JAPAN KAW MYU SHA NI A MATU AKYU JAWM HPYI

May (5) bat Kru

Jinghpaw Wunpawng Laili Laika hte Htunghking Hpung (JLH) hte Jinghpaw Wunpawng Amyu Sha Hpung (KNO) wuhpung ni woi awn ai hte, Japan kaw du shajang nga ai KIO Ninggawn Amu Madu Du Kaba Dr. Lahkyen La Ja, UNFC (United Nationallities Federal Council / Myit hkrum Mungchying Federal Kongsi) Ningbaw Ningla ni hte Japan du Amyu sha ni gaw, May (3) ya shani Japan mungdan kaw gajai gumhkawng dik ai hte tsaw dik htum, Tokyo mare kaw nna mawdaw hte hkying hkum (3) jawn ra ai  Fuji bum kaw Kanu Munghpawm Myanmar Mungdan Mungchying Amyu sha ni hte Wunpawng Mungdan, Wunpawng Amyu sha ni a matu, laksan ja ja akyu jawm hpyi ai lamang hpe galaw lai mat wa masai lam chye lu ai.
Grau nna Karai Kasang awng sharawng ai hku nna Simsa ai hte jet ngang ai Federal Democracy mungdan byin tai awng dang wa lu na matu hte magup sumhpa yawng a matu akyu jawm hpyi lamang galaw lai wa masai lam chye lu ai. Akyu hpyi lamang hta Rev. Dabang Htawng Hkawng hte Sara Nhkum Zau Gun hku nna woi awn lai mat wa masai lam chye lu ai. Sa du shang lawm akyu hpyi ai ni marai (20) rai nna, shana daw de Tokyo mare de apyaw sha bai du wa lu masai lam mung na chye lu ai.                                                                             by;jinghpawkasa