PUNGKUM MYIPRWI

Goi ya.....
Sin mak mungkan pinra
awu asin pri hkra,
Hkaleng Mawru kaba
Wan hkru Nnang wam wa,
yubak shingnoi htingga
du bawng tauba pyet hkra,
tsin-yam wulu kata
sak hkrung galwi pyau ra,
kaja hpa lam n nga
mungkan shing-ra prat maka.

Bai.....
Hten run mungkan pin-ra
Hkristu shawang kata,
shinglet balen latsa
shada nang shoi nang sha,
sai hka nammukdara
sat nat roi rip hkrum sha,
magup sumhpa yawng hkra
htingnut hpang hkrat myu sha,
n htum hkayan zawn hpa
Wunpawng shing-ra prat masa.

Aga.....
Wunpawng amyu sha gam maka
shinggyim ahkaw ahkang kata,
Sumsing hkuwawt chyinghka
Madu chyan yu kahpra,
kraw sung sin dai pala
wan hkat numwu chyu mya,
Pungkum myiprwi ra ra
madat ka-ak hkrap Wa,
Noa sha-u ing hpa,
goi sha  kaning di na.

Oh.....
Annau ni hpe tsawra
shingbyi lunghkrung kaba.
ruyak jamjau sumhpa
hkam jan chyeju jaw ya,
akyu hpyi jahtau hkrap nga
matsan dum madat hkap la,
Chyaihku sakse lungpa
Jaw prat lamun latsa,
Wunpawng Mungdan de sa
pawn ba dun la rit Wa.....

Bumwa Hkri Ma.
14.7.2012