Social Icons

Wednesday, November 7, 2012

စီမံကိန်းများ ရပ်ဆိုင်းထားရန် အစိုးရနှင့် KNU ကို ဒေသခံများ တိုက်တွန်း

ကရင်ပြည်နယ် ကြာအင်းဆိပ်ကြီး မြို့နယ်တွင်း ကျေးရွာပေါင်း ၂၇ ရွာမှ ရွေးချယ် တင်မြောက်ထားသော ကိုယ်စားလှယ် ၁၀၀ ကျော်က ယခုလ ၂၆ ရက်နေ့မှ ၂၈ ရက်နေ့အထိ ကြာအင်းဆိပ်ကြီးတွင် တွေ့ဆုံခဲ့ကြသည် (ဓာတ်ပုံ – လူထုဆုံရပ်)
ကရင်ပြည်နယ်အတွင်း အစိုးရနှင့် ကရင်အမျိုးသား အစည်းအရုံး (KNU) တို့ လုပ်ကိုင်နေကြသော စီးပွားရေး လုပ်ငန်းများကို ပြန်လည် သုံးသပ်ရန်နှင့် ရပ်ဆိုင်းထားရန် ဒေသခံ ကရင်ပြည်နယ်လူထုဖြင့် ဖွဲ့စည်းထားသော “လူထုဆုံရပ် ဖြစ်မြောက်ရေး ကော်မတီ” က တိုက်တွန်း ပြောဆိုလိုက်သည်။
ယင်းကော်မတီက အစိုးရနှင့် KNU တို့ ငြိမ်းချမ်းရေး ဆောင်ရွက်မှုကို ကြိုဆိုသော်လည်း အစိုးရ၏ ဟတ်ကြီးရေကာတာ စီမံကိန်း၊ KNU ထိန်းချုပ် နယ်မြေအတွင်းရှိ ဓာတ်သတ္ထု တူးဖော်ရေး လုပ်ငန်းများ စသည်တို့ကို နှစ်ဖက် ငြိမ်းချမ်းရေး ဆွေးနွေးဆဲကာလတွင် ရပ်ဆိုင်းထားပြီး လူထုအတွက် အကာအကွယ်ပေးမည့် ဥပဒေ တိတိကျကျ ရှိမှ အကောင်ထည်ဖော် လုပ်ဆောင်သင့်ကြောင်း ယနေ့ ထုတ်ပြန်ကြေညာသည်။
“ငြိမ်းချမ်းရေး ဆွေးနွေးတာက ဘယ်လိုမှန်း မသိသေးဘူး၊ လုပ်ငန်းရှင်တွေက ထိုးဝင်လာနေတယ်။ အခု လုပ်နေတာတွေကလည်း ဒေသခံတွေအတွက် အကျိုးခံစားခွင့်၊ အာမခံချက်မှ မရှိဘူး။ အဲဒါကြောင့် ဒေသခံလူထုတွေ အကျိုးခံစားခွင့်နဲ့ သဘာဝ ပတ်ဝန်းကျင် ထိခိုက်ပျက်စီးမှုတွေအတွက် တိုက်တွန်းတာပါ” ဟု လူထုဆုံရပ် ဖြစ်မြောက်ရေး ကော်မတီ၏ ပြောဆိုခွင့်ရှိသူ စောဖိုးချိုက ဧရာဝတီသို့ ပြောသည်။
ယခုအခါ KNU ထိန်းချုပ်နယ်မြေအတွင်းရှိ တပ်မဟာ (၁)၊ (၃) နှင့် (၆) တို့တွင် ခနောက်စိမ်း အပါအဝင် ဓာတ်သတ္ထု တူးဖော်ရေး လုပ်ငန်းများကို အစိုးရ၊ KNU တို့နှင့် ဆက်နွယ်သော လုပ်ငန်းရှင်များ တိုးမြှင့် ဝင်ရောက်လုပ်ကိုင်လာကြောင်း၊ ယင်းသို့ လုပ်ဆောင်ရာတွင် ဒေသခံများ၏ စိုက်ပျိုးရေးလုပ်ငန်းများနှင့် သဘာဝပတ်ဝန်းကျင် ထိခိုက်ပျက်စီးမှုများရှိကြောင်း သူက ဆက်ပြောသည်။
