HPA MI N TSANG RA NA SAI

Tsaw ra hkung ga ai laika hti ya nga ai Wunpawng Sha ni yawng ngwi pyaw hkam ja nga mu ga. Laika n lu ka mat ai majaw laika ka ai wa hpe malap kau na mung grai tsang nga ai. Laika n ka jang grau n pyaw ai. Hpa majaw nga yang Wunpawng Mungdan Padang hkrun lam hkawm nga ai ten hta, tinang dang di galaw lu ai lam hpe galaw nna, lakung lakap tai shang lawm ap nawng na gaw Wunpawng sha ni hkum ding dek hta lit nga nga ai.
 

Shawng nnan Karai Kasang a chyeju hpe shakawn ai law. Padang hkrun lam laning mi hpring hkra, tai hpyen hpe gasat manga taw nga lu ai gaw, Karai Kasang a shaman chyeju san san rai nga ai majaw, Wunpawng Sha ni yawng n dang tsun hkra chyeju dum let aja awa chyeju shakawn ga ngu saw dat nngai. Singapore du Wunpawng sha ni hku nna mung 9 june 7:00AM  to 10 june 7:00AM du hkra aten la nna aja awa chyeju shakawn akyu hpyi na lamang hpe galaw hkyen nga ai lam na lu ai. Myen mung ting na law la ai nat tsa dan ni hpe ninghkap majan sha n ga, Awng Padang dip majan mung hkam la nga ga ai majaw, Wunpawng Sha ni maga de Karai Kasang a mau hpa n gun lawm nga sai rai nna, myen hpyen hpe galoi mung n sum sana re kam ga. A men:
                       

Dai rai yang Wunpawng Sha ni hpa hpe naw tsang nga ga ta? Mung masa hku nna anhte hkrat sum na tsang nga ga ai kun? Wunpawng Sha ni a padang hkrun lam hta, myen hte bawngban na shaloi sha ganing re ga sadi hpe ganing re lamyi laman kaw du hkra rai yang she ta masat htu na, Wunpawng Mungdan Amyu Sha ni a matu Awng dawm ahkaw ahkang lu hkra gara hku bawng ban na ngu ai gaw, ya ya sha ra ai shaloi she  bawng  jahkrup la nna, myen hte bai sa bawngban ai hku n re sha, myen hte kade lang mi bawng yang bawng, kade kaba ai wa hte mi hkrum hkrum moi kaw na nga chyalu "Ninggawn Mung Shawa Masing" hpe pandung tawn nna she bawng sa wa na re majaw, tsang shara nnga ai. La ma rai nna Ninggawn Mung Shawa Masing hte n bung pre ai kaga masa hku bawngban na rai jang gaw, Ginjaw salang ni hku nna, mung shawa hpe chye shangun, myit hkrum ai lam shawng la nna she galaw sa wa na rai ma ai ngu Wunpawng Sha ni Kam nga ga law.
 

Dai ni na ten hta Wunpawng myu sha ni a matu, mung masa, hpyen masa yawng hpe woi awn nga ai gaw, Wunpawng Mungdan Shanglawt Asuya KIO/KIA Wuhpung chyu sha rai nna, KIO/KIA hta lai nna anhte kam lu na Wuhpung Wuhpawng kaga nnga sai.  "Jinghpaw Wunpawng Sha ni a matu, Party langai gaw nga ra ai. Myu sha ni a matu lutdaw kaw ga shaga ya na n nga yang ahkaw ahkang hta hpang hkrat wa na re" nga nna rai na zawn zawn, Ra lata poi shang nna lut daw kaw du yang she, ahkaw ahkang mai hpyi na zawn zawn, nga nna anhte Myu Sha ni hpe lam woi shadam wa ai myen a daw hkrawng ni mung (manang rai daw ngu yang n dang wa) anhte a lapran hta pru wa nga sai. Ndai zawn nga hkaw tsun gumhpuk ai ni hpe anhte tsan tsan kaw na yen kau ra ai. Hpa majaw n mai shani a ta? nga yang, ni jang lawm mat wa na tsang ra ai. (chyan yu ai ngu yang kadawng bang ai) Anhte Wunpawng sha ni a matu lut daw dat kasa sha n-ga, Gum san magam tai tim hpa akyu hkam sha lu na lam nnga ai. Hpa majaw? Lut daw dat kasa ni, Wungyi Wungang ni, Gum san magam hpe gyit hkang da ai gaw, 2008 gaw da ai tara kanu a majaw re. Dai gaw da ai tara kanu a kata kaw anhte Wunpawng Sha ni a akyu ara a matu hpa mung n lawm ai Kam U. Ndai tara kanu hpe shadik shatup ai Wungyi Wungang hku na ahkaw ahkang mai hpyi ai rai yang, tara kanu galaw ngut hkra shang lawm madi shadaw lawm nna Myu Sha ni a ahkaw ahkang hpyi yu sai hpa baw ahkaw ahkang lu ai ta?
                      

