MYEN HPYEN NI MARE KATA LAKNAK GAP BANG MARE MASHA HKALA

May (22) bat Lahkawng

Jinghpaw Mung kata du nga ai myen asuya dap ni gaw hkrup mara gap hkrup mara sat na ahkang (free fire permission) lu tawn ai majaw Jnghpaw Mung kata hta mu mamu hte mare kata de mung majoi sinak gap dumbre ai lam galaw nga ai re.
Lai wa sai May (8) ya shana (10:30pm) daram hta Jinghpaw Mung Manmaw Ginwang Manje mare kaw du nga ai Myen asuya dap nawng masat Tat-ma (99) na hpyen hpung ni gaw shanhte dap makau kaw bawm ngoi wa ai majaw Manje mare de sinat kaji kaba ni hte majoi hkrup mara gap sharu bang ai majaw Manje Buga masha, Slg. Lahpai Zau Lum hte Jan Nangzing Kai Htang yen a shadang sha Lahpai Zau Doi Ring asak (13) ning gaw myen asuya a pala hkra ai majaw kan kaw shara manga (5) baw mat nna Manmaw Tsi Rung hta tsi tsi ga lajang nga ai ten asak sum mat wa sai lam na chye lu ai.
Matut nna, Manje Buga Hkalup Hpung, Ga Ra Yang kaw na Slg. Nbwi Naw hpe mung Myen asuya dap nawng masat (99) ni May (11) ya jahpawt woi mat wa ai gaw dai ni du hkra rai npru wa shi ai lam, sat kau sai kun,  ganing re kun daini du hkra shiga nna ai majaw nta masha ni grai tsang nga ma ai lam na chye lu ai.   by;jinghpawkasa