AUNG SAN SUU KYI HTA KIO/KIA SHE A’HKYAK DIK SAI DA

Daini myen mungdan kata kaw yawng ra sharawng taw nga ai simsa lam hta Thein Sein wa she ahkyak madung re zawn zawn, Aung San Suu Kyi madaw she grau ahkyak madung re zawn zawn, arawng la taw nga ai gaw Thein Sein rai nga ai. KIO/KIA gaw arawng nlu tim mying kaja hte myen mungda na jet ai simsa lam a matu ja ja tsap taw nga sai hpe mu lu ai. Thein Sein wa hku nna mung Aung San Suu Kyi hpe constitution kata de gangbang la nna democracy gawgap mat wa jang mungdan simsa mat wa lu na re ngu kam nga lu ai. Ndai zawn Thein Sein a yaw shada ai ningmu gaw Annau ni hte tsep kawp nmai byin ai. Hpa majaw nga yang daini Annau ni ja ja tsap taw nga ai mung masa lam yan madung gaw N’RE AI (3) hte RE AI (3) kaw ngang ngang kang kang tsap taw nga sai majaw re.

N’RE AI (3)

2011 ning jun 9 ya shani kaw nna, myen Asuya hte Annau ni bai gasat hpang wa ai majan gaw…..

(1) Annau ni democracy dai langai hpe sha ra sharawng nna gasat taw nga ai majan n re.

(2) Parti uphpung hpaw nna simsa lam tam na n re.

(3) Jinghpaw Mung (Kachin State) hpe myen asuya hte jawm up sha na matu gasat taw nga ai majan n re.

RE AI (3)

(1) Annau ni a mungdan kata de tawt lai shang gabye ai hpyen ma hkra hpe gasat ai majan re.

(2) Simsa lam hpe jahten sharun ai myen asuya hpe ninghkap gasat ai majan re.

(3) Annau ni a amyu hte mungdan awmdawm shanglawt lu na matu gasat ai majan re.

Tsaw ra ai Chyurum Wunpawng Sha ni e lahta na ga ngau ni a n tsa e chye na chyalu rai na re ngu kam ai. Democracy ngu ai dai langai hpe sha Annau ni ra sharawng nga ga yang gaw myen amyu ni up ai Myanmar democracy kata kaw nga ra mat na. Hpa majaw nga yang daini Thein Sein asuya shakut taw nga ai ladat gaw  MAJORITY POWER ngu ladat hte myen mungdan kata kaw nga ai myu bawsang ni yawng hpe dang la lu hkra shakut taw nga sai re. MAJORITY POWER ngu ai gaw ra lata poi hta masha grau law ai ni dang la mai ai ladat rai nga ai. Dai majaw daini Thein Sein hte Aung San Suu Kyi gaw shingdu kaw jawm jahkrup la nna myen amyu ni hpe grai gahkyin gumdin taw nga sai hpe mu lu nga sai. Daini htawng masha (514) hpe mung bai gahtap shapraw dat sai. Bai nna 88 jawng ma ningbaw Minn Ko Naing hpe shangun nna KIO/KIA hte gap gasat jahkring lu na matu woi awlaw shangun ai. Ndai ten hta KIO/KIA hte gap gasat lu jahkring jang shanhte myen amyu ni shada a madi shadaw ai lam hpe 75% daram lu la mat wa na rai nga malu ai. Ndai gaw Thein Sein yen Aung San Suu Kyi a kaba dik htum mung masa amyat sha rai mat nna, Annau ni a matu gaw htani htana hkrat sum ninghpang mung rai chye nga ai. Lama na Annau ni gap gasat jahkring nna bai gap hkat wa ra yang myen amyu ni hte Annau ni mung masha shada pyi mu hkat n mai ai baw kaw du wa na re. Dai majaw Annau ni teng man ai mahtai lu hkra gaw naw shakut ninghkap gasat ra na re. Gap gasat n mai jahkring shi ai.

Sau Nan Du

17/09/2012 (by: JP kasa)