GASAT NNA SHE LAWT LU NA (JP kasa)

GASAT NNA SHE LAWT LU NA

Masing masa tara hkrang n gran shagrin tawn ai kaw myen a bawngban lam tsun shana wa ai hpe kaning re shara, kaning re munghpawm rapdaw e mi rai rai, [Naypyidaw] e mi rai rai n'sa bawngban ai gaw kaja dik na re hte, teng tara shang bawngban mayu yang UN, ASIAN, EU zawn re rapdaw Salang ni chye lawm ai kaw she grat bawngban yang annau ni matu lachyum pru na re. Myen gaw annau ni hpe pahkam kaba langai hku hkam dat ai lam re, n'sa jang simsa lam n'ra ai kasu kabrawng hpung re ngu ai hku madi madun mayu ai ladat, mung masa amyet htuk mayu ai masa shapraw ai, annau ni hpe dasang gasat nga sai re majaw masa n'htuk ai mahkyen n'manu ai kaw n'sa bawngban ai gaw kaja dik re ngu mu ai.

Myen gaw ya ten ahkyak kaba dik ai lamyi n'gam langai kaw kabye lung na matu dating hkyen n'gun dat nga ai re. 2014 ASIAN ningbaw tai lu na matu simsa lam gaw madung re zawn ASIAN mungdan yawng a matu kasi kaja madun na ra ahkyak dik ai ten re jaw annau ni ya tsap nga ai madang kaw na kachyi mi pyi n'htawt sit ai ja ja tsang dan na madung re. Myen gaw annau ni hte simsa lam n'lu yang yak kaba dik re mungkan hte ASIAN a kam hpa lam lu na n're. Ya ten hta myen ni a shawng kaw lai yak dik ai, n'mai lai lu na zawn re mabyin manghkang ni grai dang pat taw nga ai.

1-Bawsang ni hte simsa lam n mai lu ai manghkang.

2-Simsa lam la ngut sai bawsang ni hte bai gasat nga ai manghkang.

3-Arihkai [Yahkaing], Hkang myu bawhpan hte makam manghkang.

4-Lamu ga zing ai manghkang.

5-Magam bungli galaw ai ni a shabri shabrai n'law ai manghkang.

6-Rapdaw a Tara jeyang ai manghkang.

7-Rapdaw Salang ni a bungli shatsam manghkang.

8-Mumi muhti ja htu manghkang.

9-Magri htu bungli dabang manghkang.

10-Annau ni hte majan byin nga ai manghkang.

N'dai manghkang mabyin mayak ni hpe 2013 ning grai n'htum shi yang pri-nyem hkra ASIAN mungdan ni hpe hkyak hkyak galaw madun ra nga ai re. Myen a bawngban ga ngu ai gaw ya mung (HTA HKRUP) ga tsun shingjawng poi hte naw bung nga ai hpe ja ja myit shen yu ra na sai re ngu sawn dum ai.

N'dai ten hpyen masa n'mai shayawm ya ai. Myen a manawt ka nga ai gaw laklai shai ai lam n'nga ai. N'dai hpe masam maram mu n'na myen hpe ja ja sharin shaga na ten du nga sai. Ja ja htim gasat zing madu dan na ten she rai sai. Myen a annau ni n'tsa kaw tsap n'na shaga lu sai re ngu ja ja naw dating gasat ga, myen hpyen du kaba ni n'gup hte gasat mayu tim Du kaji hte hpyen la law malawng gaw lata sharawt asum jaw nga sai re majaw mahtai kaba pru hkra gasat dan ra sai. Annau ni tsun ai kaw madaw Tara shang bawngban jahkrup lu hkra hpyen majan hte mahtai shapraw la ra sai. Myen hpyen ni shani shana annau ni hpe laja lana gasat nga ai zawn mung shawa ni hpe mung matut zingri sat dingyang rai nga ai kaw gara hku bawngban mai na ta? N'dai ni hpe madi madun nna gara hku mung myen tsun ai shara kaw n'mai bawngban ai lam sakse madun ra ai, ja ja tsap dan ra ai.

Baren Numraw

14/9/2012