

 

ရှမ်းပြည်နယ် တောင်ပိုင်းတွင် အစိုးရစစ်တပ်နှင့် ရှမ်းပြည်တပ်မတော်မြောက်ပိုင်း (SSPP/SSA) တို့အကြား  တိုက်ပွဲများ ဖြစ်ပွားလျက်ရှိရာ စစ်ဘေးရှောင်ဒုက္ခသည် ၂၀၀ ကျော်သည် ကျေးသီး မြို့နယ် ဖာဆောင် ကျေးရွာအုပ်စု ဝမ့်ဝပ်ဘုန်ကြီး ကျောင်းတွင် ခိုလှုံနေကြရပြီး စစ်ရေးတင်းမာနှင့် လုံခြုံရေး စိတ်မချရမှုတို့ကြောင်း ဒုက္ခသည်များ ကူညီရေး အခက်အခဲများ ကြုံတွေ့နေရကြောင်း သိရှိရသည်။
အစိုးရ စစ်တပ်နှင့် ရှမ်းပြည် တပ်မတော် မြောက်ပိုင်း (SSPP/SSA ) တို့အကြား ပြီးခဲ့သည့် ဇွန်လနှောင်းပိုင်းမှ စတင်၍ စစ်ရေးအခြေအနေ ပြန်လည် တင်းမာပြီး တိုက်ပွဲများ ပြန်လည် ဖြစ်ပွားလာသည့် အတွက် ဒေသခံပြည်သူ ၂၀၀ ကျော် သည် ဖာဆောင် ကျေးရွာအုပ်စု အနီးရှိ ဝမ့်ဝပ် ဘုန်းကြီးကျောင်းတွင် ထွက်ပြေးတိမ်းရှောင်နေရကြောင်း၊ လက်ရှိ အချိန်တွင် တိုက်ပွဲများ ရပ်တန့်နေသော်လည်း  စစ်ဘေးရှောင် ဒုက္ခသည်များကို သွားရောက် ကူညီရန် စစ်တပ်က တားဆီး ထားကြောင်း၊ ထို့ပြင် တိုက်ပွဲများ အချိန်မရွေး ပြန်လည် ဖြစ်ပွားနိုင်သဖြင့် အကူအညီပေးရေး ဆောင်ရွက်သူများ ဒုက္ခသည်များထံ သွားရောက်ရန် လုံခြုံရေး စိုးရိမ်မှုကြောင့် မသွားရဲကြဟု သိရှိရသည်။
“ဒုက္ခသည်တွေကို သွားကူညီဖို့ အတွက် အရမ်းကို ခက်ခဲနေတယ်။ လမ်းမကြီးမှာ တိုက်ပွဲတွေ ဘယ်အချိန် ပြန်ဖြစ်မယ် ဆိုတာ မသိဘူး။ တချို့ကျေးရွာက ရွာသားတွေကို စစ်တပ်က ရွာပြင် ပေးမထွက်ဘူး။ ကျေးသီးဘက်ကို ပေးမလာတာတွေ ရှိ နေတယ် ” ဟု စစ်ဘေးရှောင် ဒုက္ခသည်များကို သွားရောက် ကူညီပေးနေသည့် ကျေးသီးမြို့နယ် ဒေသခံဦးစိုင်းလိန်ခမ်း က ဧရာဝတီကို ပြောသည်။
