ရေလွှမ်းမိုးမှု ကြုံနေသော ဖားကန့်မြို့ကို သြဂုတ် ၂၄ ရက်က တွေ့ရစဉ် (ဓာတ်ပုံ – ဧရာဝတီ)
ကချင်ပြည်နယ် ဖားကန့်မြို့တွင် ယခုရက်ပိုင်းအတွင်း မိုးသည်းထန်စွာ ရွာသွန်းမှုကြောင့် အိမ်ခြေ ၃၀၀ ကျော် ရေလွှမ်းမိုး ခံနေရကြောင်း သိရသည်။
အဆိုပါ ရေလွှမ်းမိုးမှုခံနေရသည့် ရပ်ကွက်များမှာ ငှက်ပျောတော၊ မြို့မ၊ အေးမြသာယာနှင့် မရှီကထောင် တုိ့ဖြစ်ကြောင်း၊ ရေလွှမ်း မိုးမှုသည် ကျောက်တူးဖော်သည့် ကုမ္ပဏီများ၏ စွန့်ပစ်ပစ္စည်းများ စည်းကမ်းမဲ့ စွန့်ပစ်ခြင်းကြောင့် ချောင်းများ ပိတ်ဆို့မှုဖြစ်ပေါ် နေ ကြောင်းလည်း ဖားကန့် ဒေသခံ ကိုလှဆန်းက ဧရာဝတီသို့ ပြောသည်။
“နှစ်ထပ်အိမ်ရှိတဲ့လူတွေက အပေါ်မှာနေကြတယ်။ တချို့ကတော့ ကုန်းမြင့်တဲ့ ဘုရားကျောင်း၊ ဘုန်းကြီးကျောင်းတွေမှာနေကြ တယ်။ ဒီနှစ်ကတော့ ရေတက်မှုက စိုးရိမ်မှတ်ကို ရောက်တယ်”ဟု ကိုလှဆန်းက ဆိုသည်။
ရေ လွှမ်းမိုးမှုကြောင့် ဒေသခံ ၁၀၀၀ ကျော် ပြောင်းရွှေ့ရကြောင်းလည်း သိရသည်။
လက်ရှိအခြေအနေတွင် စားဝတ်နေရေးအတွက် အဆင်ပြေနေသော်လည်း၊ မြစ်ချောင်းရေကြောင့် ဒေသခံများ ဝမ်းရောဂါဖြစ်ပွားမည်ကို စိုးရိမ်နေကြောင်း၊ သက်ဆိုင်ရာ အုပ်ချုပ်ရေးပိုင်းမှလည်း သောက်ရေသန့်များ လာရောက် ဝေပေးကြပြီး ကယ်ဆယ်ရေး အနေဖြင့်လည်း ဌာနဆိုင်ရာမှ စက်လှေဖြင့် ပြောင်းရွှေ့ပေးနေကြောင်း ဒေသခံများက ပြောဆိုသည်။
“ရပ်ကွက်ထဲက ကိုယ်ထူကိုယ်ထ ထမင်းထုတ်တွေ ဝေပေးနေတာတွေ ရှိပါတယ်။ ဥရုချောင်းရဲ့ စိုးရိမ်မှတ်က ၆ ပေ၊ ၈ ပေလို့သတ် မှတ်ထားတာ၊ မနေ့ကတော့ ၁၂ ပေ၊ ၁၄ ပေ ဆိုတော့ စိုးရိမ်မှတ် ကျော်တက်ခဲ့တယ်”ဟု ဖားကန့်ဒေသခံ ဦးလှဆန်းက ပြော သည်။
ကချင်ပြည်နယ်ရှိ ကချင် လွတ်လပ်ရေး အဖွဲ့ (KIO) ထိန်းချုပ်ရာ ဂျေယန်း ဒုက္ခသည် စခန်းမှာလည်း ဇူလိုင်၂၂ ရက်က မိုးရွာသွန်း မှုကြောင့် ရေကြီးခြင်း၊ မြေပြိုခြင်းများ ဖြစ်ပေါ်ပြီး လူ ၅ ဦး သေဆုံးခဲ့ကြောင်း၊ ရှမ်းပြည်နယ် မူဆယ်မြို့တွင်လည်း ရေကြီးမှုကြောင့် အမျိုးသားတဦး ရေနစ် သေဆုံးခဲ့ကြောင်း သိရသည်။
မွန်ပြည်နယ် ကျိုက်ထိုမြို့နယ် ရသေ့တောင် ကားလမ်းအနီးတွင်လည်း သြဂုတ် ၅ ရက်က မိုးရွာသွန်း၍ မြေပြိုမှုကြောင့် အသက် ၂၂ နှစ်အရွယ် အမျိုးသမီးတဦး မြေပိသေဆုံးခဲ့သည်။
သြဂုတ်လ ၅ ရက်နေ့ နာဆာဂြိုဟ်တု တိုင်းတာချက်အရ ရခိုင်ပြည်နယ်မြောက်ပိုင်း၊ ချင်းပြည်နယ်တောင်ပိုင်း၊ ဧရာဝတီအရှေ့ပိုင်း၊ ရန်ကုန်၊ ပဲခူးတိုင်းတောင်ပိုင်း၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်းတို့တွင် မိုးကြီးနိုင်သည်ဟု မိုးလေဝသနှင့် ဇလဗေဒ ပညာရှင် ဒေါက်တာ ထွန်းလွင်၏ ဖေ့စ်ဘုတ် စာမျက်နှာတွင် ရေးသားထားသည်။
ထို့အပြင် လာမည့် ၃ လအတွင်း ဧရာဝတီတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ မကွေးတိုင်း ဒေသကြီး တောင်ပိုင်း၊ ရခိုင်ပြည်နယ် တောင်ပိုင်း၊ မန္တလေးတောင်ပိုင်းစွန်း၊ ရှမ်းပြည်နယ် အနောက်တောင်ပိုင်း၊ ကယားပြည်နယ်၊ မွန်ပြည်နယ်နှင့် ကရင်ပြည်နယ် မြောက်ပိုင်းတို့တွင် ရွာသွန်းနေကျ မိုးရေချိန်ထက် ၄၀ ရာခိုင်နှုန်းမှ ၅၀ ရာခိုင်နှုန်းထိ ပိုနိုင်သည်ဟု ၎င်းက သုံးသပ်ထားသည်။
လက်ရှိတွင် သံလွင်မြစ်ရေနှင့် ငဝန်မြစ်ရေတို့မှာ စိုးရိမ်ရေမှတ်အထက် ရောက်နေပြီး ယင်းရေမှတ်အတိုင်း ဆက်လက် ရှိနိုင်ကြောင်း၊ ပဲခူးမြစ်ရေ၊ စစ်တောင်းမြစ်ရေ၊ ရွှေကျင်မြစ်ရေတို့မှာ စိုးရိမ်ရေမှတ်အောက်တွင် ရှိနေသော်လည်း စိုးရိမ်ရေမှတ် အထက်သို့ ရောက်ရှိလာနိုင်ကြောင်း မိုးလေဝသနှင့် ဇလဗေဒ ညွန်ကြားမှုဦးစီးဌာန ၏ ဝက်ဘ်ဆိုက်တွင် ဖော်ပြထားသည်။
သတင်း ဧရာဝတီ
Kyat Exchange Rate
No comments:
Post a Comment