နိုင်ငံသား တစ်ယောက်ချင်းရဲ့ အသိကညာ မြင့်မားမှု နဲ့ နိုင်ငံတိုးတက်မှု ဆက်နွယ်ခြင်း။

ကမ္ဘာမှာ ဒီမိုကရေစီ နိုင်ငံ ဖြစ်လာပြီး ရင်းနှီးမြုပ်နှံသူများလာလို့ အလိုလို တိုးတက်လာတာ မရှိပါဘူး။ နိုင်ငံသား တစ်ယောက်ချင်းရဲ့ စိတ်ဓါတ်အခြေခံကလဲ အရေးကြီးပါတယ်။ မြန်မာနိုင်ငံလို စနစ်တကျ စိတ်ပိုင်းဆိုင်ရာ ဖျက်ဆီးထားတဲ့ နိုင်ငံအဖို့ ပိုပြီး နှစ်ဆ သုံးဆ ကြိုးစားရမှာပါ။

ဂျပန် နိုင်ငံ နဲ့ ဂျာမဏီ နိုင်ငံက ဥပမာ နှစ်ခုကိုပဲ ဖေါ်ပြချင်ပါတယ်။

ဂျပန် နိုင်ငံမှာ အလုပ်သွားလုပ်တဲ့ မြန်မာနိုင်ငံသားတွေကို ယေဘုယ အားဖြင့် မြန်မာ နိုင်ငံထဲမှာ သူဌေးစာရင်း သွင်းထားပါတယ်။ တကယ်တော့ မြန်မာနိုင်ငံသားများ (အားလုံးမဟုတ်၊ အများပိုင်း) ဂျပန်နိုင်ငံမှာ လုပ်နေတဲ့ အလုပ်တွေဟာ ဂျပန် နိုင်ငံသားတွေ မလုပ်ချင်တဲ့ 3D (ရုပ်ရှင်မဟုတ်ပါ) အလုပ်တွေပါ။ 3D ဆိုတာကိုတော့ အထူးတလေ မရှင်းပြတော့ပါဘူး၊ နာမည်ကြီးပြီးသား မို့လို့ပါ။ (ဂျပန်မှာ အလုပ်လုပ်တဲ့ လူတွေကို စော်ကားလိုခြင်း မဟုတ်ပါ။ ဖြစ်ရပ်မှန်တခုကို တင်ပြလိုခြင်းသာ ဖြစ်ပါတယ်။)

ဘာဖြစ်လို့ ဒီလို ကွာသွားသလဲ.... ဂျပန်တွ အလုပ်ကျိုးစားကြတာ လူတိုင်းသိပါတယ်။ ဒါပေမယ့် အလုပ်ကျိုးစားခြင်း တခုထဲတော့ မဟုတ်။ သူတို့မှာ စံနမူနာ ယူစရာ အများကြီးရှိတဲ့ အနက် တခုကို ပြောပြချင်ပါတယ်။


ဥပမာ...

ဂျပန်မှာ အမိုက်ပစ်မယ် ဆိုရင် အမိုက်ပုံး အမျိုးအစား တစ်မျိုးထက်မက ထားပေးတာ တွေ့ပါလိမ့်မယ်။ (မြန်မာနိုင်ငံမှာတော့ တမျိုးတွေ့ဖို့တောင် အနိုင်နိုင်)။ အဲဒီ အမိုက်ပုံးထဲကို ထည့်ရမဲ့ ပစ္စည်းအမျိုးအစား ကို အမိုက်ပုံးရှေ့မှာ ရေးထား (ပုံနဲ့တကွ) ပါတယ်။ အနဲဆုံးသုံးမျိုးတွေ့ရတတ်တာကတော့... (၁) ပလားစတစ် (၀ါ) မဆွေးမည့်တတ်တဲ့ ပစ္စည်းများထည့်ရန်။ (၂) ပြန်သုံးလို့ရမဲ့ ပစ္စည်းများ၊ သောက်ရေဗူးခွံ၊ အချိုရည်ဗူးခွံများ။ (၃) ပုပ်သိုးလွယ်တဲ့ အမျိုးအစားများ။..... စသည်ဖြင့်ပါ။

ဒီတော့... လူတွေကော လိုက်နာပါ့မလား... ဘယ်သူက စောင့်ကြည့်နေလဲ... မှားထည့်မိရင် ဒဏ်ငွေဆောင်ရသလား....