Myu Sha mung shawa law malawng myit n hkrum ai rai tim, "Rau rai n kanawn yu ai ni hpe n kaja ai, rai n hpyi yu ai mi n jaw ma ai ngu gara hku mai tsun na shang lawm nna Saboi n tsa kaw du jang hpyi la ga" nga nna gaw da ai tara hpe madi shadaw let ngut hkra shang lawm nang saga ai. Saboi n tsa sha n ga, saboi lai hkra rai sai. Myu sha ni a matu ahkaw ahkang langai lu hpyi la sai i? sung sung myit yu ga. Hpyi ai ngu ai gaw jaw na ni nga yang na matu she re gaw. Njaw ai hpe gara hku hpyi la na i? N jaw na rai yang n hpyi saga. Hpyi na n lu sai majaw, gashun nna la na, gasat nna la na dai sha nga mali ai. Dai rai yang anhte ra lata poi shang na matu Party hpung naw hpaw ra na kun? Amat byin nna Myu Sha hte seng ai lama mi lu galaw ya na kun?

Wunpawng Sha ni a matu Kam hpa shara gaw Karai Kasang hta lai kaga nnga sai. Wunpawng Mungdan Shanglawt KIA/KIO hta lai ai Wuhpung Wuhpawng mung nnga sai. Ra mung n ra na sai. Rai yang matut myit yu na gaw, Wunpawng Sha ni a Gawng Malai Hkungga tai nga ai Myu tsaw Mungtsaw Share Shagan ni hpe anhte gara hku garum shingtau madi shadaw nga ga ai kun? 2011 Jun 9 ya shani majan byin ai hte hpyen hprawng tsin yam nga wa sai hpe myu sha ni yawng Pu gang  Sin machyi jawm garum nga saga ai. Law ai mi rai rai, n law ai mi rai rai dang di ai maga hku garum madi shadaw nga saga ai. N dai gaw Amyu Sha shada tsaw ra masin machyi hkat ai lam re majaw, Myu Sha lam hta grai htap htuk ai lam rai nga sai.  Rai tim kaga langai mung anhte a lit re hpe n dum shani malap nga ga ai law. Myu Sha ni a gawng malai hkung ga tai nna, shawng lam kaw kaw si hpang gara jam jau lam mahkra hpe hkam sharang let mung maden hpyen hpe gasat ninghkap ya nga ai Share Shagan ni hpe madi shadaw garum ra nga ai hpe anhte law malawng malap nga ga ai. Madu a akyu ara a matu n re, Myu Sha yawng a matu, shakut shaja ap nawng nga ai Share Shagan ni hpe anhte hkungga jaw chyeju dum ai masat hku nna, shat n gup mi a matu, Hka htinggap mi a matu, mung maden hpyen hpe gasat manga lu na machyu pala langai lahkawng a matu, salat katsut la na hpa jet pa mi a matu sha pyi nang madi shadaw yu sai kun? Rai n madi shadaw yu ai rai yang, tsaw ra hkungga ging ai Myu Wunpawng Sha ni e, dai ni aten naw nga ai jawm garum shang lawm ga law. "My tsaw Share Shagan ni hpe madi shadaw ga ai, myit mada nga ga ai, gasat mu, Anut mu, Padang dip lu hkra shakut mu" ngu n-gup hte sha tsun n gun jaw taw nga ai rai yang, nang ngai gaw lama mi naw ra nga ga ai. Ta tut nan jaw ya ai lam, n gun jaw shang lawm ai lam mung ahkyak dik nga ai.
 

Mung shawa Myu Sha ni yawng anhte kaw nga ai lit hpe anhte kang ka let gun hpai nga jang, shawng lam kaw lit la nga ai Share Shagan ni grau n gun lu nna padang hkrun lam hpe Pahkam hkam ya na ma ai. Share Shagan Myu tsaw la ni Pahkam hkam nga jang n law la ai Myu Sha, sut su lam hta naw kaji kadun nga ai Myu Sha ni she rai tim, law la ai mung maden hpyen ni hpe laning mi hpring hkra gasat ninghkap lu nga ai lam gaw, Wunpawng Sha ni a myit hkrum mang rum ai lam hta Karai Kasang a mau hpa Hpung Shingkang lawm nga sai hpe da kring da lang kam nga ga. Anhte mung shawa ni yawng myit masin hku, ta tut hku madi shadaw nga ai rai jang, shawng lam de nga ai Myu tsaw Share Shagan ni yawng mung Padang hkrun lam hpe Pahkam hkam ya nga na ma ai. Dai shaloi Chyurum Wunpawng Sha ni yawng, wang lu wang lang rai "Anhte A Awng Padang Yehow Wa Karai Kasang" ngu marawn jahtau let Padang manau hpe nau lu na rai nga saga ai law. Dai rai yang hpa naw tsang ra na rai ta? Wunpawng Sha ni a matu hpa n tsang ra na re.

Shut ai lam nga yang mara raw ya na matu hpyi lajin let
Myu hpe tut tsaw ra ai
Agu Namti (jinghpawkasa)