GADAI SHUT AI RAI??

                      Lu su suthti kummi ni,
                      Mare kaba ningngai ni;
                      Ruyak jamjau n hkrum ni,
                      Tsin-yam n k’tut yu ai ni;
                                         Myusha myit n lawm ai ni,
                                         Chyant-hput party shang ai ni; 
                                         Shanglawt hpe Ai n nawn ni,
                                         Hpaga lauban nkau mi;
                      Shanglawt ni hpe mau ai da,
                      “Mungdu asuya tsun shaja;
                      Gap hkat hkring letmat ka ga,
                      Simsa lam bawngban saga;
                                         Kade tsun tim n hkap la,
                                         Hpa wa myit ja taw a ta?
                                         Laknak wa gaw hpa n tai,
                                         Gasat hpyenma n law ai;
                      Lusha wa gaw n jaw lu,
                      Machyu pala n dang lu;
                      Awndawm Shanglawt  ginrai lu,
                      Gasat hte sha n mai lu;
                                         Myu tsaw myit gaw rawng ai hkrai,
                                         Gasat chyu sha n mai ai;
                                         Bawnu nyan bang da Karai,
                                         Shaw jai lang yang gaja mai;
                      Si ma na hku n mai di,
                      Wunpawngsha ni  n law mi;
                      N si ma dingsa l’ni mi,
                      Shanglawt mai lu anhte ni;
                                         Hpungki sat ai Gumshem wa,
                                         Kachin hpe sha hpa di na;
                                         Tsun ai hte m’ren zingri nga,
                                         Gap hkat jahkring lawan ra;” nga nga ma ai e……. 
Mahtai;    ;      Gap hkat hkring 17 ning,
                      Namchyim hpe n chye matsing;
                      Mawsha mawpsha na shading,
                      Ruyak panglai hka la-ing;
                                         Teng man Simsa lam chyu sha,
                                         Jet ai Simsa lam mada;
                                         Mawl’nyet hkrun lam n kam la,
                                         Sawt Simsa lam n tara;
                      Myit yu ga le-hpunau ni,
                      Shanglawt ni a lai kasi;
                      Sari sadi dung ga si,
                      Manai makai g’loi n di;
                                         Teng man ga hkaw ni sha tsun,
                                         Kaga hpa mi n dinglun;   
                                         Le le wo wo n hkalau,
                                         N ding n hpring ai lam kau;
                      Tang shawn da ai ga n lai,
                      Galoi tsun tim dai ga hkrai;
                      17 ning a namchyim wa!
                      Ginrai me malap  lu na?
                                         Tai wa ladat htum sai e,
                                         “K” hpe kahkyin yak sai le…;
                                         Myit htum jum ju she rai nga,
                                         Mungm’sa lam gaw sharin wa;(Dr.Kyaw Yin Hlai)
                      Simsa lam n-gun madun,
                      Wunpawng num ni hpe shangun; ( N galaw byin)
                      Ten dep myit m’lai lu ra sai,
                      Kadai madaw shut ai rai?

                                                                          Shanglawt Tsing