အောက်တိုဘာလဆန်းပိုင်းတွင် SSPP/SSA တပ်နှင့် အစိုးရ စစ်တပ်တို့ တိုက်ပွဲ ပြန်လည် ဖြစ်ပွားခဲ့သဖြင့် ဒုက္ခသည် ဦးရေ ထပ်မံတိုးတက်လာကြောင်း၊ ဒုက္ခသည်များသည် ၎င်းတို့၏ စားဝတ်နေရေး အတွက် မိမိနေရပ်သို့ ပြန်၍ စိုက်ပျိုးရေး လုပ်ငန်းများ ပြန်လုပ်ကိုင်လိုကြသော်လည်း လုံခြုံရေး စိတ်မချရသဖြင့် မပြန်ရဲကြကြောင်း စစ်ရှောင် ဒုက္ခသည်များကို သွားရောက် ကူညီကြသော ကျေးသီးမြို့ ဒေသခံများက ဆိုသည်။
SSPP/SSA ပြောရေးဆိုခွင့်ရှိသူ ဦးစပ်ခွန်ဆိုင်ကမူ “ လောလောဆယ် ကျနော်တို့ တိုက်ပွဲတွေ ရပ်ထားပါတယ်။ ဒုက္ခသည်တွေကို ကူညီဖို့အတွက် ကျနော်တို့က အမြဲတမ်း ကြိုဆိုပါတယ်။ ဒီကိစ္စတွေကို ကျနော်တို့ အဖွဲ့နဲ့ အစိုးရ ငြိမ်းချမ်းရေး ဖော်ဆောင်ရေး အဖွဲ့တွေနဲ့ တွေ့ဆုံရင် တင်ပြ ပေးသွားပါမယ်” ဟု ဧရာဝတီကို ပြောသည်။
လတ်တလော စစ်ဘေးရှောင် ဒုက္ခသည်များနှင့် အဆက်အသွယ် မရရှိသည်မှာ ၁၀ ရက်ခန့် ရှိပြီဖြစ်ပြီး ဒုက္ခသည်များသည် စားဝတ်နေရေး ခက်ခဲနေကြကြောင်း၊ စစ်ဘေးရှောင်သူများတွင် အမျိုးသမီးများ၊ ကလေးငယ်များနှင့် သက်ကြီး ရွယ်အိုများ ပိုမိုများပြားကြောင်း စစ်ဘေးရှောင် ဒုက္ခသည်များကို ကူညီနေသည့်  မူဆယ်ဒေသခံ ဦးစိုင်းမြတ်အောင်က ပြောသည်။
“စစ်ဘေးရှောင် ဒုက္ခသည်တွေ အတွက် ရန်ပုံငွေပွဲတွေ ပြုလုပ်ပြီး သွားရောက် လှုဒါန်းဖို့ ကြိုးစားနေတယ်။ အဲဒီ ဒေသကို သွားကူညီဖို့ အတွက် အခု လမ်းကြောင်းတွေ ပိတ်ထားတယ်။ ဆောင်တွင်း ရောက်နေပြီ ဆိုတော့ သူတို့တွေ အတွက် အဝတ်တွေ လိုအပ်မယ်” ဟု ဦးစိုင်းမြတ်အောင် ဆက်ပြောသည်။
ရှမ်းပြည်နယ်အတွင်းရှိ တိုက်ပွဲများဖြစ်ပွားလျက်ရှိသော နေရာများတွင် အစိုးရ စစ်တပ်သည် ဒေသခံ ရွာသားများကို ရိုက်နှက်ခြင်း၊ ဒေသခံများ နေအိမ်မှ ပစ္စည်းများ လုယက်မှုနေသောကြောင့်ဒေသခံများ ထွက်ပြေး တိမ်းရှောင် နေရ ကြောင်း အောက်တိုဘာ ၁၀ ရက်နေ့ထုတ်ပြန်သော ရှမ်းလူ့အခွင့်အရေး မဏ္ဍိုင်အဖွဲ့၏ ထုတ်ပြန်ချက်တွင် ဖော်ပြ ထားသည်။

