ANNAU NI A LAGAW HTA ANNAU NI NAN TSAP NGANG RA SAI

ANNAU NI A LAGAW HTA ANNAU NI NAN TSAP NGANG RA SAI

Myen mungdan shanglawt lu ai hpang kawn daini ndai ten du hkra myen asuya a ntsa e maram dinglik yu yang Madu Uphkang ai mungdan lu la  na matu gaw mai byin ai ladat hpan (3) sha nga ai hpe mu lu ai.

(1) Up hkang taw nga ai myen asuya ni shanhte nan tengman damlada ai tsaw ra myit majing rawng wa ai shani mai lu ai.
(2) Uphpung uphpawng hpung hte mungkan (UN) kaw nna (Pressure) jaw jawm tsun araw nna mai lu ai.
(3) Laknak hte dang hkra gasat nna mai lu ai.

                Ndai hpan masun hta na (1) wa mahtang gaw tsepkawp nmai byin ai. Shaning hkying, mun, sen la dingda tim mai byin na nre. Ningsin kata kaw nyauchyang tam ai hpa sha re. Ndai gaw ngai hku nna tengtup tsun lu ai. Myen Asuya hpe Hkum kam shut dam. Ndai lang kam shut dat jang annau ni amyu mung mat mungdan mung mat mat na. Myen asuya gaw moi kaw nna dam lada ai tsaw ra myit majing galoi mung nrawng ai. Ga shadawn Aung San wa galaw da ai bungli Awng San wa si mat jang shi galaw da ai bungli mung hkan si mat ai. Nhkrung mat sai, Tara mung nshang mat sai. Dai majaw myen asuya gaw gara asuya mi galai lai, maren sha re.

Bai nna (2) uphpung uphpawng ngu ai hta UNFC mung maisau pa ntsa kaw na uphpung sha rai taw nga ai, ta tut mahtai shapraw ai hta, nru nra rai nna kadai mung kadai chye ai hku ka manawt taw nga ai hpe mu lu ai. UNFC hku nna myen asuya hpe tang shawn tawn ai hta gasat gala jahkring na matu langai hprai nrai ai sha kalang ta rau jahkring na matu hte asuya kaw nna mung tara shang kalang ta ndau shabra ra na rai yang hpa majaw ya gaw kadai mung kadai chye ai hku gap gasat jahkring ma ai kun? Ya gaw myen mungdan gata hta laknak lang rawt malan ai ni yawng hta annau ni KIO/KIA  chyu sha gap noi taw nga ai hta n-ga kadai sa garum la ai.

Bai nna (3) gaw annau ni asan sha chye na chya nu re ngu kam ai. Laknak lang rawt malan ai gaw gap di la na matu re. Myu hte mungdan shanglawt lu na matu re. Tara shang saboi ntsa kaw du hkra gap shalun la ra ai. KIO/KIA gaw UNFC kawn hpaw da ai nre. KIO/KIA gaw annau ni a lagaw hta annau ni nan tsap ngang ra sai.

Sau Nan Du (sweden)                                                                   by;jinghpawkasa