ထို့အပြင် ဒေသခံတို့ ပိုင်ဆိုင်သော မြေများကိုလည်း မတန်တဆ ဈေးနှုန်းများဖြင့် ရောင်းပေးရကြောင်း၊ မူလက ဓာတ်သတ္ထု တူးဖော်ရေး လုပ်ငန်းများတွင် လူအင်အား အသုံးပြုသည့်အတွက် ဒေသခံအချို့ အလုပ်အကိုင် ရရှိသော်လည်း ယခုအခါ စက်ပစ္စည်းများနှင့် တူးဖော်မှု ပြုလုပ်လာသဖြင့် ဒေသခံများမှာလည်း အလုပ်ကိုင်ရရှိမှု နည်းပါးသွားကြောင်း သိရသည်။
ယင်း ဖြစ်စဉ်များနှင့် ပတ်သက်ပြီး ကရင်ပြည်နယ် ကြာအင်းဆိပ်ကြီး မြို့နယ်တွင်း ကျေးရွာပေါင်း ၂၇ ရွာမှ ရွေးချယ် တင်မြောက်ထားသော ကိုယ်စားလှယ် ၁၀၀ ကျော်က ယခုလ ၂၆ ရက်နေ့မှ ၂၈ ရက်နေ့အထိ ကြာအင်းဆိပ်ကြီးတွင် တွေ့ဆုံခဲ့ကြပြီး ဒေသခံများ၏ အခက်အခဲများကို အစိုးရနှင့် KNU ခေါင်း ဆောင်များကို တင်ပြနိုင်ရန် ဆွေးနွေးခဲ့ကြသည်ဟု သိရသည်။
“စစ်မှန်သည့်ငြိမ်းချမ်းရေး တည်ဆောက်ရာ၌ လည်းကောင်း၊ ဖွံ့ဖြိုးရေးစီမံကိန်း လုပ်ငန်းစဉ်များတွင် လည်းကောင်း၊ တည်တန့်ခိုင်မြဲသည့် အကျိုးရလဒ်များ ရှိစေရန် မြန်မာအစိုးရနှင့် KNU နှစ်ဦးနှစ်ဖက်သို့သည် လူထုလူတန်းစားသို့ ပါဝင် ဆုံးဖြတ်နိုင်သည့် အစီအစဉ်လမ်းကြောင်းနှင့် လုပ်ပိုင်ခွင့်များကို ခွင့်ပြုပေးရပါမည်” ဟု ကော်မတီ အဖွဲ့ဝင်တဦးဖြစ်သူ စောလူဘားမှူး ကလည်း ပြောဆိုထားသည်။
“လူထုဆုံရပ် ဖြစ်မြောက်ရေး ကော်မတီ”  အနေဖြင့် ဒေသတွင်းလူထု၏ တောင်းဆိုချက်များကို အစိုးရနှင့် KNU ခေါင်းဆောင်များ သိရှိရန် ကြိုးပမ်းသွားမည်ဖြစ်ပြီး ယင်းသို့ တောင်းဆိုမှုများကို လျစ်လျူရှုပါက ဆန္ဒထုတ်ဖော်မှုများ ပြုလုပ်သွားရန် ရှိသည်ဟု ဆိုသည်။
ယခုနှစ် ဧပြီလပိုင်းကလည်း KNU ထံ အခွန်ဆောင်၍ ဖာပွန်နှင့် မွန်ပြည်နယ် သထုံခရိုင်အကြား၌ တူးဖော်နေသော ခနောက်စိမ်း လုပ်ငန်းများကြောင့် ဒေသခံတို့၏ စိုက်ပျိုးခြံများ ထိခိုက်ပျက်စီးမှုများ ဖြစ်သည်ဟုဆိုကာ ကာယကံရှင် တောင်သူလယ်သမားများက တိုင်ကြားလာသဖြင့် တူးဖော်ရေးလုပ်ငန်းအချို့ကို ရပ်ဆိုင်းပေးခဲ့သည်ဟု သိရသည်။
