Lai
wa sai 2011 ning March shata ram hta ngai English hkaja nga ai jawng
kaw American saranum hte shawng hkrum shachyen la lu ai. Shi hpe gara
kaw na rai ngu san yang, “I am from Seattle, Washington” ngu bai htai
ai. Dai shaloi na aten hta shanhpraw law lawni hte n hkrum ga shi ai
ngai jawngma wa mau mat ai. Hpa majaw US kaw na rai ngu n shachyen ai
rai ngu bai san yu yang, shan hte ni dai hku shachyen ai gaw htung hku
re ngu na tsun dan ai (US na ni hti hkrup yang naw comment ya rit.
Confirm galaw na matu. 
).
).
Lai wa sai May-June hkan Dukaba Gun Maw
na mungga langai yu ai shaloi shi tsun ai gaw, “Maigan na du ai
journalist ni hte hkrum shaga di Kachin ngu ai hpe galoi kaw na na ga ai
rai? ngu san yu yang 2011 ning hpang de kaw na she re” ngu tsun ai hpe
na hkrup ai.
Re, dai ni anhte Jinghpaw Wunpawng amyu
sha ni n law shi ai ni re. Mungkan mungdan law law gaw anhte Kachin hpe
hkum tsun Myen mung gara kaw re ngu ai hpe pyi n chye ma ai. Anhte
Jinghpaw Wunpawng amyu sha ni naw nga ai hpe n chye yang, anhte hpe n
nga sai ngu shadu mat na. Anhte n nga ai ngu shadu mat yang, anhte hpe
lam amyu myu hku (mung masa lam, sut masa lam, hpyen masa lam) dip da ai
hpe n lu karum ai sha Myen hpyen wa ra ai hku amyu ting hpe shamat kau
ai hkrum na re.
Dai majaw anhte maigan shara shagu du
Jinghpaw mung na Jinghpaw Wunpawng amyu sha ni, anhte Jinghpaw mung a
lam, Wunpawng amyu sha ni hpe n chye shi ai ni grau chye wa na matu,
maigan ni hte shachyen ai shaloi “I am from Kachin state, Burma
(Myanmar).” ngu shachyen ga. Sam mung na hpu nau ni mung “I am from Shan
state, Burma but I am Kachin.” ngu shachyen na matu ga saw mayu nngai.
Dai hku shachyen yang, Kachin state ngu
ai hpe n na ga, Burma ngu ai hpe n chye ai ni hpe anhte amyu sha ni a
lam, mungdan a lam hpe mai tsun dan na mahkrun pru wa na mali ai. Amyu
sha ni a lam ngu ai hta, anhte na labau, htung hking, manawt dingsawt,
bu hpun sumraw lam, lu sha ni hpe mai tsun dan ai zawn majan, IDP ni a
lam ni hpe mung mai tsun dan mat na re.
Jinghpaw Wunpawng amyu sha ni hpe mungkan
ting chye wa na matu dai ni kaw na anhte hta lit nga nngai. Dai majaw n
law n la, kadai n chye ai amyu kaw na masha grau chye ai amyu tai wa na
matu anhte yawng lit jawm gun hpai sa wa ga ngu ga saw mayu n ngai.
Kyat Exchange Rate
No comments:
Post a Comment