LADAT KABA (4)

Myu kaba langai mi hpe ladat kaba 4 hkrang ningsam masing jahkrat n'na, zai dik ai dusat ladat hte shamyit shamat nga ai re gaw annau ni sha n'ga, laga bawsang ni yawng  hkum tut, myi tut mu chye na chye saga ai re.
Dai ladat kaba  4 gaw,

1- Myu rusai ga shamyit shamat masing.

2- Htunghking laili laika makam shamyit shamat masing.

3- Sutlu ngamu ngamai hpaga shamyit shamat masing.

4- Malu masha matut mahkai dandi shamyit shamat masing.

Lahta de na masing kaba 4 hpe tara hkungga ai lam n'nga, shinggyin nauna myit hkum tsun, dan dan leng leng asan apra dusat chyazai zawn, masha n'sawn shani shagu zingri sat nat sharu shamyit shamat nga ai gaw yawng chye nga sai. N'dai mabyin hpe media hte shiga dap ni de Wunpawng Myu Sha ni yawng aja awa ka shabra tsun shabra ra nga ai zawn, shiga dap ni hte sanhtai galaw ai ningbaw ni, tsun shaga ahkaw ahkang lu ai ni byin ai hpe byin ai hku, nga ai hpe nga ai hku asan pra gwi gwi ja ja tsun nan tsun ra ai re. Tinang Myu Sha ni a sak sumri hpe manu shadan hkungga ai hku ja ja asan, myen hpe n'hkrit n'tsang tengman tara hpe hkungga madun ai hku gwi gwi ninghkap tsun ra ai. Dai gaw annau ni a kaba dik ai hpyen hpe padang dip la lu ai hte bung ai zawn, annau ni a kaba dik ai ahkaw ahkang re. Myen pyi annau ni hpe dusat zawn sat shamyit nga ai hpe hpa rai n sen n'gup hte sha pyi n'gwi tsun, n gwi ninghkap na kun?

1-Myu rusai ga shamyit shamat masing.

A-Myu gayau ladat, masha shada mayu yang she masha htum ai zawn myu gayau yang she myu langai shangai wa lu na re. Jinghpaw hte myen la hkat yang myen+jinghpaw myu lakung langai byin pru lu ai. Myen la/num langai ngai Jinghpaw la/num hte lu hkungran yang kumhpa shagrau ai, lawu myen mung kaw na lam n'tsa n'ta n'lu masha ni hpe annau ni buga de gawt shalun n'na mare masha gayau ai ladat,

B- Myu shada rusai ga bung shada ga garan hkra sumprat dawk, ru kaba hkrawn ashun hkra kaichyan hte ja gumhpraw masha n'gun law law lang n'na myu shamyit ai, kaja ai zawn zawn simsa lam tam masu n'na ga garan n'gun kya hkra, ga shadawn Simsa lam tam [Sara Kaba Saboi  Jum, kanau Hkum Myet hte simsa Salang ni] myen a mugun shingnan ni KDA-NDAK, T-Hkun Myet, Lasang Awng, Tanggu Dang, Du Mun yan nau, Rapdaw Slg. Zahkung Ting Ying laga myen a shingnan shangun ma ni.

C- Mungchying masat hte yup tung jahpan hta nna myu shamyit mat hkra tara hkrang masu galaw shapraw nna ladat tam galaw nga ai.

D- Ga shamyit mat hkra bungli lamang magam gun masha n'gun hte dip n'gun jaw ahkaw ahkang hte dip shamyit nga ai.

E- Nanghpam malu masha HIV/AIDS Manggang, Galang gyi, Mawng ana (SHAWA NUM) shawa wa kang dap hpaw n'gun dat nna myu shamyit shamat nga ai.

F- Hpyen majan hte tatut gap sat shamyit nga sai re. 

2- Htunghking, Laili Laika, Makam shamyit shamat masing. 

A- Myen buhpun sumli lam hpe si manyi dik ai hku gangwi ngwi yawng buhpun hkra ja gunhpraw ahkaw ahkang hte dip n'gun jaw ai. Myen ka hkrang, myen madum sumhpa, myen yungwi mahkawn ni hpe madu htunghking mahkawn ka hkrang hku lang chye hkra ja gumhpraw ladat shaw shamyit shamat nga ai.

B- Sumla hkrung shadang/shayi ni hpe aming hte myen htunghking buhpun sumli lam hpe dip hpun shangun nna masa n'li gat hkai shangun ai.

C- Buddha makam hpe mungdan asuya makam hku aming hte dip nawku shangun ai, Jawng hkan Buddha tara laika sharin ai, hpara naw shangun ai. Laban shani jawng lung shangun ai.

D- Buddha la/num langai mi laga num/la lu la hkungran jang kunhpa shagrau ai, arang jaw ai, arawng aya shalun ya ai.

E- Buddha makam bung ai ni sha hpyen du jawng lu lung ai, arawng aya kaba jaw ai. Myen Buddha sara/ma ni hpe bawsang buga de myu kaba masing/makam masham masa masing gat hkai shangun matsun ai.

F-  Hpaji jawng hkan annau ni a Laika n'mai sharin ai hte, Laika, Ga mat hkra makam mat hkra, [Bum sa sana] dat ai. (N'dai kaw loi sadi jaw mayu ai byin mai yang annau ni jawng hkan myen laika n'sharin hkra shakut yang mai na re.)

