Jinghpo masha ni hta nta langai ngai wan hkru ai shaloi, masha ni e share dat nna nat ya ai rai timung, shi hkrai dinghkrot hkru ai wan rai timung, kaning rai nna wan hkru ai lam hpe sagon yu nhtom, wan shachyut let dumsa shabon nga ma ai.
Wan shachyut yang langa hpun hte hka tsit re ai ni hpe lang nna shachyut chye ma ai. Dai wan go hpyen wan la ma rai yang, dumsa wa go: “Nang go nhprang wan hkru ai shaloi Ru hka pot hta kap nan ai wan rai ndai, na a madu ni hpang de bai nhtang wa su.” Ngu nna dumsa shabon mu ai. Dinghkrot wan lama rai yang go: “Nang go nhprang wan hkru ai shaloi laja hpun chyen hta kap nan ai wan rai ndai, ya nang e hpa rai no nga nga n ta?” Ngu nna wan hkru ai hkang na wan dap hpe hka de shayong shatsot dat let dumsa ma ai.
Wan shachyut yang dumsa wa go: “Ya madum wan go sum rai sa, wan hkyeng wan go moi sat da sa, majoi hpung-ya nang e kaning re ai wan mi sa du n ta?” Ngu jang wan go:“Ngai go laja pot nna sa ai re， lahkru pot nna du aire.” Ngu nna htan u ai. Ya nang go nga shara kata nna sa, shingbyi shara n nga sa, ya hkra maga de yu u, nga shi shagong chyat rai sa, pai maga de yu u, nga hkra maling hkrai pat rai sa, hpang lam de mung hka nong hkrai pat rai nit dai, shong lam de mung hka nong hkrai pat rai nit dai, ya nga shi num jon lang ai hpyen luksuk ni du ra, hka tsit lang ai hpyen mung du ra, lamun luksuk tsun jahkrit jang wan ganu go: “Ya, dumsa hkring wa e, ngai nga shara n ngai sai, shingbyi shara mung kata sa, nga na shara madun rit, sa na shara madun rit, nga shi numjon hpe mumg hkrit n ngai, hka tsit luksuk hpe mung myit n ngai.” Ngu bai htan wu ai. Dumsa wa go：“ Wan nga shara nang de n nga sai, wan sa shara nang de kata sai, wan nga shra le de she nga sai da, wan hkyeng shagong le de she pra sai da, hka mazup de taom rai sit, hka nam de hkyom ra nit, le namukdara de hkyom rai nit, long-yi de hkyom rai nit,lung-la de tomrai nit, long yi de tsim rai sit, lungla de tom rai mat nit lo, ngu nna dumsa shabom wu ai.
Shingrai dumsa wa go dumsa ngut ai hte rau wan kanu hpe grau ni ai hka , shing n rai Sin wa hka shon de shachyut kau dat u ai. Dai wan shachyut ai ten hta nta de kadai mung wan hpe n mai wut da ai. Du ni shing n rai mare kahtong a agyi salang tai ai hte mare a kanu kawa tai ai myitsu ni a nta hta wan lama hkru ai rai yang dai nta hta wan shabon ai shaloi mare ting kadai mung wan n mai wut ma ai. Gahtong masha ni a nta hta wan hkru ai rai yang go, dai hkru ai nta hta chyu sha wan nmai wut ai.
Shingrai wan shachyut ngut ai hpang wan nnan bai lu la na matu numsha Htu hte lasha Tu yan go wan gang nut nna chyi ai wan hpe she mai wut ai. Wan gang n chye gang ai gahtong hta ang yang go, kaga shara ko na wan numya hpe sa mayun matep la nhtom bang ya ai hte shachyi la ma ai.
Shingrai wan gang nut yang n shachyi lu jang go wan pai ngu ai bo hte mung nhprat shachyi la ma ai. Dai wan pai nhprat ai shaloi wan gang gang ai yan go langai hte lagai gahti galai rai nna she wan pai hpe mai nhprat ai. Marai langai mi sha lahkong lang n mai n hprat ai. Dai zon wan nnan bai tam la nna she wan bai mai wut la ma ai.
Ndai wan shachyut ai lam hta shara mi hte shara mi loi loi shai shajang nga ma ai. Rai timung dumsa ai lam go nau wa n shai shajang nga ma ai. Wan a npot gon ai maumui lam mung loi loi sha shai shajang ai rai timung, tun jkai wa ai maumui a lachyum go n shai nga ai. Ndai go ya prat du hkra Jinghpo masha ni hkan galo nga ai hte tsun hkai nga ai htung tara lam kaba langai mi rai nga ai rai.
Kyat Exchange Rate
No comments:
Post a Comment