SENG JA BUM NA KIA MYU TSAW NINGHKRING NI A SHAGUN LAIKA (JP kasa)

Lai wa 2011 ning na lanam ta hta gaw, Sam Mung, Manmaw Ginwang, Sadung Sama Ginra hkan e gasat gala ai sinat mahku nsen ni gaw shani shana n sim nsa ninghkap shingla gasat awng dang kau ai alang lang, sum tsan kaw na, madat yang grai pyaw ai, grai n-gunlu, majan shiga n na lu yang shat sha pyi n mu ai, kaga baw yin n kap tim, majan shiga yin kap mat nna, yup n lu sha n mu, Chyurum Wunpawng Sha ni, Moi majan gasat ai lam hta ningtawn ai nga na sha na yu ai wa, ya daini... kaja wa nan rai nga a hka!! ngu nna shani shana Karai Kasang a chyeju hpe hput di let shakawn lai wa saga ai.

Dai ten hta anhte Uru Sengmaw ga de gaw, Wa La ni wa rap hte rap rai nna, UBA-Cup ngu ai gawdin ninggang hpe ga law hte shem nga nna, htawng gin sup ai gaw Sharaw Hka Wa La ni hpai sha mat wa masai re.... Ya daining na UBA-Cup gaw Sharaw Hka hte Seng Ja Bum lapran kaw she, Champions League hpe madu tai nna bai hkap la let shakrip jaw nga ai gaw, Nu wa Myu Wunpawng sha ni yawng a akyu hpyi karum ya ai nsen hte, Karai e karum ai majaw, Quater Final kaw Goal-50 jan dang, Semi-final  kaw mung Karai a mauhpa atsam hte, Goal-80 jan dang rai nna, ya gaw Final poi kaba htawng na matu jin jin la taw nga ai bat mi jan shaman shakyang ding yang rai nga saga ai. Nu, wa myu sha ni yawng akyu ja ja naw hpyi ya nga ai nga shiga na lu ga ai majaw, jahtum (Awng Padang Mungdan Ninggang) ngu ai lu nan lu na re ngu nna myit mada let shakut nga ga ai re.

Dai rai yang maning hkan poi garai n du shi yang gaw, yaw ga, nut ga, shakrip ga den jaw na re, nga nna manu mana manang wa hpe shawng de kanawng shadut nna tsun n-gun jaw lai wa sai, Kanu Kawa, Kahpu Kanau n kau mi gaw, (N-gup gaw baw law ta gaw lagyaw, Chyahkyi a sau sau, chyahkan lagaw run) rai, wa kau da masai le.... Grau nna lahpum malu na re nga ai ni wa ya ra ahkyak jang mye rai tam shamat kau saga ai le..

E... e.. manang ni e nanhte gaw simsa ai shara de, hpa myit n pu n ru ra ai, tinang a dai daw dai hpang ga de lu du mat saga ai ngu nna gaw hkum myit kau mu yaw.... Anhte a lamang n ngut shi nga ga ai.... Nang e hpyen yen yen nna na a htingbu manang nta masha ni mung ayak ahkak rai, myu tsaw share shagan ni mung, Maning gaw Lungseng Dat wan lang, daining gaw, Naypyidaw na manang la ni sha na matu Baq-yi (8-1) ngu ai hpri machyu si kumhpa ni lajang da ya rai she, Myusha ni a Mungdaw Mungdan lu na matu shani shana n yup n sha shakut nga saga ai.

Hpakant ga na Lungseng a majaw nga pyaw nga sai manang ni yawng hte e.... tinang a buga ginra de du mat ai rai tim, anhte hpe naw myit dum let, lam amyu myu hku nna naw shakut shaja lawm marit ngu nna nja nhpra numhtet dat nngai law.

Seng Ja Bum na

Tsa Doi La, Myen Htim Magra