3- Sutlu ngamu ngamai hpaga shamyit shamat masing.

A- Asuya n'gun, ja gumhpraw n'gun, masha n'gun kaba hte annau ni ngamu ngamai lam hpe shamyit ai.

B- Lamu ga zing madu ai hte annau ni a malu masha ngamu ngamai hpaga lam hpe jahten shamyit nna matsan hkra galaw ai. Rawt jat n'mai hkra galaw ai.

C- Masha n'gun, ja gumhpraw arung arai n'gun kaba dat nna annau ni a hpaga ginra hpe ka-up dip sha ai, hpaga masing, hkai sun masing, ja lungseng ,n'hprang rai, hpun hpaga, gunrai dut ginlen ai lam yawng hpe n gun kaba hte dip gamyet sha ai,

D- Aming ahkaw ahkang sinat lang nna malu masha mya gashun, dang gamyet zingrut htu sha ai, shingma kaw mam ting sha ai. Hkauhting hkauna magam n'mai galaw sha hkra hte mare dasang htawt shatsang ai. Ya hpang jahtum gaw mare nat, du sat yam nga yang gap shamyit sha ai, myalu myasha singgu krin byin hkra, hpyen yen tsin yam byin hkra shamyit shamat sai re.

E- Miwa Kala hte pawng nna shagyip shagyeng sha ai, Miwa hpe ahkaw ahkang jaw nna madim n'hprang ja lungseng, annau ni lamu ga krin hkra dip galaw shamyit sha ai, dusat, tsi hkrung tsinan ni shamyit shatsai sha ai. Hpunru, hpyi, lap, pu n'ngam jahten shatsai sha ai. Annau ni a lu lawm lam yawng hpe Makam mMasham Nawku Jawng, alu kaw na hkawt myala ai. Dinghku arung arai num bahkang kaw na hkawt yawng myala ai.

4- Malu masha matut mahkai dandi shamyit shamat masing.

A- Annau ni lamu ga buga hpe annau ni nan up hkang nna, madu lu lawm ai n'gun atsam hte moi kaw na dai ni du shakut galaw sa wa yang dai ni annau ni sutlu ngamu ngamai shimlum rawt jawt galu kaba bawngring mayat maya madang tsaw rawt jat dik ai myu, mungkan hta dan hkung ai myu tai nga ra na ten rai sai. Ya gaw singgu krin matsan dik ai masha u tsang hta tsap nga ra ai gaw kade majaw ta? Hpa majaw ta?

B- Malu masha hte gangwi shakyet kawsi hpang gara si hkra roirip zingri dip shagyeng jahkrit shama zingrut htu shingma mam ting sha nga ai gaw, shinggyin nauna myit htingbu kaja, munghpawm ngu tsap mai na kun? Hpa grai n'chye shi ai ma kaji ni hpe du kaw htumrin u shoi gyit noi tawn ya n'na shakyet sat ai, rawt galu kaba wa chye ai yawng hpe lungpa kaba dip mara apyet tawn ya ai kade majaw hpa majaw ta?

C- Myu sha langai mi a lawan rawt jat galu kaba mai ai matut mahkai, htinglet htingsa ginrat ginshi mahkri hpe myi pat kau ya ai. Dai ni gaw dasang mu chye na chye ai lam yawng hpe jahtum sat shamyit nga sai. Hkawmwa hkawmsa matut mahkai yawng lamu ga jarik du htu pat kau ya sai. Hpa hpe naw myit mada shatai n'na munghpawm hta tsap na ta? Munghpawm ngu ai hta tsap shut lai wa sai jaw ya du nam maling ga hkan bra n'na nga ra ai kun? Hkru hkru kat kat, mu mu mai mai, ngwi ngwi pyaw pyaw nga ra sai. Shaning 60 ning hpang hkrat n'na masu mana ai hkrum wa saga ai Myu Sha ni e dum gin saga ai.

D- Dai ni gaw ta tut du sat zawn tara n'lang sat shamyit shamat nga sai hte shaning 60 ning hkawt ladat amyu myu hte GABAW KABA 4 langa nna shamyit lai wa sai hpe dum chye ra sai. Hpa rai myen tsun ai hpe naw kam na ta? Myen nan myit sanseng, tara lang n na shinggyin nauna myit hte teng bawngban mayu ai mahkyen hkrang n'mu n'madun lu yang bawngban lam hpe n'mai myit shang sha ai. N'dai ram zingri sat taw nga ai mu nna majan gasat nna shada nang si ngai si, sadi maja lareng akyeng digyet tam hkat nga ai ten hpa hpe yu na bawngban na. hpa hta shatai madi n'na bawngban na ta? Ningbaw ningla ni, Mungchying Shawa ni a n'sen hpe ja ja sung sung li li naw madat ga. Myen a myit hpraw san seng ai kara hku mung n'mai byin ai. Thein Sein wa America sa na ten hta mahku kaba shaw shamawng dat ai she re. Yup dam dam n'na yup jawp jawp n na shabam nga ai she re.

SHANI PUNG DING WAN SHANAN LANG NNA MANA RAI N NGAI, DUSAT RAI N NGAI, NGA SHABAM PUK MARAWN HKAWM NGA AI. MASU KAWA HPE HKUM KAM.

Baren Numraw

20/9/2012  (JP kasa)