SHAMYIT

Prut pru wa ai manaw makru makrung machyan yawng hpe dawn daw htum tsam si kadawng mat hkra namhkan hte manut maza kanu law law hte grup grup sha zingnut si mat hkra gaungwi ngwi annau ni a shan kata hta makret si mwi ma hkra dasang shakut nga ai hpe shaning 60 ning a mabyin mahkrun hpe marm yu n'na, chye gin saga ai, myit malai lu hpaji mu, myit gin sai.

1-Jau gawng shada da she myit bung kanawn mai ai, nga hkwi sha sharawng ai shada she rau nga mai ai zawn, masu n'dum shada she nam-up galu rum ai, lagu lagut shada she bungli rau mai galaw ai, hka hte sau zawn byin taw nga ai myen hte annau ni a mabyin, sat zingri roirip hkrum nga ai ni hte sat sharu dip zingri nga ai ni kaning rai hpa hta madi shatai na rau mai nga na ta?

2-Gawda ai mung masa tara kanu masing hte asuya a hkrang tara rit kawp ni, hpyen dap a tara rit kawp ni yawng gaw kaja ai zawn rai nga tim madu hpang de madi tsap ai, madu myu ni hpe sha makawp maga myen myu ni a matu sha madung dat gawda ai, munghpawm myu sha ni a ahkaw ahkang n'lawm ai tara hte myen myu kaba a kata de shingwang de ka-up tawn sa wa na de, shanhte myu kaba ni matu sha shimlum ngang grin ai ahkaw ahkang a matu sha gyin shalat tawn ai tara, dai ni annau ni ra lata poi, madu myu sha paty hku mung masa tara grin nga na hku pyi n'mai galaw ai, laknak n'gun masha n'gun, hpyen n'gun hte shagrin tawn ai rapdaw kaning rai rau chyawm nga pra mai na ta?

3-Tara je yang ai masa masing tara a n'tsa masha madaw tsap nga n'na up hkang je yang ai, masha hte arawng aya, ja gumhpraw, masha myi man hpe yu ai, tara agyi tara salang ni annau ni hpe mara kata mara n'nga ai kaw rim sharen htawng jahkrat zingri zingrut htu ai, myit ana dasang lu hkra galaw ai, prat tup manaw n'mai rawt hkra galaw ai. 17-1 [sek hkun tit], [nga nya] 5 shana zawn re tara jahkrat nna shagyen dip rim htawng bang ai. Sinat she ngoi yang mara n'lu ai mara kata mung shawa num/la / ma yawng hpe gap sat roi rip rim zingri htawng bang ai.

4-Hpaji jawng ni hta myu myi man yu ai, dip ai, myen ahkyak dik ai n'gam kaba rai nga ai tsang shi awng na n'loi ai hte, arawng aya kaba, hpyen du jawng lu lung byin lu na ahkaw ahkang n'jaw ai. Annau ni laika n'ma sharin ai. Hpaji makru daw kau hkrum ai dasang masha lahkam n'dep hkra rawt jat n'mai hkra hpang hkrat n'na myi na hpang manya zawn myen a mayam tai hkra galaw ai. Annau ni a hpaji chye ai ni hpe shara n'jaw ai.

5-Magam bungli shachyen shaja ai annau ni hpe dip shagyen ai, asuya magam gun tim hpaji kade chye tim dip katut ai, arawng aya kaba n'jaw ai, kade tengman bungli magam kade shakut tim mayam zawn shangun ma langai hku sha tawn ai hte magam gun sak kaba na kade kaba tim ahkaw ahkang shagrau shatsam ai lam n nga ai.

6-Hkam ja lam ningra hkra, myit ana lu hkra galaw ai, dasang nanghpan ana –Ka-ni ya byin hkra HIV/AIDS ana byin hkra dasang galaw ai, myu shamyit ladat hpe katsi majan hku lang ai, dai ni annau ni Mungdan 2 a lapran grai sadi ra ai (Miwa tsi mawan hpe sadi ra ai) gangwi si hkra ma n'mai shangai hkra hte ma n'mai lu hkra galaw ai. Ahkyak gaw ningma hkang n'mu ai gangwi si hkra galaw nga ai re. (annau ni byin mai yang madu lu ai bum tsi madaw sha lang yang grau kaja ai.)