ဒဏ်ငွေလဲ မဆောင်ရပါ... လူတစ်ယောက်မှလဲ တာဝန်ယူပြီး စောင့်ကြည့်မနေနိုင်ပါ... ၀န်ထမ်းတစ်ယောက်ခန့်ဖို့ လစာက မနဲဘူး... လူတိုင်းက အသိစိတ် ရှိရှိနဲ့ ထည့်ပါတယ်။ မှားထည့်တဲ့ ပစ္စည်းရှိတယ် ဆိုရင် ဂျပန် မဟုတ်ဘူး.. လို့ တွက်ကြပါတယ်။ ဂျပန်လူမျိုးတွေဟာ အမိုက်ပုံးမှာ ပစ်မဲ့ ဗူးခွံအထဲမှာ အနံ့ဆိုးထွက်မဲ့ အရည်မျိုးပါရင် ရေဆေးပြီးမှပဲ ပစ်လေ့ရှိပါတယ်။ တကယ်တော့ ဘယ်သူမှ မြင်မဲ့အရာတော့မဟုတ်ပါ။ အဲဒါကြောင့် ဂျပန်တွေက ဘယ်နေရာ နိုင်ငံခြားသား ပိုများသလဲ ဆိုတာ သိရအောင် အမိုက်ပုံးမှာ ကြည့်တယ်လို့ ဆိုပါတယ်။

ဂျာမဏီ နိုင်ငံက မြို့ပတ် ရထားတွေ အကြောင်း ပြန်စလိုက်ရအောင်....

ဂျာမဏီ ရထားဘူတာ တွေမှာ ထူးခြားချက်က ရထားပေါ်တက်လမ်းတစ်လျှောက် စင်ကာပူ ဘူတာ တွေမှာလို ပိုက်ဆံထည့် (သို့) စမတ်ကတ် တခုခု ကပ်လိုက်မှ ဖွင့်လာတဲ့ တံခါးမျိုးလဲ မရှိသလို... လက်မှတ်စစ်လဲ မထားပါဘူး။ လမ်းဘေးမှာ မထင်မရှားနဲ့ ရှာယူရတာက လက်မှတ်ရောင်းတဲ့ စက်ကလေးပါ။ ကိုယ့်ပျက်ဆံ နဲ့ ကိုယ့်ဟာကိုယ် ဘယ်သွားမယ် ဆိုတာ နှိပ်ပြီး လက်မှတ်ဝယ်တယ်။ ပြီးတော့ လက်မှတ်ပြစရာ မလိုတဲ့ ရထားပေါ် တက်စီးသွားပါတယ်။ လက်မှတ်မ၀ယ်ပဲ စီးသွားလဲ ဘယ်သူမှ တိုင်ပြောမဲ့လူလဲ မရှိသလို၊ ဖမ်းမဲ့လူလဲ မရှိပါဘူး။ အခါအားလျှော်စွာ တွေ့ရခဲတဲ့ လက်မှတ်စစ် တနှစ်တခါ ပေါ်လာတတ်တယ် လို့ ဆိုပါတယ်။ ဒါပေမယ့် တသက်နေလို့ လက်မှတ်စစ် တခါမှ မတွေ့ဖူးတဲ့ မြန်မာ နိုင်ငံသားတွေလဲ အများကြီးပါ။ လူအများပိုင်းက တစ်နှစ်လက်မှတ်လုပ်ထားပြီး စီးကြတယ်။ တစ်နှစ်လုံး တခါမှ လက်မှတ် ၀ယ်စရာမလိုတော့ တခါတလေ တစ်နှစ်လက်မှတ်တောင် အိမ်မှာ မေ့ကျန်ခဲ့တာတွေ ရှိတယ်။

ဒီနေရာမှာ ဂျာမဏီ နိုင်ငံသားတွေက စည်းကမ်း ရှိတယ်။ တစ်ယောက်မှ အချောင် မစီးဘူး။ အချောင်စီးတတ်တဲ့ လူအများပိုင်းဟာ အာရှနိုင်ငံသားတွေပဲ ဖြစ်ပါသတဲ့။

မြန်မာနိုင်ငံလဲ ကမ္ဘာမှာ နာမည်ကြီးတဲ့ အချက်တွေ ရှိပါတယ်။ ဒါကတော့ ဥပဒေမဲ့ လူသတ်မှုတွေ၊ ဖမ်းဆီးထောင်ချမှုတွေ၊ မဒိမ်းမှုတွေ၊ အကတိလိုက်စားမှုတွေ၊ လိမ်ညာမှုတွေပါ။

ဒီတော့ ဒို့နိုင်ငံလဲ တိုးတက်ချင်တယ် ဆိုရင်တော့ ရွှေနိုင်ငံသား တစ်ယောက်ချင်းစီရဲ့ စိတ်ဓါတ်တော့ အရေးကြီးလာပြီနော့။ မိုးကျရွှေကိုယ်တော့ လုပ်လို့မရဘူး။
 Duwa Kachin