သတင်း-ဧရာဝတီ

ဝန်ကြီး ဗိုလ်မှူးကြီးအောင်သူ၏ ပေးစာ အပေါ် SSPP/SSA ကန့်ကွက်

 

 

 

 

 

 

 

 

 

 

 

 

 

 

 

 

 

 

 

 

 

 သတင်း - သျှမ်းသံတော်ဆင့်သတင်း

သံလွင် အနောက်ခြမ်း UWSA ၀တပ်ဖွဲ့ ထိန်းချုပ် နယ်မြေ နှင့် ကပ်လျက် ရှိသည့် သျှမ်းပြည် တပ်မတော် SSPP/SSA တပ်စခန်းများ၊ လှုပ်ရှား စစ်ကြောင်း များအား ရုပ်သိမ်း ပေးရန် လုံခြုံရေး နှင့် နယ်စပ် ရေးရာ ဝန်ကြီး  ဗိုလ်မှူးကြီးအောင်သူ ပေးပို့လာသည့် အိပ်ဖွင့် ပေးစာအား SSPP/SSA မှ ကန့်ကွက် ရှုပ်ချသည်ဟု ဆိုသည်။
“ ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီ UPWC နဲ့တွေ့တဲ့အခါ ကျနော်တို့ ကန့်ကွက် ကြောင်း ပြောမယ်။အဲလို ခဏခဏမလုပ်ပါနဲ့ ကျနော်တို့ ပြောမယ်။  သူတို့ဘက်ကလုပ်လာ ရင်လည်း ကျနော်တို့က ကန့်ကွက်သွား မယ်။ ” ဟု SSPP/SSA အထွေထွေ အတွင်းရေးမှူး စဝ်ခွန်ဆိုင် ကပြောသည်။