ဓာတ်သတ္ထု တူးဖော်ရေးလုပ်ငန်းများ၊ ဒေသတွင်း စီမံကိန်းများနှင့် ပတ်သက်၍ ပြုပြင်ထိန်းသိမ်းရေး၊ လုပ်ကိုင် ဆောင်ရွက်ရေးများနှင့် ပတ်သက်၍ သက်ဆိုင်ရာခရိုင်များကို KNU သတ္ထုတွင်းဌာနက လုပ်ပိုင်ခွင့်များ အပြည့်အဝ ပေးထားပြီး ခရိုင်ခေါင်း ဆောင် များနှင့် ညှိနိုင်းလုပ်ဆောင်သည်ဟု သိရသည်။
KNU ထိန်းချုပ်မှုအောက်ရှိ တပ်မဟာ ၇ ခုထဲမှ တပ်မဟာ (၁) တွင် ခနောက်စိမ်း၊ (၂) နှင့် (၃) တို့တွင် ရွှေထွက်ရှိပြီး၊ (၄) တွင် ကျောက်မီးသွေး၊ (၅) တွင် ခနောက်စိမ်းနှင့် ရွှေ၊ (၆) တွင် ခနောက်စိမ်းနှင့် (၇) တွင် သွပ် သတ္ထု အမျိုးအစားများ ထွက်ရှိကြောင်း KNU သတ္ထုတွင်းဌာန နီးစပ်သူများနှင့် ထိုနေရာများကို လေ့လာနေသော သဘာဝ ပတ်ဝန်းကျင် အဖွဲ့များထံမှ ဧရာဝတီက စုံစမ်း သိရှိရသည်။
စီမံကိန်းအကြီးစားဖြစ်သော ထားဝယ်ရေနက်ဆိပ်ကမ်းနှင့် ဟတ်ကြီးရေကာတာ စီမံကိန်းများလည်းရှိပြီး လတ်တလောတွင် တပ်မဟာ (၆) ဒူးပလာယာခရိုင်တွင် ခနောက်စိမ်း ထုတ်လုပ်မှုနှင့် ရှာဖွေမှု အများဆုံး ပြုလုပ်နေသကဲ့သို့ ညောင်လေးပင် ခရိုင်အတွင်းရှိ တပ်မဟာ (၃) နယ်မြေတွင်လည်း ရွှေတူးဖော်ရေးလုပ်ငန်းများ အများဆုံး ပြုလုပ်လျက်ရှိသည်။
KNU အနေဖြင့်လည်း စီမံကိန်းများနှင့် ဓာတ်သတ္ထု တူးဖော်ရေးကိစ္စများကို မည်သို့ဆောင်ရွက်နေသည်ကို ထုတ်ဖော်ပြောဆိုထားခြင်း မရှိပေ။ ထို့အတူ အစိုးရသည်လည်း ငြိမ်းချမ်းရေး မဟာဗျူဟာကို အသုံးချကာ နိုင်ငံရေးပြဿနာများကို ဖြေရှင်းနိုင်ရေးထက် စီးပွားရေးအစီအစဉ်များကို ပိုမိုလုပ်ဆောင်နေသည်ဟု “လူထုဆုံရပ် ဖြစ်မြောက်ရေး ကော်မတီ” က စွပ်စွဲပြောဆိုထားသည်။
ယခုအခါ KNU နှင့် အစိုးရတို့သည် ပဏာမ အပစ်ခတ်ရပ်စဲရေး သဘောတူညီမှု ရထားပြီးဖြစ်ကာ နှစ်ဖက် ဆက်ဆံရေးရုံးများလည်း ဖွင့်လှစ်ထားပြီးဖြစ်သည်။(irrawaddy)

No comments:

Post a Comment

shakram ga...

Myushadan blog de sa du ngun jaw la ai majaw grai chyeju kaba sai law .