CHYAHKYAWN A HPYI GALAI

CHYAHKYAWN A HPYI GALAI

Chyahkyawn hpyi hte kade hpun magap shatsawm tawn tim je tsawm u ga ngu yang woi zawn re ngu ai baw tai nga ai myen a mung masa shamu shamawt lam gaw kade ka hkrang jashai mayu tim hpang jahtum e gaw galoi mung shapoi ai shiga dingsa moi mwi dingsa sha arai nga ai hpe yawng chye nga saga ai. Daini gaw galaw ai ladat mung htum wa nga sai, masu magaw ai namlak shachyai ai mung htum wa sai re ngu myit la mai sai.

Amerika UN rapdaw zahpawng sa lung na matu hkyen lajang ai hku hte mungkan a man hta myi man tsawm hkra hte madu ra awng sharawng ai byin lu hkra galoi mung mung masa laknak langai hku jai lang chye nga ai Thein Sein asuya gaw ya mung htawng bawng masha (500) daram dat masu nna kalang bai mungkan hpe htawng shatsawm masu sai re. Ndai Thein Sein a mung masa laknak hta jai lang hkrum nga ai hpyen bawng masha ni mung htum wa mahka re zawn n'dai laknak pala mung htum hkyen sai. Hpa hte naw masu na kun? Annau ni tau hkrau mu chye mai sai re majaw ya ten n'gun htum, atsam htum myen hpe agrap rum mat hkra annau ni sinat hpai dang ai yawng myit makun myit n'gut dik ai hte matut gasat na ten rai sai.

Thai mungdan kaw n'dai lapran bawsang uhpung hte UNFC kaw na hkrum bawngban ai mung Thein Sein asuya hpe kreng hta shingte gap hkra ai hte bung ai. Thein Sein asuya nyau agrawp gazut mat sai. Yahte mung Mau tau tau hkrup ai shana na yup dam dam ai zawn n'sin lungpu hku kaw na puk shabam dat ai gaw hpun tang n'sen sha garaw n'na ga si n'brat ai, annau ni hte Naypyi daw kaw simsa lam bawng ga da oi. Masu n'tum htum sai.

Shawng de sit gamawt sa shagu, hpang de shim lam n'nga ai hpe dum magang dung lahkum ashun nga sai hpe dum n'na myit n'ngut hkrum sai hte shawng de kabye manawt dat shagu maidang hpyeng jut waw ai manam magang, myu shada kade kapa magap ya tim waw magang, kawa sip Miwa mung kapa jin, kaya jin mat n na ya gaw dam kau hkyen sai. Dai pyi Thein Sein gaw kaya n'su myi man 2 lang shinglet 2 bra lachyum shapru ai hpe Miwa hte Amerikan gaw shabawng htawng chyai ai ma nyepbaw e matsat kaya ai da.

Amerika grai n'du n'sa shi yang Kawa sip Miwa hpe sa nawku kau da hkyen nga ai raitim ya ten Miwa mung ting Japan mung hpe ningyun bu kabrawng salu hpoi hpoi kahtet nga ai jaw myi kaba azi yu n'na hkumbawp sha lawu pawt angun nga ai re, myen hpe matsan dum ai hte anhte sai daw sai chyen ni hte hpa grai n'chye shi ai ma ni a malai prat tup jaw lup yup malap mat ai baw tsi jang matep jaw kau ga. Myen hte jinghku htingbu hku shakram na malai kaja dik ai machyu pala kumhpa jang matep jaw kau saga. Tsaw ra ai mungtsaw myutsaw ai chyurum myitrum ai hpu nau ni e.

Thein Sein hte Aung San Suu Kyi Amerika du nga ai ten maigan mungdan shagu du nga ai myu sha ni n'gun kaba hte ninghkap n'gun madun yang kaja dik re hte mung masa amyet ninggam langai re ngu mu ai KNO ningbaw ni awm dawm a matu hkyen saga ai re jaw n'dai ten hpyen wa hpe padang kaba dip shamawng la na ten re law. N'dai zawn re hpang de bai lu na n'loi sai. Tatut ninghkap majan gasat ai zawn kanu buga de mung ya ten ja ja htim gasat ding yang rai ra ai. Annau ni a matu ahkyak dik ai lami laman n'gam du nga ai. Langai sha ngam tim gasat na re.

Baren Numraw

17/9/2012 (by:JP kasa)