သျှမ်းပြည်တိုးတက်ရေးပါတီ/သျှမ်းပြည်တပ်မတော် SSPP/SSA ထိန်းချုပ်ဒေသအား မြန်မာအစိုးရစစ်တပ် အားဖြည့်တိုက်ခိုက်မှုပြ မြေပုံ

သျှမ်းပြည်တိုးတက်ရေးပါတီ/သျှမ်းပြည်တပ်မတော် SSPP/SSA ထံသို့ သျှမ်းပြည်နယ်အစိုးရ လုံခြုံရေးနှင့် နယ်စပ်ရေးရာ ဝန်ကြီး  ဗိုလ်မှူးကြီး အောင်သူက အောက်တိုဘာ ၉ ရက်နေ့ က  တပ်စခန်းများ ဆုတ်ပေးရန် စာရေးသားပေးပို့ခဲ့သည်။
“ကျနော်တို့ ဒီလွယ်လန်းနဲ့ နမ့်ဆီကျိန်စခန်းတွေက တောထဲမှာ ရှိတဲ့ စခန်းတွေ လေ။ ဘယ်သူ့ကိုမှလဲ အနှောင့် အယှက် မပေးဘူး။ လမ်းမကြီးမှာလဲ မဟုတ်ဘူး။ မြို့လဲမဟုတ်ဘူး။  တောထဲမှာ။ ဒါကြောင့် ကျနော်တို့တော့ မဆုတ်နိုင်ဘူး” ဟု  စဝ်ခွန်ဆိုင်းကပြောသည်။
အလားတူ အောက်တိုဘာလ ၁၃ရက်နေ့ကလည်း ကျေးသီး- ၀မ့်ဝပ်- ခိုလောင်းတလျှောက်ရှိ SSPP တပ်များအားလည်း (သဘောတူညီ ချက် အတိုင်း) ကားလမ်းမှ ၃ မိုင်အကွာသို့ဆုတ်ပေးရန် အရှေ့အလယ်ပိုင်းတိုင်းစစ်ဌာနချုပ် (ရလခ) တိုင်းက ထပ်မံ ညွှန်ကြားလာသည်ဟု SSPP ကပြောသည်။
“ကျေးသီး- ပန်စယ့်- လွယ်ယွဲ - ခိုလောင်းလမ်းမ တလျှောက်တဲ့။ ဒီလမ်းတွေက ၁၉၉၅ ခုကတည်းက ကျနော်တို့ လုပ်လာ တာဒီလမ်း။ အစိုးရလမ်းမဟုတ်ဘူး။ ပြီးတော့ ကျနော်တို့ သဘောတူထားတဲ့အတိုင်း လို့ ပြောလာတာ ဘာသဘောတူညီ ချက်တုန်း။ တခါမှ သဘော မတူထားရဘူး တပ်ဆုတ်ဖို့ဘာဖို့က။ ၂၀၀၅ တုန်းက ရိက္ခာအခက် အခဲရှိလို့ နမ့်ပုတ်မှာ လာနေပါရစေလို့  ဗမာစစ်တပ်က ကျနော်တို့ဆီကို တောင်းဆို လာပြီးတော့ ၃-၄ ယောက် လာပြီးစခန်းချပြီးနေတယ်။ အဲ့ကတည်းက ခုချိန်အထိဘဲနေနေတာ။ တပ်ကိုပြန်မ ဆုတ်တာ။   ကျနော်တို့ခင်းတဲ့ လမ်းမှာလာလဲ လာနေသေးတယ်။  ကျနော်တို့ကို ကျူးကျော်တယ်ဆိုပြီး တပ်ဆုတ်ခိုင်းတယ်။ ဒါတရားလားပေါ့။”
ဗိုလ်မှူးကြီး အောင်သူမှပေးပို့အကြောင်းကြားသည့်စာတွင် - သျှမ်းပြည်တပ်မတော်ကြောင့် ဒေသခံကျေးရွာ လူထုက ကြောက်ရွံ့ခြင်း၊ နေထိုင်လုပ်ကိုင်စားသောက်ရန် ခက်ခဲခြင်းတို့ဖြစ်ပေါ်နေသဖြင့် တပ်ဆုတ်ခိုင်းခြင်းဖြစ်သည်ဟု  ပါရှိသည်။
ယခုကဲ့သို့ အစိုးရမှ တပ်ဆုတ်ခိုင်းခြင်းအကြောင်းနှင့်ပတ်သက်၍ နယ်စပ်ရေးရာ နိုင်ငံရေး လေ့လာသုံးသပ်သူ တစ်ဦးက “ ၀ ကို စစ်ရေးအရ ခြိမ်းခြောက်ချင်တာ ပါတယ်။ အခုဖယ်ခိုင်းတဲ့ လွယ်လန်းတို့ဘာတို့ဆိုတာ အမြင့်ပိုင်းမှာရှိတယ် ၊ အဲဒီကနေ ၁၅၅ မမ လောက်နဲ့ ထိုင်ထားမယ်ဆိုရင် ၀ နယ်ကို ခြိမ်းခြောက်လို့ရတယ်။ စစ်ရေးအရ အသာစီးရအောင်လုပ်နေတာ တွေကတော့ နိုင်ငံရေးအရ ရိုးသားမှုမရှိတဲ့ ခြေလှမ်းတွေလို့ ဆိုရမှာပါ” ဟုပြောသည်။
သျှမ်းပြည်တပ်မတော် SSPP/SSA နှင့် မြန်မာအစိုးရတို့သည် ပြည်ထောင်စုအဆင့် ငြိမ်းချမ်းရေး လက်မှတ်ရေး ထိုးထား ပြီးဖြစ်သည်။

