MAYU NI DODAP BYE YANG NA SHAMAN GA

　　Ya awun ningtung daina, mali masa wa nang ninghtoi gaja ai shana anhte mayu lanu, pungsan hka hku ni, yu hkun sinwa janpru tsom ai naura ni go, dai ni anhte a shayi sha hpe, yu tso yu ra sai nga nna, Wunpong Htunghking hte tup, Hkungran la masin dai rai nna, ya ndai Dami Maru Da-ma Singkung ni ya, mado Saihkang nge nyep, ja wang singko e htep rai, shi bye htai yong sa lung, la ron hkumdong sa dung nna mahkang singkung sa yon, gyi nyeng sumpum sa don nga ga ai. Mayat zadung sa lan, maya zahkong sa hpan ga ai. Ya ko nna go, nan-gu dingrong nanmoi dinghkong, nanhpu nannau ni, anum mado wa rum, ala ninghtan wa hkrum nna, Sumtu aga wa run shawang amyit wa hkrum rai nga wa masit. Sut lu lammo sha hkrai manu, ja lu rumdung sha hkrai magu nna, Hka hku hpaga sa yang dau da, Hka nam aja tam yang hkron hkra, Nhprong nhkyeng asut wa ring, Wuhku wula agan wa chying nna, shadang magrau grang ai shangai, shayi shadan tang ai zinghkai nna, shadang sumbat ngang, shayi sumdo kang nna, akong shagu ajan pru, Hkaro shagu awan tu, nga mangan nga, pra wunden ja nna, galu kaba mayat maya, gumring gumrat gumja gumhpra rai nga wa masit lo.