SHAWNG NNAN NUM LA HPAWNG WA AI LAM 景颇族的婚俗

　　Moi prat kaw nna ndai prat du hkra Jinghpaw masha ni hta num nnan la ai shaloi hkungran ngut ai hte rau shayi numsha ni hpe shawng de na zawn myit n pyaw mat na matu mungga grai chye shaga ai hte ga namsup rawng ai masha ni hpe laka ga, ngu ai hte shangwi shapyaw let sharin shaga chye ma ai. Dai hpe Hka hku ga de gaw NUM NNAN LANYI ai nga ma ai. Manmaw Sinli ga de gaw LAKA KA ai nga ma ai.
　　Numsha ni hpw sharin shaga ai shaloi maumwi langai mi galoi mung ahkai nga ma ai. Dai maumwi gaw lanyi ai n rai; maumwi san san sha tsun dan, hkai dan ma ai.
　　Moi shawng de Yu ma Sam Naw gaw Nga ma Ja Pan ngu ai shayi sha hpe la wu ai. Shaloi Nga ma Ja Pan gaw Yu ma Sam Naw hta grau reng ai masha mahkoi naw nga nhten, ngu nna myit garai n dik ai hte num brau brau nna nga wu ai. Nga ma Ja Pan gaw num brau brau nna shara shagu wam dam hkawm mat wa wu yang Jan ga de du pru wa wu ai. Shaloi Nga ma Ja Pan gaw Jan hkawhkam kasha hpe , “Nang gaw mungkan ting hta grau ndai majaw, ngai nang kaw wa na nngai,” ngu wu ai. Jan hkawmhkam kasha gaw, “Ngai hta n-gun grau ja ai sumwi naw nga ai. Ngai Jan kade mi shaja dat ai rai timung sumwi e hkap magap kau ya ya rai nga ai.” ngu wu ai.
　　Dai hpang Nga ma Jan Pan gaw Sumwi hpang de bai sa nna, “Nang gaw mungkan ting hta hpung shingkang grau rawng ndai majaw, nagi nang kaw wa na nngai,” ngu wu ai. Shaloi Sumwi gaw, “Ngai hta grau ai nbung hkawhkam naw nga ai; ngai kade wa mi hkring nga mayu ai rai timung, nbung e ahpawt shapoi jang lawm mat wa ra nngai,” ngu wu ai.
　　Nga ma Jan Pan gaw bai lai sa wa nna nbung hkawhkam kasha kaw du jang, “Nang gaw mungkan ting hta grau ndai majaw, ngai nang kaw wa na nngai,” ngu wu ai. Nbung hkawhkam kasha gaw, “Ngai hta grau nna n-gun ja ai ga bum naw nga ai; ngai nbung kade wa mi ahpawt dat ai rai timung ga bum hta dang mat mat rai nngai,” ngu wu ai.
　　Dai hpang Nga ma Ja Pan gaw ga bum hpang de sa nna, “Nang gaw mungkan ting hta n gun grau ja ndai majaw, ngai nang kaw wa na nngai,” ngu wu ai. Shaloi ga bum gaw, “Ngai gaw grai grai kaba wa mayu nngai rai timung, dumsu wu tang gaw ngai hpe daru ayai ya ya rai nga ai,” ngu wu ai.
　　Nga ma Ja Pan gaw dumsu wu tang hpang de bai sa nna, “Nang gaw mungkan ting hta n-gun grau ja ndai majaw ngai nang kaw wa na n ngai.” ngu wu ai. Wu tang gaw, “Ngai hta n-gun grau ja ai hte hpung shingkang grau rawng ai wu shoi sumri (Byu shoi) naw nga ai; ngai gaw wu shoi sumri dum ai naga de sha hkan nang sa wa ra nngai.” ngu bai htan wu ai.
　　Dai hpang Nga ma Ja Pan gaw wu shoi hpang de bai sa nna, “Nang gaw mungkan ting hta hpung shingkang grau rawng ndai majaw, ngai nang kaw wa na nnagi,” ngu wu ai. Shaloi wu shoi sumri gaw, “Ngai gaw grai galu wa mayu nngai rai timung, Yu ma Sam Naw gaw ngai hpe kawa di kau kau rai nga ai majaw Yu ma Sam gaw ngai hta grau nna hpung shingkang rawng nga ai,” ngu wu ai.
　　Shingrai Nga ma Ja Pan gaw mungkan ting hta grau reng ai hte hpung shingkang grau kaba ai masha hpe hkan tam hkawm ai rar timung grau ai lasha hpe mi n mu ku nu ai rai nna, tinang amyu rai nga ai Yu ma Sam Naw hpang de sha bai wa nu ai rai.
　　Ndai gaw Jinghpaw masha ni num hkungran yang shayi numsha ni hpe sharin shaga ai maunwi kadun langai mi rai nga ai. Ndai maunwi gaw moi prat kaw nna ndai prat du hkra, bum ga shara shagu naw tsun hkai shajang nga ai maumwi langai mi rai nga ai rai.