လက်နက်ကြီး ပစ်ခဲ့သည့် လက်သည်အား အစိုးရနှင့် ပူးပေါင်း စုံစမ်း သွားရန် DKBA ဆန္ဒရှိဟုဆို

သတင်း - ရွှေဟင်္သာ သတင်းဌာန

လူသေဆုံးမှု ရှိခဲ့သည့်ကော့ကရိတ်၊ မြ၀တီ ကားလမ်း ဒေါန တောင်ပေါ်ရှိ အလယ်ဘိုတဲ စခန်း အနီး လက်နက်ကြီး ပစ်ခတ် ခဲ့သူ လက်သည် တရားခံအား အစိုးရ အာဏာပိုင် များမှ စုံစမ်း ဖော်ထုတ် သွားပါက ပူးပေါင်း ဖော်ထုတ် သွားရန် ဆန္ဒ ရှိကြောင်း ဒီမိုကရေစီ အကျိုးပြု ကရင့် တပ်မတော် (DKBA) တပ်ဖွဲ့မှ ကလို့ထူးဘော စစ်ဗျူဟာ ဗျူဟာမှူး ဗိုလ်မှူးကြီး စောဆန်းအောင်က ပြောသည်။
 “ဒီကိစ္စကို စုံစမ်း ဖော်ထုတ်ဖို့ ကျတော်တို့ကို လုပ်ပိုင်ခွင့်မှ မပေး ထားတာ။ အစိုးရက စုံစမ်း ဖော်ထုတ်မယ် ဆိုရင်လည်း ကျတော် တို့ကို မိတ်ဆွေလို ဘောထား ရင်တော့ ပါဝင် ပါ့မယ်။ ရန်သူလို သဘော ထားတယ် ဆိုရင်တော့ ဘယ်လို ပူးတွဲ ပါဝင် နိုင်မလဲ” ဟု ဗိုလ်မှူးကြီး စောဆန်းအောင်က ပြောသည်။
ပြီးခဲ့သည့် အောက်တိုဘာလ ၁၁ ရက်နေ့၊ မနက် ၉ နာရီ မှ ၁၁ နာရီ အချိန် အထိ ကော့ကရိတ် မြို့နယ်တွင် အစိုးရ တပ်နှင့် DKBA တပ်တို့ အကြား တိုက်ပွဲ ဖြစ်ပွား နေကြစဉ် ဒေါန တောင်ပေါ်ရှိ အလယ်ဘိုတဲ စခန်း အနီးသို့ လက်နက်ကြီး ကျခဲ့၍ လူ (၄) ဦး သေဆုံး ခဲ့ရကာ (၁၀) ဦး ထိခိုက် ဒဏ်ရာ ရခဲ့သည်။
အဆိုပါ အလယ်ဘိုတဲ အခန်းအနီး၌ ကျရောက် ခဲ့သည် လက်နက်ကြီး ကျမှုကို အစိုးရ တပ်ဖက်မှ DKBA အဖွဲ့၏ လုပ်ဆောင် ချက်ဟု စွပ်စွဲ ပြောဆို ထားပြီး DKBA တပ်ကမူ ၎င်းတို့ လက်ချက် မဟုတ်ကြောင်း ငြင်း ချက် ထုတ်၍ ပြောကြား ထားသည်။
“အဲလို လက်နက်ကြီး ကျည်ဆံမျိုး ကျတော်တို့ ဆီမှာလည်း မရှိဘူး။ ကျတော်တို့ အဖွဲ့ မဟုတ်ဘူး ဆိုတာ ကျတော်တို့ စစ်ဖြစ် ခဲ့တဲ့ဒေသခံ လူထု တွေကို မေးလို့ ရပါတယ်။ ကျတော်တို့ သက်သေ ပြနိုင် ပါတယ်” ဟု ဗိုလ်မှူးကြီး စောဆန်းအောင်ကပြောသည်။
အဝေးမှ နေ၍ လှမ်းပစ်သည့်လက်နက်ကြီး ကျရောက် ပေါက်ကွဲ မှုကြောင့် လူသေဆုံးမှု၊ ဒဏ်ရာ ရခဲ့မှု ဖြစ်ပွား ရာ နေရာတွင် DKBA တပ်ဖွဲ့ အပြင် အခြား လက်နက်ကိုင် အဖွဲ့ များလည်း အများ အပြား ရှိနေပြီး ထိုလက်နက်ကြီး ပစ်ခတ် ခဲ့သည့် လက်သည် တရားခံအား စုံစမ်း ဖော်ထုတ် သွားမည် ဖြစ်ကြောင်း ကော့ကရိတ် မြို့နယ် ရုံးမှ တာဝန်ရှိသူ တစ်ဦးက ပြောသည်။
ထို့အပြင် ကော့ကရိတ် မြို့မ ရဲစခန်းမှ စခန်းမှူး မြင့်အောင်က အရပ် သားနှင့် ထိခိုက် ဒဏ်ရာရသော လူများကို ဆက်လက် စစ်ဆေး နေဆဲ ဖြစ်ပြီး ထပ်မံ၍ စုံးစမ်း ဖော်ထုတ် သွားမည် ဖြစ်ကြောင်းလည်း အတည်ပြု ပြော ကြားသည်။
ပြီးခဲ့သည့် စက်တင်ဘာလ ၂၆ ရက်နေ့မှ စ၍ အစိုးရ တပ်နှင့် DKBA တပ်တို့အကြား မွန်ပြည်နယ် ကျိုက်မရော မြို့မှ စ၍ နှစ်ဖက် ပစ်ခတ်မှု စတင် ဖြစ်ပွား ခဲ့ကြပြီး ၊ ထိုမှ ဆက်၍ ကြိုကြား ပစ်ခတ်မှုများ ဆက်တိုက် ဖြစ်ပေါ် လာခဲ့သည်။
နှစ်ဖက် စစ်ရေး တင်းမာမှု လျော့ချ နိုင်ရေး အတွက် စစ်ဆင်ရေး အထူး အဖွဲ့ - ကစထ (၄) မှူး ဒုတိယ ဗိုလ်ချုပ်ကြီး ခင်ဇော်ဦး မှလည်း မိမိ တပ်အား မိမိ ထိန်းသိမ်းရန် အတွက် DKBA တပ်ဖွဲ့အား စက်တင်ဘာ လနှောင်းပိုင်း၌ သတိပေး ပြောဆို ထားပြီး ဖြစ်သည်။
DKBA နှင့်အစိုးရ တို့သည်ပြီးခဲ့သည့်၂၀၁၁ ခုနှစ်နိုဝင်ဘာ လတွင်ဒုတိယ အကြိမ် အပစ်အခတ် ရပ်စဲရေး လက်မှတ် ရေးထိုး ထားပြီးအစိုးရနှင့်အပစ်အခတ် ရပ်စဲ ထားသည့် တိုင်းရင်းသား လက်နက်ကိုင် အဖွဲ့များ အနက် တတိယမြောက်အပစ်အခတ် ရပ်စဲရေးလတ်မှတ် ရေးထိုး ထားသည့်တိုင်းရင်းသား လက်နက်ကိုင် အဖွဲ့ အစည်း ဖြစ်သည်။