7-Makam masham hte annau ni ga garan hkra galaw ai. Annau ni a myi hpaw hpaji chye ai ni law law hpa mayun gumhpraw jaw nna mazang ayai hka bra hkra ladat tam galaw ai. Atsawm n'mai kam sham hkra n'mai nawku hkra shagyip shagyeng ai. Mara tam ai, laknak hpyen n'gun, asuya ahkaw ahkang n'gun ja gumhpraw n'gun lang n'na annau ni hpe makam masha myit hkra galaw ai.

8-Hpyen majan ladat amyu myu hte masing jahkrat, katsi majan, lu lawm ai majan myu hkum hkra hte annau ni hpe tatut nan sat sharu nga ai. N'gup hte bawngban n'na myit hkra galaw nga ai zawn hpyen majan sinat laknak hte mung sat shamyit nga ai. Gangwi kadawng si hkra maga mi de galaw ai zawn ya jang gap sat n'na mung annau ni hpe myit hkra galaw nga ai.

9-Hpaga yumga lam hta mung ahkaw ahkang hte dip pat ai, rawt jat n'mai hkra myi di shim, sutlu ngamu ngamai n'lu hkra dasang galaw ai. Annau ni a sutlu ngamai sa wa na lam yawng hpe majan hte masha n'gun ja gumhpraw n'gun hte pat ai. Miwa hte pawng n'na hpaga ginra magra madu ka-up sha ai. Miwa a arang kaba hte lamu ga hpaga arung arai ni dip madu ai. N'hprang rai, ja lung seng ginra yawng madu ka-up sha mayu ai. Dasang matsan kyet si hkra, tam hta sha na malu masha pyi n'nga hkra galaw sai re.

10-Mayam byin hkra myu myit hkra galaw nga ai hta myen a masing ladat kaba hta sak ap nawng n'na shingnan hpyen mayam hpyen lagaw lata tai ya nga ai ni, jarik sin dap rai nga ai KDA/ NDAK/ T-Hkun Myet / Du Mun yan nau/ Lasang Awng/ Tanggu Dang/ mare sin dap Rapdaw Slg. Zahkung Ting Ying (Ka-ni hpyen) myen hpe madi shadaw tai ya nga ai ni dai ni gaw myu shada masha shada mayu n'na htum hkra galaw ai ni re hte dai ni shaning grai na hkra Jinghpaw tai Du tai Uhpung tai nna Jinghpaw Wunpawng Myu Sha ni a akyu ara a matu hpa galaw tawn sai kun? Wunpawng Myu Sha kade hpe hkye tawn sai kun? Myu sha ni a matu rawt jat bawngring na matu hpa galaw lu sai kun? Madu Myu Sha ni hpe, madu kanu kawa kashu kasha ni hpe madu sinat hte madu a lata hte nan sat ai ni, tsaw ra ai hpunau ni hpe lamu ga na ya nga sai yaw. Lamu madaw mayu na kun? Masha mayu, ma yu ai shalawa matse labye palawng kanu ni e myit malai gin sai. Nanhte gap sat ai nanhte saidaw sai chyen ni nang hpe katsan ga kaw na sai hkaji nga ai hpe dum gin sai. Asan sha dan dan leng leng sat sharu shamyit nga sai myen sawa ni hpe hpa hta madi shatai nna matut ganawn na ta? Masu magaw ai ni hte teng man ai ni gaw hka hte sau she rai nga ai. Kaning rai naw pawng ganawn na ta? Sai ra manam ai, lasu si na ni hte matut nna shakram n'ra sai.

Baren Numraw

15/09/2012 (by: JP kasa )