JAN DU MAHKA NA JAN JA

Dai ni mungkan kaw jan shang mat wa sai hpyen asuya a daru magam hte jum tek ai ni yawng hkrat sum ma mat wa sai hpe myen hpyen asuya mung shanhte myi chyaw mu lu sai hte maren shanhte a jan shang ten hpe mung shanhte chye tawn chyalu rai nga masai hku re. Asan sha tsun ga nga yang myen mungdan hpe hpyendap a daru magam hte matut jum tek mat wa yang ga bra ayai mat na ri ri sha rai mat sai re. Ndai zawn rai ga bra ayai mat hkyen sai mungdaw (lak nak lang rawt malan wuhpung) ni hpe hkrau gayin bang la na matu (Constitution) ngu ai mungdan a npawt nhpang gaw gap tara hpe shanhte myen amyu ni chyu sha ra ai hku 2008 ning hta ka lajang tawn sai re. Ndai constitution ngut ai hpang lak nak lang rawt malan wuhpung ni hpe hkrau gayin bang la na matu ram ram yak hkak jan ja gahtet taw nga sai hku re. Hpa majaw nga yang ndai constitution gaw shanhte myen hpyen asuya ni chyu sha shanhte ra ai hku ka lajang tawn ai re majaw sharaw hpyi hpun nna wa shaga ai hte bung nga ai. Dai majaw shanhte hpun tawn ai sharaw hpyi (hpyen hking) hpe makau kaw raw gahtap tawn, Mung masha tsawp dagraw la nna Num hkungran la na matu Num tam gayin hkawm nga ma ai re. Hkrak sha tsun ga nga yang hkyi nhkrup ai gwi zawn rai tam ning wan hkawm nga ma ai re. Num tam ai kun?. Bawm tam ai kun? chyawm gaw nchye ai. Num hpyi kasa U Aung Taung hpe shangun yu yang Num nnnan gaw nhkup, bawm sha wa hkrup la la re majaw ya kalang mi bai U Aung Min hpe shangun dat sai. Num hpyi kasa U Aung Min gaw myen mungdan kaw rawt malan asak galu dik ai KNU (Karen Nation Union) hte lak mat lu htu ai majaw grai mying kaba taw nga ai rai lu ai. U Aung Taung hpe sharin shaga dat ai hta pyi grau sawng hkra sharin shaga dat ra ai. Annau ni gaw Karai Kasang hpe lu la ai Karai Kasang a kasha ni re hpe chye mat wa shangun ra ai.
                    

Bai nna grai ahkyak ai langai mi naw tsun mayu ai. UWSA (United Wa State Army) ni hpe mung tsun dan ra ai lam nga ai. Ya na Myen hpyendap, Dap Awn Daju Min Aung Laing gaw lai wa sai ten shi sinpraw daju Taingmu lit gun nga ai ten hta tsawm ra tsaw ai bum kaw tsap nna lata layung ladawn nna UWSA hpe tsun ai ga nga ai. Shi tsun ai ga gaw,.... Ngai American hte lata hkindun lu ai shani nang nloi ai. Wan nmu byin mat na ngu nna tsun ai ga gaw UWSA ni yup mang kaja pyi nmai mu ai baw ga re. Shanhte myen ni masing kaba nan jahkrat tawn da chyalu re. KIO/KIA hpe shawng shamyit kau nna (lak mat htu kau ngut nna) UWSA ni hpe shamyit na masing re. Ya ten hta myen asuya hte American lata nlu hkindun shi ai gaw KIO/KIA kaw sha dau taw nga sai re. Bai nna langai mi gaw anhte a Dap Ba (4) gaw UWSA a shawng kaw gapat taw nga ai majaw ngu nna mung mai tsun nga ai. Kaja wa nga yang KIO/KIA hpe htim gasat ai hta shanhte myen ni myit ai hku nbyin mat ai hta n-ga, mana maka arum ara hkrat sum machyi mat ai majaw UWSA ni kaw ndu shi ai she re. Myen asuya hte gaw gap gasat jahkring lak mat htu da ai hte hpa nseng ai. Shanhte myen asuya ni gaw gap mayu ai shaloi mai gap ai sha re.
                    

Bai langai mi gaw myen mungdan kata kaw lanak lang rawt malan nga ai laga wuhpung ni hpe gaw nhpye kaw hta bang kau lu sai hku myen ni sawn la nga ma ai. Annau ni hpa ntsang ra ai. Karai Kasang gaw shi a kasha ni hpe galoi n-gabai da ai. Annau ni a Pandung Shadaw gaw Mungkan Wunpawng Hpung (UN) shawng kaw Wunpawng Mungdan Shanglawt Dawnghkawn nan jung ra ai. Karai Kasang lata la ai Amyu ni gaw amyu kaba byin tai wa na matu Karai Kasang woi awn chyalu re.

Sau Nan Du (jinghpawkasa)