တိုက်ပွဲများထပ်မံဖြစ်မှု ရေကာတာစီမံကိန်းများနှင့် ဆက်စပ်နေဟု သံလွင်မြစ်စောင့်ကြည့်ရေးအဖွဲ့ပြော

သတင်း - ကေအိုင်စီ

ကရင်ပြည်နယ်အတွင်း တိုက်ပွဲများ ပြန်လည်ဖြစ်ပွားမှုများမှာ သံလွင်မြစ်ပေါ်တွင် အကောင်အထည်ဖော် တည်ဆောက်သွားမည့် ဟတ်ကြီးရေကာတာစီမံကိန်းနှင့် ဆက်စပ်မှုများရှိနေကြောင်း သံလွင်မြစ်စောင့် ကြည့်ရေးအဖွဲ့(Salween Watch-SW)က အောက်တိုဘာလ ၁၃ရက်နေ့က ကြေညာချက်တစ်စောင် ထုတ်ပြန်ပြောဆိုလိုက်သည်။
သံလွင်မြစ်စောင့်ကြည့်ရေးအဖွဲ့တွင် ပါဝင်သည့် ကရင်သဘာဝပတ်ဝန်းကျင်နှင့် လူမှုရေးဆိုင်ရာလှုပ်ရှားမှု ကွန်ယက်(KESAN) ဒါရိုက်တာ စောပေါလ်စိန်ထွားက “တိုက်ပွဲဖြစ်နေတာတွေရဲ့ နောက်ကွယ်မှာ ရေကာတာ စီမံကိန်းတွေနဲ့ ဆက်စပ်တယ်လို့ ယူဆ တယ်။ အဓိကကတော့ ဖွံ့ဖြိုးရေးလုပ်ငန်းတွေ၊ ရင်းနှီးမြုပ်နှံသူတွေက ဒီဒေသမှာရှိတဲ့ လက်ရှိအခြေ အနေနဲ့ နောက်ကွယ်က အခြေအနေတွေကို သိအောင်ပြချင်တဲ့သဘော ဖြစ်ပါ တယ်”ဟု ပြောသည်။

