September ( 22 ) bat kyu -shiga kadun

MAYAN MAKAU KAW SHANA TING GASAT

September (22) bat Kru

Wunpawng Mungdan Shanglawt Asuya Sinna Ginwang Dap Ba (2) Ginra rai nga ai Wanleng lam mayan, Mayan Mare makau kaw KIA Dung (11) na myu tsaw share ninghkring ni hte myen hpyen asuya a hpyen hpung ni mana hkying (10:00pm) ten kawn dai hpawt daw hkying (6:00am) ten ram du hkra gap gasat lai wa sai lam shiga na chye lu ai. Gap gasat ai kata lam shiga hpe gaw hkrat tup rai n chye lu shi ai.

JE YANG HPYEN YEN DABANG HTA HPAI DA DABANG HPAW NGA

Je Yang Camp

September (22) bat Kru

Wunpawng Mungdan Shanglawt Asuya Sinpraw Ginwang Dap Ba (3) Ginra na hpyen yen tsin yam ni gaw Lana Zup mare na Miwa lauban ni gap da ya ai hpai da dabang dum nta hkan e jawm shanu nga ai lam hpe na chye lu ai. N dai Je Yang hpyen yen ginra hta jan du wa yang hpai da dabang 1, 2 naw hpaw nga ai lam hte ka-ni nanghpam tsi hkyep ni hpe mung naw lagu dut sha nga ma ai lam shiga na chye lu ai. Lai wa sai September (19) ya shani gaw Nanghpam dut sha ai dinghku langai mi hpe Shanglawt Asuya kawn rim majaw la kau lu sai lam hpe mung na chye lu ai. Buga masha ni tsun wa ai hta gumhpraw tam ai ni gaw gumhpraw hpe sha mu nna, amyu sha shada nanghpam tsi mawan hte sat hkat taw nga ai hpe gaw n dum nga ma ai lam tsun shana wa ai. Ya na zawn Shanglawt Asuya kawn ja ja rim ahkyak la ai gaw hpyen yen dabang a matu sha nrai, Myu Sha ni yawng a matu grai kaja ai magam bungli re lam matut tsun shana wa ai.

BAWM YAM KAPAW AI KAW NA LAKNAK LAW LAW MATUT MU LA

September (22) bat Kru

Wunpawng Mungdan Shanglawt Asuya Sinna Ginwang Uphkang Ginra, Uru Seng Maw, Hpakant ginra hta lai wa sai shata Wei Wei Aung Company myen asuya hpyen hpung ni shanhte hkrai bawm yam dum gap kapaw la nna si rum mat ai gaw (100) lam re hpe matut na chye lu ai. Ya ten lamu marang kaba htu nna hpungtaw hka a gre sharu dat dat rai jang myen hpyen ni a sinat laknak ni gaw shani shagu bai dawng pru wa wa re ai lam shiga na chye lu ai. N dai zawn lamu mara kaba htu nna bai dawng pru wa ai myen hpyen ni a laknak kaji kaba (50) jan lu hta la sai lam, September (21) ya shani mung (4) bai lu hta lam ai lam na chye lu ai. Lu hta la ai myen hpyen ni a sinat yawng hta na (10) jan sha kaja ai lam matut na chye lu ai. Lu hta la ai laknak ni hpe maram yu yang myen hpyen ni si ru mat ai gaw tsa lahta de sha re lam buga masha ni kawn tsun maram ai lam na chye lu ai.

LOI JAW BUM MAKAU KAW GASAT

September (22) bat Kru

Wunpawng Mungdan Shanglawt Asuya Dap Ba (5) up hkang ginra rai nga ai Loi Jaw Bum mayan hta KIA Dap Dung (24) na myu tsaw share ninghkring ni myen hpyen ni hpe September (21) ya shana hkying (6:45pm) ten ram hta hkap gasat lai wa sai lam shiga na chye lu ai. Myen hpyen asuya a hk-m-y (387) dap ni Ting Lung maga de lai lung wa ai kaw KIA myu tsaw share ninghkring ni kawn bawm hte hkap kapaw gasat lai wa ai re lam hpe matut na chye lu ai. Myen hpyen ni si hkala ai law ai lam hpe mung mung na chye lu ai.      (by: jinghpawkasa)