KIO/KIA HTE KNO NINGBAW NINGLA NI HPANG DE

KIO/KIA HTE KNO NINGBAW NINGLA NI HPANG DE

Dai ni anhte Jinghpaw Wunpawng amyu sha ni a shawng lam hte anhte a ahkaw hkang a matu KIO/KIA ningbaw ningla ni woi awn let anhte a myu  tsaw share shagan ni asak ap nawng let lam amyu myu hku shakut shaja let amyu sha ni a sari sadang hpe makawp maga nga ai majaw ndang tsun hkra chyeju dum nngai law.

Dai hte maren KNO hku nna mung maigan mungdan shara shagu hta e anhte Jinghpaw Wunpawng amyu sha ni a roi rip hkrum sha nga ai lam hte amyu sha ni a lawt lu lam hta e maigan asuya ni, UN hte EU ni hte matut mahkai nna mung, maigan du amyu sha ni hpe zinlum nna mung KIO/KIA hpe madi shadaw na matu hte tsinyam hkrum nga ai amyu sha ni hpe garum shingtau ai lam hta shakut nga ai hpe mu lu ai majaw chyeju dum, n’gun lu nngai.

Shing re KIO/KIA hku nna kanu Wunpawng Mungdan kata kaw shakut nga ai zawn KNO hku nna mung maigan mungdan shara shagu hta e lu ai atsam hte shakut nga ai ten hta e maigan de du nga ai J.W amyu sha nkau mi gaw gara kaw mung nshang lawm ai sha nga shalai ai hpe mu lu ai majaw mung myit hta grai npyaw ai.

Ya ngai tang shawn mayu ai lam gaw, amyu sha ni a mung masa lawt lu lam hta shang lawm mayu tim, KIO/KIA hte KNO a lapran ung-ang nga ai maigan du J.W amyu sha ni mang hkang rai nga ai. Europe mungdan ni, Asia mungdan ni, Australia hte America ni hkan e KNO hku nna woi awn let kanu mungdan hte amyu sha ni a lawt lu lam hta e shakut shaja nga ai zawn KIO/KIA hpe tsepkawp madi shadaw na matu myit jasu let woi awn nga ai hpe anhte ni yawng mung mu chye na sai. Maigan mungdan ni hta e anhte J.W amyu sha ni a gawng malai tai let mung masa lam hpe KNO daram shakut shaja nga ai kaga J.W mung masa uhpung mung nnga na re. Rai tim mungdan nkau mi hta e (grau nna America, Malaysia hte Singapore) ni hta e KIO hte KNO a lapran nchye na ai majaw nshang lawm ai ni nga ai zawn, KNO hta e shang lawm yang KIO hpe nmadi shadaw ai hku mu nna nshang lawm ai ni mung nga nga ai hpe mu lu ai. Shingre ai lam hpe jahpai nna lapran hta gara kaw mung nshang lawm ai ni hpe mung mu lu nga ai.

Ngai chye na ai gaw, KNO ngu ai gaw anhte Jinghpaw Wunpawng sha ni a lawt lu lam hpe KIO/KIA hku nna kanu Wunpawng mungdan kata kaw Myen Asuya hte gap hkat jahkring nna mung masa lam hpe shakut nga ai zawn, maigan du Jinghpaw Wunpawng sha ni hpe zunlum let maigan mungdan ni hte matut mahkai nna amyu sha ni lawt lu lam hpe shakut na matu maigan du J.W du salang ni hte KIO/KIA ningbaw ningla ni jawm jahkrup nna KNO hpe hpaw ninghtan da ai re ngu chye lu nngai. KNO ningbaw ni hku nna mung KIO hte KNO gaw amyu sha lawt lu lam hta langai sha re lam hpe lang hte lang tsun sang lang nna migan du amyu sha ni hpe woi zinlum nga ai hpe mu lu nga ai. Rai tim nkau mi gaw dai hku nmu ai sha uhpung kaga ga re hku mu lu nna KNO a woi awn shamu shamawt ai lam hta e shang lawm na matu ung-ang nga ai hpe mung mu lu ai.  Bai nna nkau mi gaw KIO/KIA hku nna “anhte KIO hte KNO gaw langai sha re nna amu garan galaw ai lam she re” ngu nna ndau dat yang gaw anhte maigan du J.W sha ni yawng KNO hta n’gun langai tai let shakut shaja nna shang lawm na re nga nna tsun ai ni mung nga nga ma ai.

Dai majaw ya na zawn ahkyak ai ten hta amyu sha ni yawng a matu n’gun langai tai myit hkrum mangrum let kanu mungdan kata, shinggan lam amyu myu hku lu shakut na matu KIO/A hte KNO ningbaw ningla ni hku nna bawngban let amu rau jawm galaw na ladat hpe shaw let mung shawa masha yawng hpe chye na hkra ndau shana ya yang kaja na re ngu tang shawn dat nngai law…. 

Amyu sha lawt lu lam hta            

My Tsaw Ningli                                      jinghpawkasa