အဆိုပါရေကာတာစီမံကိန်းသည် ကရင်ပြည်နယ် လှိုင်းဘွဲမြို့နယ်ရှိ ကရင်အမျိုးသားအစည်းအရုံး(KNU)၏ တပ်မဟာ(၇)၊ တပ်မ ဟာ(၅)နယ်မြေနှင့် ထိစပ်နေကာ ဒီမိုကရေစီအကျိုးပြုကရင်တပ်မတော်(DKBA) တပ်များလည်း လှုပ်ရှားသွားလာနေသည့်နယ် မြေဖြစ်ပြီး စက်တင်ဘာလကုန်ပိုင်းမှစ၍ ကရင်ပြည်နယ်အတွင်း လှုပ်ရှားနေသော DKBA နှင့် အစိုးရတပ်တို့ တိုက်ပွဲများ ပြန် လည်ဖြစ်ပွားမှုအပေါ် အခြေခံကာ ယခုလို ပြော ဆိုလိုက်ခြင်းဖြစ်သည်။
KNU ဖားအံခရိုင် ဥက္ကဌ ပဒိုစောအောင်မော်အေးက “အခုဖြစ်နေတာကတော့ ကျနော့်အမြင် စီမံကိန်းတွေနဲ့ မဆိုင်လောက်ပါ ဘူး။ ပြီးတော့ လက်ရှိအခြေအနေထိ သူတို့ဘက်က စီမံကိန်းပြန်စဖို့ ဆက်သွယ်ပြောဆို လုပ်ဆောင်တာမရှိသေးဘူး”ဟု ဆို သည်။
Salween Watch ၏ ထုတ်ပြန်ချက်ထဲတွင် ရေကာတာစီမံကိန်းများသည် ပဋ္ဋိပက္ခနယ်မြေများအတွင်း၌သာ တည်ရှိနေသည်ဟု ပြောဆိုထားပြီး မကြာသေးမှီက တိုက်ပွဲများပြန်လည်ဖြစ်ပွားနေမှုများနှင့် စစ်အင်အားချဲ့ထွင်မှုများကို ပြစ်တင်ရှုတ်ချထားသည် ကို တွေ့ရသည်။
ပြီးခဲ့သည့် ၂၀၁၃ခုနှစ်၊ မေလကလည်း အစိုးရတပ်များက အဆိုပါနယ်မြေအတွင်း အခြေချလှုပ်ရှားနေသော DKBA တပ်များကို ဖယ်ရှားပေးရန် ပြောဆိုမှုများရှိခဲ့ပြီး DKBA အနေဖြင့် ဟတ်ကြီးရေကာတာစီမံ ကိန်း ပြုလုပ်မည်ကို သဘောမတူဘဲ အဆိုပါနယ် မြေမှ ဖယ်ရှားပေးရန် ငြင်းဆန်မှုများရှိခဲ့သည်။
သံလွင်မြစ်ပေါ်ရှိ ဟတ်ကြီးရေကာတာစီမံကိန်းနှင့်ပတ်သက်ပြီး ဖြစ်ပေါ်လာမည့် အကျိုးသက်ရောက် မှုများကို စောပေါလ်စိန်ထွား က “ရေကာတာဆောက်လိုက်မယ်ဆို အနီးနားဝန်းကျင်ကျေးရွာတွေ ကနေ ရေမြုပ်ဧရိယာတွေဖြစ်လာမယ်။ သဘာဝပတ်ဝန်း ကျင်နဲ့ ဒေသခံ အသက်မွေးမှု ထိခိုက်လာမယ်။ ဆက်လုပ်မယ်ဆို တိုက်ပွဲတွေဖြစ်ပြီးတော့ လူ့အခွင့်အရေး ချိုးဖောက်ခံရမှုတွေ၊ ဒုက္ခသည်တွေ များလာလိမ့်မယ်”ဟု ဆက်လက် ပြောဆိုသည်။
၎င်းအပြင် အဖွဲ့အစည်းပေါင်း ၁၃၁ဖွဲ့က ဦးဆောင်ကာ သံလွင်မြစ်တစ်လျှောက် ရေအားလျှပ်စစ်စီမံကိန်း များအား ကန့်ကွက် ကြောင်း ရှမ်း၊ ကယား၊ ကရင်၊ မွန်ပြည်နယ်ရှိ ဒေသခံတိုင်းရင်းသားများ၏ လက်မှတ်များကို ကောက်ခံလျှက်ရှိရာ ယခုလက်ရှိ တွင် လက်မှတ်အရေအတွက် သုံးသောင်းကျော် ရရှိနေပြီဖြစ်သည်ဟု သိရသည်။
ယင်းသို့ ကောက်ခံရရှိသောလက်မှတ်များကို အောက်တိုဘာလကုန်တွင် နိုင်ငံတော် သမ္မတရုံး အပါအဝင် တရုတ်သံရုံးနှင့် ထိုင်းသံရုံးများသို့ ပေးပို့သွားကာ ကြေညာချက်များလည်း ထုတ်ပြန်သွားမည်ဖြစ်ကြောင်း ကရင်မြစ်ချောင်းများစောင့်ကြည့် လေ့လာရေးအဖွဲ့ထံမှ သိရသည်။
လျှပ်စစ်ဓာတ်အား ၁၃၆၀မဂ္ဂါဝပ် ထုတ်လုပ်နိုင်မည့် ဟတ်ကြီးရေအားလျှပ်စစ်စီမံကိန်းကို ယခင်အစိုးရလက်ထက် လျှပ်စစ်စွမ်း အားဝန်ကြီးဌာန၊ The Electricity Generating Authority of Thailand (EGAT)နှင့် China’s Sinohydro Corporation ကုမ္ပ ဏီတို့က ၂၀၀၆ခုနှစ်တွင် သဘောတူ လက်မှတ်ရေးထိုးထားခြင်းဖြစ်သည်။