UHKA KANU SHE TAI MAYU AI UTAWNG KANU NI(jinghpawkasa)

Mau sa! Mau sa! Jinghku jingyu ru sai baw pa n taw, mayu dama kahpu kanau lamun latsa law ai hpawmi hpawmang du salang jan ni wa she, tinang amyu nyet, jasam maigan wa a hkalem ga  hta shamyet nna awu asin yuk jahtuk, shu mashi shu masha labau n tsawm mat na, ju majat prat shanat yawng e tsun shatan jahpoi asawng hkrum na lam maw mawn nga ai shiga na lu ai majaw, n chye tsun hkra yawn kaba hte yawn mat saga ai oi!

Nanhte buga daju mare kaba sin let, kring mading rai nga na ni, yawng a kanu kasi rai, kamoi kasi tai na ni, hpa rai wa me Myen wa dangchyang a maw lanyet hta kadawng bang myit ta? Moi na jiwa ni tsun ai "Wan kanu hpunjum, nta kanu dawhpum, masha kanu anum" she nga ai re. Ya daini gaw Myitkyina e nga ai anhte Jinghpaw Wunpawng a kanu ni wa, Jinghpaw kanu n chye tai, gwi kanu gale mat sai nga sayang gaw, n yawn ai kadai wa nga na!

Chyum mungga hta Eshta (Esther) ngu ai Yuda amyu num kasha langai a lam mu hti yu na ga ai. Yuda amyu ni mahkra hpe mungkan ntsa kaw na ru hte nawng lap hte brawng sat shamyit kau na matu, hkawhkam Ahasuru aming shabra dat sai kaw na Eshta a myit nyan bawnu atsam, magrau grang ai lam a majaw, hkye shalawt la sai n rai ni? Eshta ngu ai jan lama n nga ai rai yang, Yuda amyu mung mat mat sana. Yuda amyu mat mat jang, Yesu Hkristu ngu ai mung n paw pru sana! Yesu Hkristu n paw pru ai rai yang, daini mungkan hta tengman ai makam masham hte htani htana myit mada shara hpe mung n lu la sana!

Hkawp ni, moi ni e, she myit yu mu. Lapu e gunglau hkrum ai Jinghpaw Ewa nanhte tai na myit ni? Htawm hpang de nga pra matut na nanhte a kashu kasha aru arat ni hpe, dagam dala dingnye hkringhtawng jaw kau da na myit ni? Shinggyim masha gaw hkum hkrang naw hkrung nga ninglen, n hpru n mai ai amu galaw na rai yang, hkum hkrang si mat tim, labau tsawm ai mying ngam nga lu yang grau kaja ai n rai ni?    Jinghpaw Wunpawng sha ni, tinang amyu, tinang mungdan dip da hkrum ai kaw na  lawt lu na matu, asak du baw law law, salu salat sai tum sai pa law law hkrat nna shaning galu apnawng shakut shaja nga ga ai hpe myi di tawn nna nyet kau sana myit ni?

Hkamai Tang ngu ai gaw, Hkamung Shagawng hpe garet, Ndabat mung hpe  woi shazet ai, Jinghpaw du magam, labau hkanhpa nyam ai ni rai ma ai. Hkyet Hting Nan ngu ai mung, Mali Hkrang Walawng ga na, htunghking labau gindai jum, ginru ginsa labau lum ai ni rai ma ai. Lajawn ni ngu ai mung, Hugawng magam du kaba, mungdan shakung chywi laisa ni rai ma ai. Yawng e jawm hkungga nga ga ai re. Yawng e shareng shagrau da ga ai re. Raitim ya daini gaw, "La chyau chyau sha, num chyau chyau hka" nga ai hpa, ningrum ningtau (Ewa) ni a majaw, wa pu shup yang, pali nchyan mayut let wa hkyi sha lu manam ai poilaw shabrang hte bung  mat nga manit hka! Goi sha.....! Tsawm la ai Utawng kanu ni wa, Uhka kanu she tai mayu nga myit hka i?

Sumlut Naw

Pang Madi

26/7/2012